Може ли вештачката интелигенција да ги замени травел-инфлуенсерите?

Вештачката интелигенција (ВИ) стана еден од најголемите трендови во индустријата за патувања и туризам. Од напредни опции за пребарување и детално планирање на маршрутата до виртуелни асистенти што ги поедноставуваат резервациите, се чини дека никогаш не било полесно да се испланира едно патување. 

Кога истражуваме за конкретна дестинација, вештачката интелигенција сериозно одговара на нашите желби и потреби, ни штеди време, а може значително да ни заштеди и пари, но клучното прашање што се поставува е како правилно да ја користиме. 

Токму на оваа тема гласно се зборуваше на четвртото издание на Самитот за социјални медиуми (Social Media Summit), кој на 8 мај се одржа во Сараево. Внимателно одбрани експерти ја пренесоа пораката дека ВИ не е закана, туку можност, но она што мора да постои е баланс меѓу технологијата и човечноста. 

На настанот присуствуваше и Весна Коцевска (whisper.ves), која беше прогласена за најдобар травел-инфлуенсер од Македонија, а се најде и на листата со топ 5 најдобри инфлуенсери за патувања во регионот. 

Весна Коцевска (whisper.ves)  Приватна архива

 

Лауреатите се избор на хрватската агенција „Хајпфај“ (Hypefy), специјализирана платформа за инфлуенсерски маркетинг и аналитика, која ги оценувала следните клучни аспекти: содржина, автентичност, раст, ангажмани и влијание во последните 12 месеци.

„Искрено, бев изненадена кога ме исконтактираа. Не знаев дека сум дел од изборот, ниту дека некој внимателно следи што правам на својот инстаграм-профил. Кога сфатив дека станува збор за легитимна организација и престижен самит на овие простори, радоста беше огромна“, вели Коцевска за „Блумберг Адрија“.

Овој нејзин голем регионален успех беше одличен повод да поразговаравме за најголемиот предизвик со кој таа и нејзините колеги се соочуваат во моментов, а тоа е токму вештачката интелигенција, кон која на почетокот имала аверзија. Сега ја користи повремено, но само за идеи и за работи што одземаат повеќе време. Таа нагласува дека секоја приказна што ќе ја видите на нејзиниот профил ја раскажува сама и е нејзино лично доживување.

„ВИ донесе револуција во креирањето содржини, но и огромна конкуренција и брзина што тешко се следи. Во тој процес лесно е да се изгуби човечката нијанса, а инфлуенсерите, меѓу другото, треба да се свои и автентични, да го пренесуваат своето лично искуство. Тоа е начинот на кој се поврзуваме со својата публика. Голем предизвик е како да останеш свој, а сепак во чекор со технологијата“, вели Коцевска.

Приватна архива

 

И покрај тоа што технологијата се развива со молскавична брзина, таа истакнува дека вештачката интелигенција никогаш нема да ја замени персонализираната услуга на туристичките агенти, како и работата на туристичките водичи. Според неа, ВИ во никој случај не може да ги замени човечкиот допир, интуицијата и емпатијата. 

„Туристичкиот водич не е само извор на информации,туку раскажувач и придружник, кој споделува приказни што не може да се најдат на интернет. Љубовта кон дестинацијата, било да е тоа земја, град или село, може вистински да ја покаже само туристичкиот водич. ВИ во некои сегменти може да ја замени персонализираната услуга, но никогаш целосно“, објаснува Коцевска.

Таа советува вештачката интелигенција да ја користиме како сојузник, а не како замена за искуство. 

„Кога се подготвувате за патување, таа може да ви помогне со информации, предлози, па дури и со мапи и планирање на буџетот. Сепак, не дозволувајте да ви ја одземе радоста од планирањето и истражувањето, правете го тоа заедно. Многу е важно да ги проверите сите информации и од друг извор, особено деталите за самата дестинација“, нагласува нашата соговорничка.  

