Бидејќи туристите се подготвени да потрошат рекордна сума на патувања годинава, треба да пукаме високо - затоа што дефинитивно нема да останете дома.
ЗЕМЈИ АВАНТУРИ
● Преминете ги границите на 21 век на Маркиските Острови
Замислете за миг дека Арктикот и Антарктикот не се последните големи неистражени области на нашата планета. Пространството во срцето на Јужен Пацифик, кое некогаш било под радарот, се наоѓа 1.600 километри западно од Тахити, каде што неколку расфрлани острови ги кршат брановите. Како врвовите на Тахити на стероиди, планините на Маркиските Острови се всушност остатоци од вулкани што еруптирале одамна, а нивните карпести испакнатини и врвови сега се во центарот на вниманието на многубројните објави на Инстаграм, кои предизвикаа процут на туризмот. Свен-Олоф Линдблад, кој стана познат по крстосувањето на половите, сега има нова опсесија - Јужен Пацифик. (Тој дури и ја напушти функцијата извршен директор на компанијата „Линдблад експедишнс“ во 2021 година за да се фокусира на овој регион.) Сега тој планира патувања околу Маркискиот архипелаг со својата приватна јахта, „Ханс експлорер“, долга речиси 50 метри. Јахтата треба да им помогне на научниците и истражувачите што спроведуваат студии за зачувување на океаните. Кога не се користи за научни цели, богатите гости можат да ја изнајмат и сами да го откријат тој скриен свет: тоа е единствениот приватен брод што има маршрута фокусирана токму на Маркиските Острови.
„Линдблад експедишнс“, во партнерство со „Нешнл џиографик“, ги пренасочува своите бродови кон Јужен Пацифик, додавајќи расфрлани острови на своите маршрути во 2023 година. Неколку меѓународни крстосувања исто така ќе ги вклучат и Маркиските Острови и така ќе им овозможат на патниците да ја искусат дестинацијата што инспирирала голем број од делата на Пол Гоген, без разлика дали при пешачење до осамените плажи со црн песок или за време на јавање низ џунглата.
Во декември на островот Нуку Хива ќе се врати маркискиот фестивал на уметноста и културата, кој се одржува еднаш на четири години. Посетителите ќе можат да видат како Полинезијците патуваат илјадници милји за да вежбаат хака (воен танц), да ловат дивеч и да се тетовираат.
● Талкајте низ Нов Зеланд како харфути
По повеќе од две години пауза за време на пандемијата, Нов Зеланд им нуди на аутсајдерите шанса да ја доживеат авантурата на својот живот на дното на светот. Нескротената природна убавина на земјата, која можете повторно да ја видите на екранот во серијата „Прстени на моќта“ на платформата Амазон прајм видео, најдобро може да се доживее за време на 10 големи прошетки, кои траат од три до пет дена.
Секоја од нив претставува единствено искуство во различен дел од островот, а заедно опфаќаат пејзажи од вулкански висорамнини до златни плажи и планински венци покриени со снег. Најпопуларна е патеката Милфорд, четиридневно талкање (како што го нарекуваат тоа на локалниот сленг) на западната страна на Јужниот Остров, кое кривули низ бујна дождовна шума, преку планински премин, па до Милфорд Саунд, фјорд што настанал кога морето ја потопило глацијалната долина. Англискиот писател Радјард Киплинг го прогласи тој фјорд за осмо светско чудо. Прошетките, кои ги предводи Одделот за конзервација, често треба да се резервираат со месеци однапред, а секоја патека има кампови или колиби со заеднички соби на кат и кујна, кои чинат 4.000 денари за една ноќ. Има и сместувања што овозможуваат поголема приватност и кои не се толку рустикални, но по значително повисоки цени.
Можете и целосно да ги прескокнете патеките и да ѝ се придружите на винската компанија „Инвиво“ на првиот лет од Окленд до Квинстаун, каде што во воздухот ќе се дегустираат осум различни вина.
● Откријте го Непал без да го напуштите комфорот
Храмовите со златни покриви и врвовите на Хималаите покриени со снег веќе долго му ја даваат на Непал централната улога во легендите на патниците. Повеќето богати туристи директно се искачуваат на Монт Еверест за околу 2,2 милиони денари, но тоа ќе се промени сега кога „Маунтајн лоџис оф Непал“, неодамна ребрендираната група за сместување од висока класа, има намера да го промовира луксузниот туризам во сите делови на земјата.
Групата на сместувачки капацитети се протега од работ на националниот парк Читван во центарот на земјата до динамичниот планински венец Махалангур Химал, кој вклучува четири од шесте највисоки врвови во светот. Другите колиби се расфрлани по бујните долини на Анапурна. Некои од нивните имоти, меѓу кои и „Факдинг лоџ“, постојат повеќе од една деценија, но ќе бидат реновирани од глава до петици со помош на комбинација на непалските архитектонски обележја, како што се топла шума и ткаење со модерни елементи. Тоа вклучува и нов ресторан изграден на поранешниот хелиодром на хотелот, кој ќе служи храна од фармата. Други, како што е „Дебош лоџ“ на висина од 3.820 метри, кој треба да се отвори во последниот квартал од 2023 година, ќе бидат изградени од темел.
