Брзиот пристап до разбирливи климатски податоци важен за бизнис-секторот

Компаниите во Македонија стануваат свесни за заканите од климатските промени, особено во изминатиот период, кога низ целата држава беснеат пожари, вели во интервју за „Блумберг Адрија“ Горјан Јовановски, директор и соосновач на платформата „Ерткер.аи“ (EarthCare.ai), која нуди софтверски решенија за управување со ризиците од климатските промени. Јовановски додава дека идејата за платформата „Ерткер.аи“ е да се доближат климатските податоци за пожари, поплави и земјотреси кон луѓето што не се експерти на темата, но можат да ги искористат овие податоци.

Во описот на платформата е наведено дека тоа е најпристапната платформа за климатска интелигенција во светот направена за да ги трансформира сложените климатски податоци во разбирливи и активни увиди на секое ниво на донесување одлуки. Таму се додава и дека лошите временски услови предизвикуваат штети од над 300 милијарди долари годишно на глобално ниво. Сепак, поради големиот обем и тешката пристапност на овие податоци, 95 отсто од деловните одлуки се носат без да се земе предвид климата.

Блумберг Адрија ТВ

„Платформата дава не само историски податоци туку и што да очекуваме во иднина со зголемувањето на температурите и на сушите, кои стануваат сè почести овие појави, па добро е да знаеме каде повеќе би се случувале тие пожари за да може да ги превенираме однапред, а не да реагираме откако тие ќе се случат“, вели Јовановски.

Идејата на платформата, според Јовановски, е да ги доближи овие податоци до секој што носи битни одлуки во бизнисот, но додава и дека бизнисите мора да почнат уште денес да планираат, вклучувајќи ги климатските податоци во своите одлуки што ги носат на секојдневно ниво доколку сакаат да бидат добро заштитени.

„Ова не е трошок, трошокот ќе биде поголем ако настане штета од климатската криза“, вели Јовановски.

Ако во бизнис-стратегијата не се планираат ризиците од климатските промени - врз основа на податоци и информации што се релевантни, тогаш секако штетите ќе бидат многу поголеми од она што би било трошок за да се дојде до овие податоци, бидејќи може да биде поплавена некоја фабрика или, не дај боже, да има човечка жртва.

Веќе во првата недела се јавиле повеќе од 50 компании што сакаат да испитаат како функционира платформата.

„Има многу сектори што се директно засегнати од овие промени“, вели Јовановски.

Јовановски објаснува дека дури и Центарот за управување со кризи е заинтересиран за платформата „Ерткер.аи“.