.webp){kind=icon}
Дигитализацијата е вистински предизвик за компаниите, особено одлуката да се одбере соодветната технологија со која компаниите ќе го унапредат своето работење и, секако, ќе обезбедат раст. „Поскапо е да не направите отколку да ја спроведете дигитализацијата во компанијата“, вели Димитар Јаневски, продукт-менаџер во „Дигитал офис инбокс“. Тој сепак додава дека ако една компанија вовела некоја дигитална алатка, не значи дека треба да застане тука, туку дигитализацијата е процес што треба да се следи и менува константно.
Димитар Јаневски (ТВ-гостување)
Bloomberg Adria
„Еден едноставен пример со воведување дигитална архива е ако правите анализа дека ќе заштедите од тонер и хартија, никогаш нема се случи тоа. Но добивате можности, како што е информација на дофат, за неколку секунди да добиете потребен документ во вашиот мобилен телефон, отворате нови канали за продажба, за потпишување договори. Едноставно, вашиот имиџ се подобрува и тоа се бенефиции што ги носи дигитализацијата. Едноставно, дигиталната денешница сама по себе е комплексна и кога зборуваме за таквата комплексност, ако не си дигитален, ти си надвор од игра, никој не те игра, ниту партнерите ниту клиентите“, вели Јаневски.
Во однос на технологијата, Јаневски смета дека истата таа е многу достапна и лесно е да се одбере.
Сепак, тој смета дека пречките за дигитализација на компаниите лежат во приоритетот, желбата и менаџментот.
„Секако, имаме и недоволно разбирање на дигитализацијата и некои компании стигнале до некоја фаза, односно имале една имплементација или презеле некоја алатка и сметаат дека завршиле. Но тоа не доволно“, вели Јаневски и нагласува дека треба константно да се работи на дигитализација.
Тој смета дека имаме добра основа во однос на поставеноста на регулативата, но додава дека сега работата е застаната и дека треба да се приспособат одредени прописи за да има помалку нејаснотии, а за многу кратко време, ако има волја, тоа може да се среди и да се забрза дигитализацијата како во јавниот така и во приватниот сектор.