Крунскиот скапоцен камен, сепак, ќе биде „Шинта Мани Мустанг“. Во зафрлениот регион Горен Мустанг, на работ на Тибет, ова ол-инклузив одморалиште со 29 апартмани, инспирирано од традиционалните тибетски куќи и фосилите од амонити од периодот јура, пронајдени околу блиските речни корита, ќе биде отворено во мај. Околните експедиции вклучуваат обиколки на „небесните пештери“ насликани со будистички фрески по должината на реката Кали Гандаки и повеќедневни прошетки со повремен престој во привремените хотелски соби на „Шинта Мани“.
Bloomberg Businessweek
● Дружете се со слонови и човеколики мајмуни во Исан
Североисточниот регион на Тајланд е збир на заспани рурални провинции, кои повеќе се слични на Лаос отколку на главниот град Бангкок. Областа никогаш не го добила признанието што го имаат планинскиот север на земјата или плажите на југот, но тоа полека се менува сега кога угостителската сцена добива големо внимание на глобално ниво.
Во Као Јаи, најстариот национален парк во Тајланд и зелената порта на регионот населен со слонови, дизајнерот на хотели Бил Бенсли работел на необичниот изглед на новиот „Интерконтинентал“. Со ѕидните полици за багаж и нерамните тавани, 45-те соби на хотелот имитираат луксузни кабини за воз, додека 16 апартмани и француски ресторан се сместени во вистински вагони спасени од депониите низ земјата.
Во близината, новиот хотел „Мараска Као Јаи“ е исто толку необичен. Отседнете во сафари-шатори или преуредени комбиња „фолксваген Т2’, опремени со сопствена скара и џакузи. Двете опции се одлична појдовна точка за деновите што ќе ги поминете во истражување на паркот, барајќи слонови, човеколики мајмуни и месечеви мечки (о, боже!) меѓу бујните смарагдни ридови и заплиснувачки водопади.
Лутата кујна во регионот дебитира во изданието на тајландскиот водич на „Мишлен“ за 2023 година, кој ја препозна вредноста на некои од главните потпори на Исан, вклучувајќи го и „Сомфит лаб Сомфит“ во градот Након Рачасим, кој е авторитет за ларб-салата, како и „Каи Јанг Рабеаб“ во Кон Кен, чиј специјалитет е пилешко месо на скара. Во водичот исто така се споменува и врвниот ресторан „Самурај енд сонс“ во Удон Тани. Шефот на кујната Веерават Нум Тријасенават, тајландскиот Рене Реџепи, во менијата вклучува често заборавени локални состојки, како закиселени бамбусови фиданки и ракови на пареа. Искусните гурмани резервираат маси во неговиот ресторан неколку недели однапред.
РАСКОШ НА МОРЕ
● Играјте голф и блеснете во Света Луција
Света Луција е одговорот на Карибите на речиси сè што можете да посакате на одмор: авантура, романтика, природа, култура, кујна - островот има сѐ. Тоа се докажа во текот на минатата година, кога туризмот закрепна, па дури и ги надмина претпандемиските нивоа. Само во јули пристигнале рекордни 39.000 посетители. Патниците пешачеле по бујната вулканска планина Питон, се опуштале на плажите со бел песок и уживале во јадења во кои се помешани вкусовите на карипската, индиската, американската и европската кујна. Групата врвни одморалишта на Света Луција им ги нудат на туристите потребната релаксација и закрепнување.
Годинава сигурно ќе има многу повеќе посетители, бидејќи новите отворања и иницијативи помагаат островот да закрепне. Одморалиштето „Кабот Сент Луција“ ќе се отвори на полуостров од 375 хектари на островот Грос. По две години, креаторите на познатото голф-одморалиште „Кабот Кејп Бретон“ во Нова Шкотска ќе отворат уште еден терен во март; имотите, гостинските вили, рестораните и велнес-понудите ќе следуваат подоцна, во текот на 2023 и 2024 година. Долгоочекуваното деби доаѓа откако „Вајсрој ресорт“ минатата година свечено го отвори одморалиштето „Шугар бич“ во лагуна опкружена со стрмни планини и 100 хектари заштитена прашума. Плажата беше затворена пет месеци, но потоа гостите ги пречекаа нови бунгалови на плажа, бар и освежителен базен. (Закажете пилинг и масажа во куќичка на дрво во прашума - тоа ќе ѝ даде сјај на вашата кожа, но и ведрина на вашиот дух.)
Туристичката управа на Света Луција ги кани патниците да истражат и поинтимно и поексклузивно сместување на островот преку новата програма „Колекшн де Пепитес“. Програмата вклучува луксузни вили и имоти како што е „Работ хотел“, еколожа со 25 соби што се наоѓа на фарма со какао од 140 хектари, со поглед на планината Питон.
Bloomberg Businessweek
● Придружете се на џетсет-забава во Панама
Во 1914 година сите очи беа вперени во тесната Панама кога се отвори нејзиниот истоимен канал, со што Панама Сити стана новата раскрсница на Америка. Некогаш во заднина, градот растеше и одненадеж стана космополитска дестинација благодарение на приливот на луѓе од Европа, Индија, Кина и Карибите, кои помогнаа во изградбата на каналот.
