Јапонија ја крена каматата на 1,25 отсто, зголемувањата најбрзи од 1990 година

Банката на Јапонија ја зголеми референтната каматна стапка, забрзувајќи го темпото на зголемувањата до највисоко ниво во последните 36 години, во услови на растечки инфлациски ризици и невообичаено експлицитни повици од Вашингтон за натамошно нормализирање на монетарната политика.

Банката на Јапонија во петокот, на крајот од дводневниот состанок, ја зголеми основната каматна стапка за четвртина процентен поен, на 1,25 отсто, се наведува во нејзиното соопштение. Потегот го предвидоа сите економисти анкетирани од „Блумберг“. Одлуката беше донесена со седум гласа „за“ и два „против“, при што членовите на одборот Тоичиро Асада и Ајано Сато гласаа против.

Јенот ослабе на 156,95 за долар по широко очекуваниот потег, бидејќи во соопштението немаше јасни знаци за поостар тон што би ги поттикнал обложувањата на раст на јапонската валута.

Bloomberg Mercury

Потегот, кој доаѓа само три месеци по претходното зголемување на Банката на Јапонија, го означува најкраткиот интервал меѓу две зголемувања на каматните стапки од 1990 година, кога брзото заострување на монетарната политика на централната банка одигра клучна улога во пукањето на јапонскиот балон на цените на средствата. Ова беше шесто зголемување на каматите под водство на гувернерот Казуо Уеда - најмногу од кој било гувернер на Банката на Јапонија во последните најмалку половина век и уследи по бранот притисоци од американскиот министер за финансии Скот Бесент за зголемување на каматите.

Забрзаното темпо на зголемување на каматите на Банката на Јапонија доаѓа по промената на глобалното опкружување за монетарната политика, бидејќи надлежните институции се справуваат со последиците од војната во Иран. Федералните резерви ја нагласија промената во средата со првото зголемување на каматите во последните три години, а најавија и уште еден таков потег подоцна годинава, додека Европската централна банка минатата недела ги зголеми каматите по вторпат годинава.

Најновото зголемување во Јапонија е првпат Банката на Јапонија, Фед и ЕЦБ да ги зголемат трошоците за задолжување во ист месец. Синхронизираните потези покажуваат и колку далеку стигна Банката на Јапонија од својата долгогодишна позиција на исклучок во глобалната монетарна политика.

Зголемувањето не беше големо изненадување откако низата изјави на Бесент помогна да се зацврстат пазарните очекувања за таков потег.

Иако јенот ослабе во однос на доларот непосредно по објавата, тој и натаму е посилен отколку во јули, откако координираната интервенција на САД и Јапонија на крајот од тој месец помогна дополнително да се оддалечи од најниското ниво во приближно 40 години од 163,99 јени за долар, достигнато на 23 јули.

Банката на Јапонија го повтори ставот дека ќе продолжи да ги зголемува каматите доколку се остварат нејзините прогнози за економијата и цените. Со 1,25 отсто, основната каматна стапка првпат би се нашла во долниот дел од проценетиот распон на банката за неутралната каматна стапка, односно ниво што не се смета ниту за стимулативно ниту за рестриктивно.

Повторените изјави на Бесент во прилог на дејствување на Банката на Јапонија во пресрет на состанокот на одборот помогнаа да се засилат очекувањата за зголемување на каматите, при што до почетокот на септември потегот беше речиси целосно вграден во пазарните цени. На средбата лице в лице со Уеда во Северна Каролина минатиот месец, Бесент изразил „силна поддршка“ за решителните чекори на Јапонија за справување со слабеењето на јенот, соопшти американското Министерство за финансии.

Инфлацијата во Јапонија се очекува да остане над целта на Банката на Јапонија

Извор: The Ministry of Internal Affairs and Communications, BOJ, Bloomberg

 

Клучниот показател за инфлацијата во Јапонија остана над два отсто четврта година по ред заклучно со 2025 година, а Банката на Јапонија очекува инфлацијата и во следните години да остане над нејзината цел. Податоците објавени претходно во петокот покажаа дека базичната инфлација благо забавила во август, делумно поради нарушувањата предизвикани од субвенциите. Аналитичарите очекуваат растот на цените да забрза кон три отсто до почетокот на следната година.

Уеда треба да ги објасни причините за одлуката донесена во петокот и насоката на движење на каматите во следните месеци на прес-конференцијата, која вообичаено почнува во 15:30 часот.