.webp){kind=icon}
Забрзување на економскиот раст и развој, продолжување на евроинтегративниот процес и борба против корупцијата се трите клучни приоритети на кои треба да се фокусира новата влада, смета академик Таки Фити. Неопходно е да се да продолжат и реформите, а треба да се отвори и широк фронт на борба против сивата економија.
Одговарајќи на новинарски прашања пред научната расправа во Македонската академија на науките и уметностите (МАНУ) за макроекономијата по рецесијата од 2007-2009 година, академик Фити не сакаше да го коментира најавениот заем од една милијарда евра зашто околу тоа, како што рече, сè уште нема никакви информации.
Во однос на инфлацијата, тој укажа дека монетарната и фискалната политика мора да се координираат. Ако има фискална недисциплина и ако буџетот троши многу, оцени тој, нема централна банка што може да ја спречи инфлацијата.
„Не може да одржиме висока ценовна, макроекономска и финансиска стабилност без дисциплинирана фискална политика. Новата влада мора да води сметка за тоа. Нејзиниот приоритет треба да биде прво да се забрзаат економскиот раст и развој, второ да продолжи евроинтегративниот процес и трето борба против корупцијата. Тоа се основните приоритети и се сосема добро профилирани или ставени на маса високо во агендата на програмата на идната влада. Голема врева меѓу економистите крена прашањето за едната милијарда. Не е коректно многу да се прашува и за самата влада, зашто луѓето веднаш почнаа да го поврзуваат тоа со милијардата од Тајван, не знаејќи за што станува збор. Не знаеме што е тоа, но ќе видиме“, вели Фити.
МИА
„Имаме висок долг, треба да се отвори широк фронт на борба против сивата економија. Таму има огромен потенцијал да ги зголемиме буџетските приходи за да може Владата полесно да управува со фискалната политика, а тоа може да ја олесни координацијата со монетарната политика“, истакна академик Фити.
Сè што се случува надвор, на макроекономски план, според него, има големо значење и висока релевантност за земјава.
„Клучните предизвици за македонската економија се поврзани со она што се случи по кризата од 2007-2009 година. По оваа криза следуваа нови удари и падови. Кризата од 2007-2009 година во ЕУ се трансформира во должничка криза, а потоа и во криза на еврото. ЕУ е битна за нас зашто е наше релевантно подрачје на увоз и извоз, но и курсот на денарот е врзан за еврото. Македонија по 2008 година го изгуби фискалниот простор. До 2007-та имавме учество на јавниот долг во БДП околу 23 отсто, па за пет-шест години дојдовме на 26 проценти. Денес, како резултат на двете кризи, над 60 отсто е учеството на јавниот долг. Прашањето е дали и колку е одржлив, што треба да правиме за да стане одржлив и кои фискални правила се применуваат“, напомена Фити.
Негова препорака е Фискалниот совет да контролира како се трошат буџетските средства, дали и колку се почитуваат основните буџетски правила - долгот да не биде поголем од 60 отсто, буџетските дефицити да се сведат на два-три проценти, за пет-шест години да дојдеме до нормално ниво на задолженост,...
Како што рече Фити, монетарната политика нема голема зависност.
„Врзани сме за централната банка, но тука има многу сериозни прашања. Сега има големи дилеми кога ќе почнат да се намалуваат каматните стапки, што е битно за бизнисот и за заживување на економијата. Американската централна банка е во големи тензии, тие имаат речиси 5,5 референтна каматна стапка, бизнисот таму очекуваше годинава да се намали за 1,5 процентен поен и да дојде до 4, но најавите се дека нема да се намали повеќе од 0,5 отсто. Европската централна банка рече дека ќе почне со намалување, но и тие се плашат да не проработи инфлацијата повторно. Ако тие почнат со намалување, нормално дека нашата централна банка ќе го следи тоа“, објасни Фити.
Научната расправа на темата „Макроекономијата по големата рецесија 2007-2009 година - релевантноста на промените за економската наука и за македонската економија“ ја организира центарот за стратегиски истражувања „Ксенте Богоев“ при МАНУ. Дискусиите од расправата, откако ќе бидат авторизирани од страна на учесниците, МАНУ ќе ги објави во посебен Зборник на трудови од научната расправа.