Повеќе од 100 години подоцна, престолнината го задржа живиот мултикултурен дух, а Панама Сити конечно почнува да го привлекува вниманието што го заслужува, особено на меѓународната кулинарска сцена. Се истакнуваат „Мајто“, софистициран ресторан што користи автохтони состојки и панамски вкусови, како и „Фонда Ло Кве Хеј“, кој на традиционалното збиралиште покрај патот му дава шмек и моден пресврт.
Двата големи хотелиери „Акор СА“ и „Хајат корп“ се сместиле во градот, секој со своја понуда во луксузното портфолио: „Софител легенд каско Виехо“ и „Хотел ла компанија“, по тој редослед. Двата се лоцирани во областа на стариот град, под заштита на УНЕСКО, која ги спојува историските булевари со возбудливиот ноќен живот. Совршено се совпаѓаат со сѐ поголемиот број одморалишта што ги опкружуваат исклучителните плажи на Панама. Имотите како „Бокас Бали“, со надводни бунгалови и бамбусови куќички на дрвја што наскоро ќе им бидат достапни на посетителите, можат да им парираат на класичните одморалишта на соседна Костарика.
Припадниците на џетсетот масовно пристигнуваат откако меѓународниот аеродром воведе неколку нови директни летови од САД. Во меѓувреме, „Копа ерлајнс“ повторно ја отвори програмата за застој на патувањата (анг. layover), која ги охрабрува патниците да останат во Панама Сити неколку дена без дополнителен надомест.
● Олабавете се на плажата Транкосо во Бразил
Шпанката Марта Тучи во 2020 година била испратена на фотографска задача во Транкосо, шик гратче на плажа, кое се наоѓа на брегот на Баија, Бразил, околу 1.000 километри северно од Рио де Жанеиро. „Се заљубив во местото првата недела“, вели таа од градот што сега таа и нејзиниот сопруг, кој се занимава со недвижности, го нарекуваат дом.
Парот не е единствениот. Во 1970-тите и 1980-тите ова село било познато како контракултурно засолниште за време на бразилската воена диктатура. Се трансформирало кога луѓето од модниот свет пред околу 15 години таму изнајмиле куќи што се наоѓаат околу централниот плоштад. Боб Шевлин и неговиот партнер Вилберт Дас, поранешниот креативен директор на „Дизел“, беа пионери. „Првата куќа што ја купивме на градскиот плоштад - во 2006 година? - немаше стаклени прозорци“, се сеќава тој, истакнувајќи дека некое време спиеле на подот. Двојката го отвори „Уксуа каса хотел енд спа“ во 2009 година, магнет за Бијонсе и Леонардо ди Каприо.
Шевлин вели дека Транкосо претрпело уште една радикална промена во последните две години: луѓето како Тучи брзаат да се населат долгорочно во ова шик приморско скривалиште. Многумина од меѓународните пријатели на Шевлин поминуваат значително повеќе време таму отколку пред пандемијата. Порастот на бројот на жители што на островот ја поминуваат целата година донесе некои други погодности, иако тие одамна беа достапни во луксузната продавница за деликатеси „Емпорио ле Марше“, која продава увезени производи, како сирење азијаго и мортадела. „Нексо бранч енд кофи бар“, на пример, го води млада Бразилка, која е нутриционистка, заедно со сопругот. Наскоро ќе се отвори уште едно кафуле, „Кафе На Праса“. Тука е и „Сао Жоао Батиста бургер енд пица“, каде што хамбургерите се печат во домашно опкружување.
Сепак, селото сè уште има некој сонлив, опуштен шарм. „Навистина се надевав дека ќе најдам место каде што ќе можам да останам малку подолго“, вели Тучи за животот овде. „Нигде не брзаме.“
● Плискајте се со децата во морето на Брегот на Слоновата Коска
Оваа нација од француското говорно подрачје со плажи на Атлантикот, густи шуми и облакодери е следната на листата на атракции во Западна Африка. (Гана ќе мора да се помести.) Од 2017 до 2019 година, пристигнувањата на странски туристи во Брегот на Слоновата Коска растеа со просечна годишна стапка од 7,2 отсто, достигнувајќи два милиони посетители. Тогаш владата на Брегот на Слоновата Коска го започна својот план „Сублајм Кот д’Ивоар“, чија цел е до 2025 година да доведе четири милиони туристи годишно.
Новиот стадион со 60.000 седишта се вклопува во таа амбициозна визија, а треба да се отвори навреме за да ги прими посетителите на фудбалскиот турнир на Африканскиот куп на нации што ќе се одржи во јануари 2024 година. „Аероците“, проект вреден 88 милијарди денари што ќе биде преземен во наредните неколку години, ќе го прошири меѓународниот аеродром и ќе создаде урбан комплекс со луксузни хотели, аквапарк, апартмани и простори за настани.