Приватна архива

 

ТОП 5 МЕСТА ЗА ВИКЕНД-БЕГСТВО: ШТО НИ ПРЕПОРАЧА ВИ, А ШТО КОЦЕВСКА? 

Весна Коцевска е фокусирана на семејните патувања, но специјалност ѝ се дестинациите за викенд-бегство со кои всушност и се прослави на социјалните мрежи. Ја замоливме да ни предложи пет такви уникатни македонски места што треба задолжително да ги посетиме и сосема кратко да ни објасни зошто баш тие. 

Направиме еден мал експеримент, па истото прашање му го поставивме и на ЧетГПТ. Кога го добивме одговорот креиран со вештачка интелигенција, кој ви го пренесуваме интегрално без новинарски интервенции, ни се потврди она што главно се наведува како мана на популарните четботови, а тоа е неможноста да реплицираат емоционална интелигенција.  

Изборот на Коцевска:

1. Пешна 

Пештера со најголем влез на Балканот, навистина фасцинантна и ќе ве остави подзинати со својата грандиозност. А, од друга страна, лесно достапна со уредена патека.

2. Лесновскиот манастир и воденичарските пештери 

Одличен избор за викенд, во комбинација со Кратово и Куклица. Тука бевме двапати со децата и еднакво уживавме. Сѐ заедно може квалитетно да пополни цел викенд.

3. Патеката до Св. Богородица Заумска 

Митот дека може да се стигне само по воден пат го разбивме минатава есен кога со деца отидовме пеш. Имам видеозаписи од патеката на мојот профил. Верувам дека многумина ја виделе црквата од вода, но, ете, може и по копно да се стигне до неа. Природата е навистина прекрасна и речиси недопрена.

4. Водопадот Дуф 

Иако не е голем водопад, воодушевува со својата уникатност. Прекрасна уредена патека, која е идеална и за во жешките летни денови. Може да се комбинира со други места во рамките на националниот парк Маврово или со посета на Бигорски манастир.

5. Изворот на Црна Река кај селото Железнец, Демирхисарско 

Заштитена етнозона и преубава природа. Најголемиот извор е Црна Дупка, кој се наоѓа над селото, а уште два извори се наоѓаат во Горно Маало.

Изборот на ЧетГПТ:

1. Брајчино

Што го прави уникатно: Автентично планинско село на падините на Пелистер, со дрвени куќи, локална храна и поглед на Преспанското Езеро.
Идеално за: Мир, планинарење, романтични викенди.
Топ активност: Пешачење до црквата Св. Петка или посета на Преспанското езеро и островот Голем Град.

2. Вевчани 

Што го прави уникатно: Вевчанските извори се скриен рај под Јабланица, а селото е полно со хумор, историја и самопрогласена „Република“.
Идеално за: Културен одмор, вкусна традиционална кујна, чудна и весела енергија.
Топ активност: Пиење ракија со локалците и истражување на извори, пештери и мали водопади.

3. Слатински Извор 

Што го прави уникатно: Геотермален извор среде природа, совршен за природен „спа“ амбиент.
Идеално за: Необичен релакс, авантура и малку „дива бања“.
Топ активност: Капење во природно топли извори и пикник со поглед.

4. Маврово + Галичник (надвор од сезоната)

Што го прави уникатно: Галичник е тивок, карпест и мистичен кога нема свадбена фрка. Маврово пак нуди езеро, планина и тишина.
Идеално за: Зимско или есенско бегство, фотографија и културна историја.
Топ активност: Пешачење до Бигорски манастир и обиколка на заборавени села.

5. Куклица + Кратово

Што го прави уникатно: Камените кукли изгледаат вонземски, а Кратово е мини град со мостови, кули и вулкански карпи.
Идеално за: Истражување, фотографирање, љубители на легенди.
Топ активност: Патека низ Куклица, пити во стара кратовска куќа и прошетка по средновековните мостови.