text size
Канадскиот премиер Марк Карни повика на поблиска соработка меѓу Канада и Европската Унија, оценувајќи дека посилното партнерство може да создаде отпорен блок способен да се спротивстави на притисоците од големите светски сили, вклучувајќи ги и САД и Кина, кои би можеле да ги загрозат нивната сувереност и територијален интегритет.
Карни ја поздрави идејата на претседателката на Европската комисија, Урсула фон дер Лајен, Канада да стане првата „придружна членка“ на ЕУ. Таа предложи продлабочување на соработката во производството, технологијата, одбраната и енергетиката, при што Арктикот го посочи како „водечки заеднички проект“. Американскиот претседател Доналд Трамп, пак, се закани со нови царини за ЕУ доколку оцени дека ваквото партнерство е штетно за интересите на САД.
Добро утро, ви пишува Игор Петровски од дигиталната редакција на „Блумберг Адрија“, ова се пет вести за почеток на денот.
Драматичен пад на извозот на катализатори: Што ја чека македонската автомобилска индустрија?
Статистичките податоци покажуваат дека генерално, извозот од земјава е во плус. За јули, Државниот завод за статистика (ДЗС) објави дека споредено со истиот месец лани извозот пораснал над 11 отсто.
Но деталната анализа покажува дека извозот на производот кој со години беше најизвезуван, а тоа се катализаторите кои се користат во автомобилската индустрија, бележи драматичен пад.Во декември лани вредноста на извозот изнесувала 97,8 милиони евра, до јули годинава се стопила на само 1,6 милиони евра.
Што ја вивна цената на бакарот на историски рекорд?
Цената на бакарот моментално изнесува околу 14.000 американски долари по метрички тон, што претставува историски највисока цена досега за овој метал. По падот на цената за време на пандемијата на ковид, кога таа изнесуваше околу 5.000 долари по метрички тон, бакарот бележи биковски тренд сè до денес.
Технолошкиот напредок, развојот на вештачката интелигенција и транзицијата од фосилни горива кон обновливи извори на енергија се меѓу клучните двигатели на растот на побарувачката за бакар. Во секоја од споменатите области, бакарот игра клучна улога, првенствено поради неговите својства како спроводник на електрична енергија.
Како се збогатија тие, а јас не? Пет книги нудат интересен одговор
Како некои од една добра идеја стигнуваат до милиони, а други цел живот работат, штедат и инвестираат без никогаш да му се приближат на големото богатство? „Како се збогативте?“ е едно од оние прашања што веројатно е непристојно да му се постави речиси секому - освен, можеби, на луѓето што веќе се многу богати.
Токму тоа прашање речиси пред една деценија канадската комичарка Кетрин Рајан им го поставувала на милионерите во серијалот „Како се збогативте?“ (How’d You Get So Rich?), кој моментално е достапен на „Прајм видео“ (Prime Video).
Нова верзија на ЧетГПТ им ги мати сметките на фриленсерите
„Опен еј-ај“ (OpenAI) на 3 септември го претстави ГПТ-6 Астра (GPT-6 Astra), модел на кој му се припишува способност самостојно да користи компјутер како човек. Четири дена подоцна компанијата „Хигсфилд“ (Higgsfield) ја поврза таа способност со ААЕ (Adobe After Effects), програма што професионалците ја користат за видеоанимација.
Со ова се покажа како агент, програма што самостојно ја извршува задачата наместо човек, во рамките на разговор со ЧетГПТ креира анимации директно во отворен проект. За голем број фриленсери и мали креативни тимови во регионот што токму таков вид услуги им продаваат на странци, ова е значајна промена во работата што ја извршуваат секојдневно.
„ЏП Морган“ веќе не знае како да прогнозира околу нафтата – не се гледа крајот на војната со Иран
По повеќе од шест месеци од почетокот на војната со Иран, аналитичарите за нафта на „ЏП Морган“ (JPMorgan Chase & Co.) го потврдуваат она што многу трговци приватно го говорат веќе некое време: патот кон крајот на војната станува сè потежок за предвидување.
Неколку економски „црвени линии“ за кои банката претпоставуваше дека американската администрација нема да сака да ги премине — вклучително и порастот на цената на нафтата над 100 долари за барел, цените на бензинот кои се приближуваат до 5 долари за галон и наглиот раст на приносите на државните обврзници — веќе се случија, што ја прави стратегијата за излез помалку јасна, наведоа аналитичарите.
.webp){kind=icon}