Абиџан, влезната точка во земјата, е комерцијален град со поглед на лагуната каде што полека се отвораат бутик-хотели со пет ѕвезди. „Ла мезон Палмер“, првиот хотел на „Мериот“ во Западна Африка, има восхитувачки арт-деко дизајн, бујни градини покрај базенот и ресторан што ги комбинира локалната и француската кујна и го привлекува богатото локално население. Во „Ноом хотел Абиџан плато“ во деловниот кварт можете да се опуштите во огромен базен со поглед на лагуната Ебри или ноќе да уживате во погледот на облакодерите во Абиџан од „Скај барот“. „Софител“, имот изграден во 1960-тите како еден од првите модерни хотели во Африка, беше реновиран во 2019 година и исто така вреди да го посетите.
За да избегате од градскиот метеж, возете се 20 минути со чамец до модерното одморалиште „Булеј бич ресорт“ во Иле Булеј. Сепак, не пропуштајте да ги посетите опуштените градови на брегот на Атлантикот, кои се совршени за семејства. Во Сан Педро изберете ги „Ла мезон ду солеј“ или хотелот „Еден Рок Ивоар“. Во летувалиштето Асини-Мафија, хотелот „Куку лоџ“ е популарно бегство за викенд. Застанете на пазарот Гранд Басам на патот за да пробате „чоукуја“, маринирано и месо на скара со кромид и со домати што се приготвува на улица.
Bloomberg Businessweek
ТОЧКАТА КАДЕ ШТО УМЕТНОСТА СЕ ПОВРЗУВА СО ИСТОРИЈАТА
● Отпатувајте во (далечното, далечното) минато во централна Џорџија
Мејкон зазема клучно место во историјата на американските Индијанци и Афроамериканците, а на прославата на двестегодишнината во 2023 година градот е подготвен да ви понуди сè. Националниот историски парк Окмалџи Маундс е праисториско место на брегот на реката каде што народот Мускоги живеел повеќе од 12.000 години. Со повеќе од 2.000 артефакти на американските Индијанци и 10 километри патеки, се очекува да биде прогласен за прв национален парк во Џорџија кога наскоро ќе заврши тригодишната федерална ревизија.
Во историскиот центар на градот можете да престојувате во бивша банка што е претворена во хотел „Форти фајв“ со 94 соби, дел од колекцијата на „Мериот Бонвој“. Тука е и хотелот „Вудворд“, именуван по дедото на сопственикот, професор по англиски јазик - во неговите девет луксузни соби очекувајте книги од јужната литература. Хотелот се наоѓа во уличка опкружена со живи локални ресторани и има поглед од терасата на покривот. Кулинарската сцена на градот е дом на повеќе од десет ресторани во сопственост на Афроамериканци, како што се институцијата на Мејкон за храна за „душата“, ресторанот „Ејч енд ејч“, и омилената гостилница за скара од растително потекло „Саутерн веган соул кафе“.
Корените на поп-музиката на Мејкон може да се најдат во „Каприкорн саунд студиос енд мјузеум“, кој во спомените ја чува издавачката куќа на Отис Рединг, Ал Грин и браќата Алман. Опра веќе го почувствува шармот - таа била забележана овде додека го продуцирала римејкот на мјузиклот „Бојата на пурпурот“. Мјузиклот се снимаше низ градот, а треба да излезе во декември.
Bloomberg Businessweek
● Разгледајте го модерниот Единбург
Главниот град на Шкотска, кој е лесно препознатлив по готската архитектура, сивите облаци и изобилството писатели, остава силен впечаток на старомодност. Сепак, неколку хотели им вдахнаа нов живот на старите згради. Градската куќа „Глениглс“, продолжение на нејзиниот сестрински имот во Пертшир (основан во 1925 година), по долго чекање беше отворена во јуни, со 33 соби во рамките на историската британска банка за лен во Стариот град. Внатре, оригиналните камини и дрвените ѕидови се во контраст со модерните уметнички дела на локални уметници и необичните тапети „туал де жуи“. Наскоро му се придружи и „Вирџин хотелс Единбург“ со 222 соби, уште еден проект на реставрација - овој личи на индиските згради од средината на 19 век, со сјајот и темноцрвената боја по кои е познат брендот. Хотелскиот бар и ресторан „Комонс клаб“ е ода на шкотскиот шпајз со сезонска кујна, а барот на покривот нуди свеж поглед на хоризонтот на градот.
Оваа зима, „Вирџин хотелс Единбург“ со 214 соби ќе биде дел од проектот за развој на недвижности на компанијата „ТХ риал естејт“ од 1,7 милион квадратни метри, што ќе донесе нови продавници, ресторани и забавни содржини во луксузниот кварт Сент Џејмс. Сепак, летото го носи најдоброто во градот: единбуршкиот „Фринџ“, најголемиот уметнички фестивал во светот, кој ќе трае во поголемиот дел од август. Точно навреме ќе се отвори улицата 100 Принцес стрит, поранешен дом на друштвениот клуб на „Овер-сис лиг“ (посветен на меѓународното пријателство и разбирање), кој ќе ѝ оддаде почит на шкотската традиција и ќе донесе модерен изглед инспириран од Александар Меквин и услугата „каде било, кога било“. Британскиот бренд „Хокстон“ исто така ќе отвори имот со 211 соби во 10 поврзани градски куќи од 18 век во областа Хејмаркет.
