„Енвидија“ (Nvidia Corp.) го презеде „Кумо АИ“ (Kumo AI), четиригодишен стартап што развива основни модели за прецизни деловни предвидувања. Меѓу тројцата соосновачи на компанијата е и Вања Јосифовски од Скопје, кој воедно е и извршен директор на стартапот, како и Јуре Лесковец, словенечки информатичар и професор на Универзитетот Стенфорд, кој во „Кумо АИ“ ја извршувал функцијата главен научник.
Добро утро, ви пишува Владимир Николоски од дигиталната редакција на „Блумберг Адрија“. Подолу петте вести што ги одвоивме за почеток на денот.
Од што најмногу зависат трендовите на пазарите во развој?
Пазарите во развој беа меѓу најсилните глобални пазарни сегменти во однос на приносите минатата година, потврдувајќи го враќањето на интересот на инвеститорите во овој дел од светскиот пазар на капитал. Сепак, почетокот на оваа година беше обележан со значителна нестабилност и геополитичка неизвесност, првенствено преку ескалацијата на конфликтите на Блискиот Исток, што го доведе во прашање продолжувањето на овој позитивен моментум и доминацијата на пазарите во развој.
И покрај ова, неодамна бевме сведоци на посилно закрепнување и бран оптимизам што ги зголемува очекувањата за континуиран раст на овие пазари. Во оваа статија, анализираме кои пазари во моментов го водат растот во рамките на пазарите во развој и кои се клучните фактори што го повторно го поттикнуваат нивниот моментум.
Каде во регионот Адрија е најдобро за водење бизнис? Македонија само пред БиХ, Хрватска на чело
Македонија е на 51-то место меѓу 125 земји во светот според тоа колку квалитетно ги поддржува растот и развојот на претприемачите и нивните компании. Ова го покажува новиот индекс на деловна средина на иноватори (Innovators Business Environment Index – IBEI), воведен во 2026 година од компанијата „Стартапблинк“ (StartupBlink).
Земјава има тотален скор од 57,530 поени во рангирањето, и е на 14-то место од 16 земји во Централна и Источна Европа (ЦИЕ), додека Босна и Херцеговина е последна, со 46,533 поени. Најдобро рангирана во ЦИЕ е Естонија, која е 10-та на глобалната листа, пред Бугарија (18) и Литванија (22). Во регионот Адрија најдобро котирана држава е Хрватска, со вредност на индексот од 64,740, пред Словенија со 62,690, Србија со 57,680 и веќе споменатите Македонија и БиХ. На Балканот, севкупно, Македонија е на седмото место.
Климата почна да ја одредува цената на храната
Летото 2022 година во Европа не остана запаметено само по рекордните температури. Во Шпанија маслиновите насади гореа на 46 степени, северна Италија минуваше низ најлошата суша во последните 70 години, а во Обединетото Кралство производството на пилешко месо падна за девет проценти бидејќи животните тешко ја поднесуваа жештината. Зад тие сцени не остана само штета на полињата, фармите и насадите - остана и трага во цените.
Истражувачите подоцна проценија дека климатските промени го зголемиле просекот на температурите во Европа за 1,25 степени, а на некои места и за 5,7 степени. Екстремната жештина ги зголеми цените на храната во Европа за околу 0,7 проценти, а вкупната инфлација за околу 0,3 проценти. Во годината кога инфлацијата веќе беше поттикната од закрепнувањето по пандемијата и војната во Украина, климата се појави како дополнителен извор на притисок.
Џејми Дајмон лично ќе разговара со богатите клиенти на „ЏП Морган“ за ИПО-то на „Спејс екс“
Главниот извршен директор на „ЏП Морган“, Џејми Дајмон, планира оваа недела да разговара со илјадници клиенти на банката со висока нето-вредност за претстојната иницијална јавна понуда (ИПO) на „Спејс екс“. Ова е дел од невидената национална кампања во координација со раководството на ракетната компанија.
Дајмон ќе биде домаќин на „интерактивна дискусија во живо“ во четврток од седиштето на „ЏП Морган“, според покани видени од „Блумберг“. Со него ќе бидат Мери Калахан Ердоес, извршна директорка на одделот за управување со средства и богатство на банката, како и двајца директори на „Спејс екс“: претседателката Гвин Шотвел и финансискиот директор Брет Џонсен.
Цената на нафтата паѓа откако Вашингтон прогласи примирје меѓу Израел и Либан
Цената на нафтата падна откако условното примирје меѓу Израел и Либан понуди олеснување на патот кон мировен договор меѓу САД и Иран, иако примирјето беше нарушено од тековните судири. Фјучерсите за нафтата ВТИ се тргуваа околу 93 долари за барел, прекинувајќи тридневни добивки.
Сепак, Иран соопшти дека немало напредок во разговорите со САД за привремен мировен договор, додека борбите продолжуваат во Либан и покрај прогласувањето на Вашингтон за прекин на огнот, под услов Хезболах, поддржан од Техеран, да ги прекине непријателствата. Вашингтон и Техеран скицираа рамка за продолжување на нивното примирје за два месеци и повторно отворање на Ормускиот Теснец, но преговорите се во застој и спорадични борби се обновени.
.webp){kind=icon}
