Ребалансот на буџетот пред министрите - од каде ќе се крати

Владата најверојатно в четврток ќе го разгледа ребалансот на буџетот за оваа година, изјави денеска министерката за финансии Гордана Димитриоска Кочоска.

Таа вели дека со ребалансот нема да бидат сменети проекциите за движењето на бруто домашниот производ и инфлацијата.

Владата за ова година проектира дека економијата ќе порасне за 3,7 отсто, оптимизмот го темели на реализацијата на капиталните проекти. За нив во државната каса се преведени 823 милиони евра.

Во основниот буџет владата проектираше дека инфлацијата и натаму ќе забавува и ќе се спушти до 2,2 отсто односно близу до целните два отсто.

Како стојат работите во моментов?

Со буџетот за 2025 година планот беше Владата да потроши рекордни 6,5 милијарди евра (400,2 милијарди денари) што е за 10 отсто повеќе од минатата година.

На приходната страна беа планирани 5,8 милијарди евра (358.838 милијарди денари) или 13 отсто повеќе од лани. Дефицитот во буџетот се проценува дека ќе изнесува четири отсто или 672 милиони евра (41,350 милијарди денари).

Заклучно 12 јуни годинава, за кога Министерството за финансии има објавено последни податоци, собрани се 40.39 отсто од вкупните приходи, а расходите се на ниво од 43.09 отсто.

Реализацијата на капиталните трошоци оди многу побавно и после априлското забрзување во мај повторно активностите замреле. Заклучно со 12 јуни потрошени се само 23.46 отсто од предвидени над 800 милиони евра.

Оптимизам за растот

Владата останува оптимист дека БДП годинава ќе стигне до планираните 3,7 отсто. Според надлежните, просторот за оптимизам го зголемува податокот дека во првиот квартал од оваа година економијата пораснала со стапка од три отсто.

„Бројките се најрелевантниот показател за политиките што ги спроведуваме и претставуваат насока за креирање на политиките во наредниот период. Раст на БДП од 3 отсто и над 3 отсто последователно во три квартали е потврда за нашата политика што ја најавивме за стабилизација на макроекономската состојба и можност да стартуваме со политиките коишто ќе нè водат кон забрзување на економската активност на домашната економија и повисоки стапки на економски раст“, изјави неодамна министерката Димитриеска-Кочоска.

 

Сепак, не се сите оптимисти како власта. Народната банка за оваа година проектираше раст од 3,3 отсто, ММФ смета на раст од 3,2 отсто. Слична е проекцијата на аналитичкиот тим на „Блумберг Адрија“. Нашите аналитичари сметаат дека земјава оваа година ќе забележи економски раст од 3 отсто, иста е и проекцијата на ЕБОР. Светската банка во калкулациите ги става и геополитичките тензии – царинските и војните, па проекцијата ја намали за 2,6 отсто, што е помалку и од лани.

Инфлацијата во мај забрза

Откако на крајот на април завршија мерките за ограничување на маржите на основните прехранбени производи, инфлацијата одново забрза. Во мај годинава во однос на мај лани изнесуваше 3,3 отсто. Според пресметките на Државниот завод за статистика, минатиот месец храната и безалкохолните пијалаци поскапеле за 4,9 проценти.

Кога станува збор за индексите на цени на мало, во мај годинава во однос на истиот месец лани поскапување е регистрирано кај сите категории производи. Најмногу се покачиле цените на земјоделските производи, за 7,6 проценти, прехранбените производи поскапеле за 5,3 отсто, а индустриско-прехранбените производи за 4,5 проценти.

По ова следеше одлуката на НБРМ, каматните стапки да ги остави на ниво од 5,35 отсто.

„На седницата беше оценето дека сегашната поставеност на монетарната политика е соодветна на економските услови, имајќи ги предвид и присутните ризици од надворешното и од домашното окружување. Со ваквата одлука се задржува внимателниот карактер на монетарната политика. Комбинацијата на досегашните мерки — тековните каматни стапки, промените кај задолжителната резерва и применетите макропрудентни мерки — е насочена кон јакнење на ценовната стабилност на среден рок и кон зачувување на стабилноста на девизниот курс на денарот во однос на еврото“, соопшти НБРМ минатата недела.

Во моментов нема коментари за веста. Биди прв да коментира...

Остави коментар