Bloomberg Businessweek
● Разгледајте ги врвните уметнички дела во Осло
Норвешката престолнина минува низ период на тивка ренесанса. Реновирањето на областа Соренга во изминатата деценија го претвори старото пристаниште во едно од најпопуларните градски капалишта, на само неколку чекори од архитектонски неверојатната опера во Осло, која ја дизајнирале норвешките архитекти ѕвезди од фирмата „Снохета АС“. Заедно со музејот „Аструп Фернли“, градскиот музеј за модерна уметност, брегот е и новиот дом за националниот музеј во земјата. Во него има простор за 6.500 уметнички дела - двојно повеќе од претходно - вклучувајќи го и „Вресок“ на Едвард Мунк.
Пандемијата предизвика пустош во хотелите и баровите во Осло, но тоа остави простор за голем број возбудливи учесници да излезат на сцената сега. Меѓу нив, во еден од најстарите квартови на Осло, се наоѓа и хотелот „Сомеро“. Сместен во поранешното седиште на градското претпријатие за електрична енергија, има три бара и пет ресторани.
Градот служи и како појдовна точка за истражување на норвешките планини и фјордови. Иновативните сместувања во кои може да отседнете, како што се стаклените модерни згради на хотелот „Јувет лендскејп“, се сместени над реки и ридови покриени со мов во северозападна Норвешка - во „Ундер“, ресторан на јужниот брег, гостите ручаат пет метри под површината на Северно Море.
● Повторно откријте ги кралските реликвии во Мадрид
Иако долго време беше здодевната сестра на Барселона, која се наоѓа на брегот на морето, Мадрид полека ја губи репутацијата на политички центар и станува омилена дестинација за туристите сега кога европскиот туризам повторно заживеа. Не само што има малку странски туристи туку има исто толку погодности на голем град како Лондон, Париз и Рим - вклучувајќи и некои од најдобрите музеи во светот, декадентна сцена со храна и пијалаци, како и централен парк што може да се натпреварува со њујоршкиот.
Вчудовидувачките реновирања на „Мондријан Ориентал Риц“ и „Мериотс едишн“ беа завршени во последните две години, што ги спаси од пропаѓање историските згради што личат на палати. Во другиот новоотворен хотел „Фор сизнс“, познатиот андалузиски готвач Дани Гарсија ги презеде внатрешниот и надворешниот простор на ресторанот со поглед на градот. Неколку минути понатаму, неговото мени „огнено омакасе“ во „Смоукд рум Мадрид“, за кое користи ароми на пареа и јапонски методи на готвење за да ги нагласи домашните производи, освои две ѕвезди „мишлен“ минатата година - и тоа само по шест месеци работа.
Исто така има и простори во кои работат искусни независни готвачи што одат понатаму од тапас и ибериска шунка во обид да ги предизвикаат предрасудите за локалните вкусови. Во ресторанот „Бугао“ - самопрогласената „кујна меѓу морињата“ - готвачот Хуго Руиз служи креативни јадења со морски плодови од Гибралтарскиот Проток.
ПРИРОДНИ ПРОСТРАНСТВА
● Истражете ја поубавата страна на Мејн
За Американците, посетата на „државата на елките“ е како патување во странска земја. Единствената географска мешавина на нерамни камени плажи, езера сини како луња и далечни планини што изгледаат како врвови на елка ја карактеризира оваа земја. Локалната кујна, свежа морска храна дополнета со зеленчук и зрнесто овошје од фарма, е позната и надвор од нејзините граници. Тука е и општата тишина, која ќе ја најдете во шумата, на водата и, често, меѓу луѓето со стоички карактер што живеат таму. Едрење, планинарење, скијање, возење со кану, риболов, лов и висечки лежалки се меѓу безбројните активности за опуштање што ги сакаат локалното население и посетителите.
Со други зборови, тоа е бегството од урбаниот живот за кое сонуваме, па местото стана попопуларно од кога било во изминатата деценија. Портланд, кој веќе е преполн со ресторани, додаде уште неколку на листата во текот на изминатата година, вклучувајќи ги „Твелв“, трпезаријата на поранешниот готвач на „Илевн Медисон парк“, Колин Вајат, и „Данфорт, коктел-бар од тимот на компанијата „Дет енд ко“. Пространиот бар на покривот „Луна“ исто така придонесе за ноќниот живот во градот со прекрасен поглед на пристаништето од новиот хотел „Канопи бај Хилтон Портланд вотерфронт“. Источно (или покрај брегот, како што велат во Мејн) на огромниот остров Дир Ајл, готвачот Девин Финиган создаде романтична атмосфера во ресторанот „Арагоста ет Гус Ков“, кој беше отворена во 2019 година. Гостите исто така можат да отседнат во една од 12-те викендички и апартмани и да вкусат локална морска риба лист, јастог, остриги, морски алги и да вечераат во стакленик што се наоѓа на вода. (Постои „хепи ауар“ само за јадење во ресторанот од понеделник до среда.)
Ако барате нешто модерно, модниот дизајнер Тод Снајдер го продолжи своето партнерство со одморалиштето „Хиден понд“ во Кенбанкпорт и дизајнираше 20 еднособни бунгалови во примамлив рустикален стил. Додека сте таму, повозете се со чамец, закажете ЦБД-масажа во спа-центар или едноставно опуштете се на плажа. Некои имаат дури и песок!
