Во предизборна кампања, јавните финансии добиваат поинаков тек, односно се троши повеќе отколку што се собира. Тоа за експертите е јасен сигнал, вели Павле Гацов, претседател на Здружението на даночни советници на Македонија. Гацов објаснува дека сега Министерството за финансии се обидува да пушти повеќе пари кај граѓаните со намера да се прикаже во подобро светло, бидејќи во изборната кампања се потребни добри зборови за тоа како се водени политиките. Но тој додава дека во јавните финансии ова значи форма на посериозен притисок.
Според Гацов, во првиот квартал годинава приходите растеа со скромни 5 отсто, имајќи предвид дека и инфлацијата приближно се движеше во оваа големина.
„Затоа, пак, расходите имаат раст од цели 20 отсто, што е четири пати повеќе од приходите. Односно имаме чувство дека се троши недомаќински. Тоа значи дека во вториот период од годината, кога ќе завршат изборите, оваа или новата влада ќе мора многу силно да го затегне ременот односно да внимава на трошоците. Притоа ќе треба собирањето на приходите да продолжи со подобро темпо од она што го имаме досега, бидејќи буџетскиот дефицит од над 300 милиона евра сигурно ќе значи некаква, да кажам, сериозна финансиска минусна позиција за новата власт, бидејќи до крајот на годината не очекуваме некакви драматични подобрувања во македонската економија за да се дополни она што сега е изгубено“, вели Гацов.
Во однос на најавите за линеарен раст на пензиите од пет илјади денари, Гацов смета дека тоа е финансиски неодржливо.
„Тоа ќе значи нов дефицит во буџетот односно ќе значи одлив на над 250 милиона или речиси 300 милиони евра годишно. Во случај да се реализира тоа, имајќи ги предвид постојниот дефицит и овој најавениот, мислам дека доаѓаат тешки денови за македонските јавни финансии“, вели Гацов.
Тој појаснува дека Фондот за пензиско и инвалидско осигурување сега се финансира од придонесите и е дополнително зависен од централниот буџет. Засега нема најава за зголемување на придонесите, за евентуално зголемување на старосната граница за пензионирање, па произлегува дека финансирањето ќе оди преку централниот буџет.
„И тука повторно има два модела, или ќе растат приходите односно давачките за граѓаните и за бизнисите или, пак, ќе имаме ново странско или домашно задолжување, а сето тоа води кон продлабочување на буџетскиот дефицит“, вели Гацов.
Гацов смета и дека монетарните власти не треба да брзаат со намалување на каматните стапки.