Земјоделците што ја одгледувале храната што ја јадете за појадок, најверојатно, се на крајот на својата кариера. Вкупно 3,4 милиони фармери во САД имаат просечна возраст од 58 години, за разлика од 56 години во 2012 година. Само девет проценти од американските фармери се помлади од 35 години, но тој процент почна да расте: според последниот попис на земјоделството, бројот на американски фармери на возраст под 35 години се зголемил за 11 отсто. Уште поизненадувачки, фармер од генерацијата зед (Gen Z Farmer) сега е во тренд и има повеќе од 30 милиони прегледи на Тикток, додека „Gen Z Farm“ има 17 милијарди прегледи.
Се разбира, постои огромен јаз помеѓу трендовите на социјалните мрежи и работната сила: бројот на млади фармери не расте ни приближно толку брзо колку што излегуваат постарите работници. Земјоделската индустрија, политичарите и инвеститорите имаат многу работа пред себе за да привлечат и задржат кандидати.
Добрата вест е дека има многу аргументи што можат да им ги дадат на младите.
Многу новодојденци во земјоделството никогаш нема да ги извалкаат рацете бидејќи индустријата претрпува технолошка и културна трансформација: земјоделството во 21 век станува демографски разновидно и мултидисциплинарно, а луѓето сега се фокусираат исто толку на напредните технологии колку и на обработувањето на земјата.
Сè повеќе млади земјоделци влегуваат во полето - и не мислам буквално на поле - затоа што се менува дефиницијата за земјоделец.
Да се вратиме малку наназад и да ги погледнеме податоците: според пописот, 80 отсто од земјоделците до 35 години помалку од една деценија се вработени во земјоделството. Тоа е значителен број во индустријата во која во 96 отсто од фармите се вработени членови од повеќе генерации. Тоа може да значи дека повеќето новодојденци стануваат земјоделци затоа што сакаат, а не затоа што тоа е нивното семејно наследство. Тие носат свеж начин на размислување, кој не е оптоварен со старомодни техники и решенија.
Маркетиншките анализи ја дефинираа генерацијата зед како онаа што ќе ги промени начинот на исхрана и пазарните ниши, вклучувајќи органски и локални производи и алтернативи за месо базирани на растенија. Овој начин на размислување е она што таа го носи на производствената страна на прехранбената индустрија.
Што е најважно, тоа помага да се диверзифицира индустријата во која во минатиот век доминираа мажи, белци и конзервативци. Аграрниот живот што Томас Џеферсон еднаш го најави како олицетворение на американските идеали, со текот на времето го живеат сè помалку луѓе. Големината на американските фарми експоненцијално порасна во изминатиот половина век, додека бројот на фарми денес се намали од повеќе од шест милиони во 1935 година на една третина од тоа.
Младите жени се сè поприсутни во сферата. Пописот на земјоделството покажа дека бројот на земјоделки е зголемен за 27 отсто. Функционерите и политичарите што се занимаваат со земјоделските прашања мора да сторат повеќе за да ја поттикнат различноста меѓу младите земјоделци со програми што ќе го олеснат товарот од студентските заеми и ќе им овозможат на младите и на малцинствата позначајни и трајни средства за купување земјиште.
На земјоделството му се потребни помлади работници, бидејќи се потребни нови вештини за да се нахрани човештвото во сè потешките услови за животната средина. Климатските промени се голем проблем за генерацијата зед. Официјалните лица задолжени за земјоделството треба да признаат дека нивната индустрија беше двигател на кризата, но и гласно да кажат дека земјоделството може да биде клучно решение за климатските проблеми. Регенеративните практики и високотехнолошките алатки можат да го трансформираат индустриското обработливо земјиште во џиновски јаглероден „сунѓер“, кој ги апсорбира и изолира гасовите што ја загреваат планетата.
Заклучокот е јасен: претставниците на индустријата и политичарите имаат добри аргументи да ги привлечат бистрите умови на генерацијата што расте. Тие треба јасно да им дадат на знаење на младите дека се посветени на демографска диверзификација, одржлив раст, премостување на традиционалните и високотехнолошки практики и создавање работна сила со повеќе вештини.
.webp){kind=icon}
Во моментов нема коментари за веста. Биди прв да коментира...