Bloomberg Businessweek
● Ослободете се од стресот на островот Кјушу
Третиот по големина остров во Јапонија, крунисан со соѕвездие од сè уште активни вулкани, е поврзувачката точка на многуте карактеристики на земјата. Чудесната екологија на Кјушу негува исклучителна култура на уникатно овошје и зеленчук, вклучувајќи и волшебни цитрусни овошја, како кисело „кабосу“, слатко-кисело „хјуганацу“ и џиновско жолто „банпеију“. Во почвата има толку многу минерали што дивите шуми се инспирација за земјите од бајките во аниме, како што е онаа во „Принцезата Мононоке“ на студиото „Гибли“. Тонкотсу рамен, сега широкораспространет во Америка, е роден во областа Хаката; залејте го со сочу или саке, пијалаци што се прават од ориз, сладок компир и јачмен. Националната страст за керамика ги претвора градот Арита и неколку други мали градови во точки од кои тргнува аџилак.
Културата онсен во оваа земја (капење во топли извори) најдобро се доживува овде, во пенливите одморалишта како „Бепу“. Новите маршрути за брзи возови „шинкансен“, отворени кон крајот на 2022 и во 2023 година, ви олеснуваат да стигнете до скриените селца и приморските села на Кјушу, каде што никнуваат нови „риокани“ или јапонски гостилници. Луксузниот велнес-бренд на одморалиштата Хошино, „Каи“, неодамна се прошири на планината Унзен и во Јуфуин со одморалиште дизајнирано од Кенго Кума. Наскоро ќе биде отворен и новиот „Риц-Карлтон“ во Фукуока. Малото ултралуксузно одморалиште „Тенку но Мори“ е отворено во шумата непосредно пред Киришима со онсени во секоја викендичка и предупредување на веб-страницата дека кодексот на облекување е „без облека“.
Bloomberg Businessweek
● Почувствувајте делче од африканскиот длабок југ
Замислете јужноафрикански вински земји и веројатно на ум ќе ви паднат Стеленбош или Франшхук. Оваа година размислете да се повозите километар и половина југоисточно до винскиот триаголник на Иглениот ’рт во Западен Кејп, каде што неколку пионерски подруми ги користат уникатниот крајбрежен карактер на регионот и силните морски ветрови за производство на експресивни, минерални и свежи вина. Шираз и совињон блан се истакнати сорти - пробајте ги во „Страндвелд винјардс“, „Ломонд вајнс“ или „Џаинт перивинкл“ - и пино ноар успева во овие поладни подрачја. На бреговите на реката Брид, скалестите лозја во „Сајн вајнс“ формираат импресивни мешавини во стилот на Рона.
Малку понатаму, резервирајте обиколка низ мочуриштето Нувејаарс, каде што 25 земјопоседници чуваат 113.000 хектари од рамнините Агулхас, каде што нилските коњи и биволите се враќаат во своите природни живеалишта. Сместете се во приватниот резерват на природата „Грутбос“, кој ја чува ендемичната вегетација на финбос, и грмушките, вегетацијата на тој регион. Оригиналниот „Гарден лоџ“ беше целосно реновиран во 2022 година: неговите 11 современи апартмани се скриени во средината на древни шуми што ги красат млечни дрвја.
● Посетете спа во долината на Лоара
Соништата за француската долина на реката Лоара обично наведуваат на дворци од бајките што елегантно се издигнуваат од уредени градини и градови, кои Дизни ги направи совршени. Сепак, заспаниот регион, со своите брановити ридови со зелени пасишта и балони со топол воздух, прифаќа помодерна улога во гостопримството, која притоа е и еколошки одржлива. Неколку револуционерни имоти никнаа во изминатите две години, вклучувајќи го и „Лоар вали лоџес“, со 18 вистински куќички на дрвја скриени длабоко во 750 хектари бујна шума. Таму во вашата соба ќе дојдат масерки ако закажете третман на вашата тераса, а на менито во локалниот ресторан „Ардент“ ќе најдете производи од градина, како зелка полнета со џигер од гуска. Во „Лес сурсес де Шеверни“, новото одморалиште изградено во 2022 година од дворец и фарма од 18 век, можете да уживате во локално одгледаните состојки во ресторанот „Ле фавори“ од сино дрво и да испробате етички произведени средства за туширање во вашиот апартман.
Локалните жители беа особено воодушевени од хотелот и ресторан „Флер де Лоар“, блескавото деби на главниот готвач Кристоф Хеј во синџирот „Рилеј енд Шато“ со пет ѕвездички во Блоа. Неговиот претходен ресторан „Ла мезон да коте“ доби две ѕвезди „мишлен“ и зелена ѕвезда за одржливост пред да биде затворен. Новото одморалиште е направено од старски дом од 17 век, изграден по наредба од Гастон, војводата од Орлеанс, брат на Луј XIII, а сега има слаткарница, спа-центар и 15-метарски затворен базен. Сепак, главни атракции се двете трпезарии, кои во голема мера се потпираат на градината од 2,5 хектари за производство и на локалните реки за есетра, крап и други риби. Пробајте штука со крцкава киноа пред да одите на спиење во кревет избран по ваша мера. Следниот ден поминете го истражувајќи ги восхитувачката природа и блиските винарници - пеш, со туристички автобус, велосипед или дури и со балон.
