Јавниот долг во Македонија заклучно со третиот квартал од годинава изнесува осум милијарди евра или 55,8 отсто од бруто-домашниот производ. Во однос на претходниот квартал има намалување за 2,1 процентни поени поради враќањето на достасаната еврообврзница.
„Во моментов сè уште е одржливо нивото на јавен долг што го има Македонија, но може да се каже дека за краток период ќе ја премине психолошката граница од 60 отсто од БДП“, вели во интервју за „Блумберг Адрија“ Трајко Славески, универзитетски професор.
Тој посочува дека ова е само привремено намалување поради отплата на еврообврзницата, а проектираниот буџетски дефицит и потребите за финансирање на буџетот и издатоците што ги планира Владата за годинава и за следната година воопшто не се охрабрувачки во насока на намалување на јавниот долг.
Блумберг Адрија
„Следната година е изборна година и може да се очекува раст на јавниот долг, а со тоа и пораст на цената на задолжување и на домашниот и на странските пазари за Македонија“, додава Славески.
План за раст на Западен Балкан
Според Славески, планот за раст на Западен Балкан што го најави ЕК е преоптимистички.
„Мислам дека премногу оптимистички се даваат ветувања кон земјите од Западен Балкан. Секој економист може да процени дека со таа сума на средства и со капацитетот што го имаат за апсорпција на средства, спроведување реформи и проекти земјите од Западен Балкан, конкретно Македонија, не е можно да се дуплира бруто-домашниот производ по жител или во наредната декада како што тие ветуваат“, вели Славески.
Тој смета дека тоа е наивно верување затоа што тоа би значело дека Македонија ќе има просечна стапка на БДП од седум отсто.
„Ние во изминатите десет години имаме анемична стапка на раст под два отсто годишно. Сега се ветува дека ќе имаме седум отсто, со сума од околу 800 милиони евра што треба да бидат наменети, дел како грантови за Македонија. Ние како држава многу повеќе од таа сума позајмуваме, а сепак имаме раст што се движи дури и под два отсто“, вели Славески.
.webp){kind=icon}
Во моментов нема коментари за веста. Биди прв да коментира...