ОАЗИ ЗА ХРАНА
● Доживејте поинакво Торонто секогаш кога ќе го посетите
Најголемиот град во Канада и понатаму е една од најпроменливите и најбрзорастечки метрополи во Северна Америка. Оваа година нема да биде поинаку: „Д Нобу резиденс Торонто“, комплекс што вклучува хотел и еден од водечките ресторани на брендот, треба да биде отворен летово во две кули од 49 ката, подигнати на врвот на 128-годишната фабрика за стакло „Пилкингтон“. Хотелот „Андаз“ ќе биде во срцето на 94-катната кула за мешана намена на компанијата „Фостер + партнерс“, која, кога ќе биде завршена, ќе биде највисоката станбена зграда во Канада.
Гастрономската сцена во Торонто исто така напредува на веќе добро поставени темели: израелскиот готвач Ејал Шани наскоро ќе воведе медитеранска храна полна со зеленчук во својата прва канадска филијала „Мизнон“, додека локалните кулинарски ѕвезди Ханиф Харџи, Антонио Парк и Патрик Крис штотуку ги направија последните подготовки во своите ресторани. Во септември, „Мишлен“ го објави својот прв водич за Торонто, истакнувајќи 13 ресторани што заслужија ѕвезди, вклучувајќи го и „Ало“ на Крис. (Тој има француско мени - лепило за „Мишлен“.)
Зближување на трите милиони жители на градот е мисијата на „Бентвеј“, урбан проект од една милијарда денари што го претвора напуштениот автопат во малопродажен, уметнички и изложбен простор погоден за пешаци, кој процвета од отворањето на првата фаза во 2018 година. Оваа година одржливиот парк ќе ја започне својата амбициозна следна фаза, правејќи уште поголем дел од центарот на градот прооден и достапен.
Bloomberg Businessweek
● Ценкајте се во раздвижениот Истанбул
Во најголемиот турски град има големи метежи, делумно поради приливот на Руси и Украинци, покрај типичните посетители од Блискиот Исток и Западна Европа. Иако градот вообичаено е рај за летен одмор, во студениот октомври земјата го забележа вториот најголем приход во историјата од туризмот. Хотелите сѐ уште се полни, а резервации во врвните ресторани тешко се постигнуваат.
Ако можете, резервирајте маса во „Турк Фатих Тутак“, кој со своите две ѕвезди има највисок рејтинг на „Мишлен“ во Истанбул. (Водичот првпат пристигна во октомври, што е добредојдено признание за елитните ресторани во градот.) Не е на списокот, но вреди да се застане во „Авло“. Служи одлични турски јадења во реновираниот ресторан во хотелот „Фор сизнс“, кој се наоѓа во поранешен отомански затвор во историскиот кварт Султанахмет. „Галатапорт“, во голема мера завршен пристаништен комплекс, е изграден за да ги опслужува огромните бродови, но неговите продавници и ресторани на брегот на Босфорот потсетуваат на раскошот на Дубаи. Годинава ќе се отвори ултралуксузниот хотел „Пенинсула“, со долг базен покрај работ на теснецот. Овој хотел доаѓа по отворањето на „Мандарин Ориентал“ во 2021 година, кој исто така е на вода и има 86 соби. Баровите налето имаат одличен поглед и бескрајни можности.
Високата инфлација ги зголеми цените, па сопствениците на продавници мораа често да ги ажурираат за да го одржат чекорот. Луксузните трговци во малку побогатите населби, како Нисантаси, или во огромните трговски центри, како „Зорлу“, ги чекаат туристите што се туркаат да се ценкаат со лирите. Сепак, оние што сакаат да се забавуваат цела ноќ можеби ќе треба да побараат совет од локалното население: владата не ги укина целосно мерките против ковид што се однесува на музиката, па некогаш бучната ноќна сцена се затвора во 1 часот по полноќ.
● Разбудете ги своите сетила во Сан Франциско
Овој технолошки центар во последно време зазема голем простор на насловните страници поради празните деловни простори и празните улици во центарот на градот, но неговите станбени делови напредуваат, а градот изобилува со гостопримство. Со исчезнувањето на метежите, сега е вистинското време да го искористите Сан Франциско како матична база за екскурзии на отворено во околниот округ Марин и долината Напа — или само да ги посетите градските ресторани, барови и хотели што не се преполни.
Резервирајте во отмениот „Хотел 1“ во финансискиот округ: изработен од спасени секвои, автохтоно зеленило и рустикален камен, тој е органска оаза спроти шеталиштето што се протега од бејзбол-стадионот „Оракл парк“ до забавните содржини во „Фишерманс Уорф“. Хотелот „Лајн СФ“ штотуку го постави знамето во квартот Тендерлоин. Во јавниот простор на хотелот се изложени локални уметнички дела, додека гостите пијат коктели што ги приготвува креативниот шанкер Дени Луи. Во близината на Унион сквер, хотелот „Оберж“ ќе ја трансформира шпанската зграда „Херст“ од 1911 година, а хотелот треба да биде отворен оваа година, по реновирањето под палката на декораторите „Роман и Вилијамс“. Ќе има 150 соби, плус ресторан, салон на покривот и спа-центар.
Многу прекрасни необични ресторани се отворени во 2022 година, вклучувајќи го и „Шагис траш пај + натурал вајн“ во квартот Мишн, кој служи пици со крцкава кора, прелеани со збрчкани печурки, модри тикви и други „грди“ производи што би биле фрлени на некое друго место. Не пропуштајте го блискиот „Мијоте“, кој служи храна што е мешавина на калифорниската и француската кујна од готвачот Косуке Тада, или „Дамансара“, примамлива малезиска кантина во долината Ное. Локалните жители по тригодишна пауза го слават отворањето на јахт-клубот „Лихолихо“. Збиралиштето „Лоер Ноб Хил“ служи хавајски вкусови на готвачот Рави Капур.
● Договарајте бизнис во Милано
Милано повеќе не е само италијанска модна престолнина - градот е подготвен да стане центар на светскиот бизнис, со оглед на тоа што доаѓаат сѐ повеќе друштвени клубови, во кои можете да остварувате деловни контакти. Во декември колекцијата „Лунгарно“, во сопственост на компанијата „Ферагамо“, го претстави „Портрет Милано“, хотел со 73 соби сместен во зграда што била една од најстарите богословии во Европа. Трансформацијата на имотот бараше пополнување на плоштадот од 3.000 квадратни метри со ресторани и бутици. Тој плоштад го доби името „Квадрилатеро“ и за првпат ги поврзува улиците Венеција и Сент Андреа, означувајќи нова маршрута за пешаците што ќе можат да поминат низ модниот кварт.
На неколку минути пешачење оттаму, на улицата Венеција, приватниот клуб „Каза Чипријани“ има 15 соби и препознатлив италијански ресторан. Годинава „Кор клаб“ ќе ја отвори својата прва филијала надвор од Њујорк и Сан Франциско во блиската палата, каде што исто така можете да остварите нови деловни контакти.
Сепак, на еден голем меѓународен деловен град му е потребна одлична гастрономска сцена, а Милано се држи добро со многубројните уредени ресторани. Минатата година познатиот готвач Диего Роси, чија траторија „Трипа Милано“ беше прогласена за најдобра во Италија, ја отвори „Тестина“ со компактно мени концентрирано на популарните класици (како телешки котлети) и јадењата што често ги занемаруваме (како што е гратин од телешка глава). Новото бистро „Андреа Апреа“ во фондацијата „Луиџи Ровати“ се потпира на своите калабриски корени и гастрономски успех (само помислете на компирите „аматричана“ обвиткани во фолија). Сепак, најголемите кулинарски таленти во градот се наоѓаат во „Меркато чентрале“, кој брзо стана центар за гурманите - се служат сувомесни производи, кинески кнедли и раскошни италијански јадења од ориз, како и пици и леб од мајсторот пекар Давиде Лонгони.
● Поминете си незаборавно во раскошниот Дубаи
Врвната дестинацијата на Блискиот Исток годинава оди чекор понапред. Се очекува „Атлантис ројал“, долгоочекуваното ултралуксузно одморалиште на вештачката плажа на Палм Џумеира, да биде отворено за гости во февруари. Центарот за ноќен живот „Клауд 22“ во одморалиштето нуди неверојатен поглед од 22-от кат, а има бескраен базен (анг. infinity pool) дури од 90 метри, како и приватни куќички со лежалки и диџеј. Тука се и познатите готвачи Хестон Блументал и Хозе Андрес. Ресторанот „Нобу“ исто така се сели од сестринскиот имот „Атлантис палм“ како „Нобу бај д бич“, клуб со базен.
Не само што другите нови хотели се фокусираат на возрасните - тие целосно забрануваат влез за деца. „Кот д’Азур Монако“ ветува непрестајни активности на вештачкиот архипелаг Свет; „Тера Солис“, пустинско одморалиште за оние со 21 и повеќе години надвор од градот на музичкиот фестивал „Томороуленд“, има два ресторана и нуди дневни пропусници и изнајмување лежалки. Децата можат да влезат во „Сиро“, новиот фитнес-хотел, но дали навистина ќе им биде интересно да престојуваат во простор за вежбање од 1.700 квадратни метри?
„Мишлен“ ја прошири листата на препораки, а Дубаи извлече корист од новата листа: во јуни 11 ресторани добија ѕвезди. Сепак, не заборавајте ги локалните истакнати ресторани како „3Филс“ или „Орфали Брос“. Нивниот единствен недостаток? Тоа што не служат алкохол.
Во соработка со Метју Брокет, Џеки Карадонио, Марк Елвуд, Лиза Флејшер, Лебавит Лили Гирма, Бенџамин Харви, Ричард Холмс, Џен Марфи, Мартин Парис, Брендон Пресер, Крис Ровзар, Крис Шалккс, Линдзи Трамута и Стивен Трелоар.
Преведе Сузана Митревска.
.webp){kind=icon}
