По објавата дека американскиот технолошки гигант „Гугл“ ја презема хрватската „Фотомат“ (Photomath), се интересиравме која друга компанија од регионот би можела да се најде на неговиот радар.
Во средата, на 22 февруари, се појави вест дека „Гугл“ го презема „Фотомат“ (Photomath), стартапот на Дамир Сабол, кој ги освои корисниците и инвеститорите. Со едукативна апликација што решава математички проблеми со помош на камерата на паметен телефон, дури и кога се напишани рачно, „Фотомат“ во своето деветгодишно постоење привлече околу 350 милиони корисници и околу 40 милиони долари странски инвестиции, предводени од фондовите „Менло венчрс“, „ГСВ венчрс“, „Лрн капитал“, „Черубик венчрс“ и „Гудвотер капитал“. Купувањето на „Гугл“ во Хрватска допрва треба да биде одобрено од европските регулатори, што се очекува до 28 март.
„Ние сме посветени на учењето и образованието многу години и ова преземање на ’Фотомат’ нуди потенцијална можност подобро да одговориме на потребите на учениците. Технологијата на ’Фотомат’ ќе му помогне на ’Гугл’ да им обезбеди на учениците подобро искуство за учење математика и да ги прошири понудите за помош на ’Гугл’ за домашни задачи“, велат претставниците на „Гугл“.
Не се знае колку потрошил технолошкиот гигант за аквизицијата, а од „Фотомат“ не ни открија повеќе, но потврдија дека чекаат одобрение од регулаторот. Се обидувавме да откриеме што се случувало зад сцената, кој кому му пришол, колку траеле преговорите, но оваа информација сигурно ќе излезе кога ќе заврши преземањето. Се шпекулира дека ова е најголемиот излез воопшто постигнат во Хрватска. Секако, ова ги отвори апетитите и целата деловна сцена е подготвена за уште вакви вести.
Кој друг би можел да биде на радарот на „Гугл“? Во Хрватска, тоа би можело да биде, меѓу другото, малиот стартап „Еирт“, кој сака да се пофали дека неговата архитектура на невронска мрежа овозможува попрецизно профилирање и предвидување на однесувањето на крајните корисници од онаа на „Гугл“.
„Во споредба со ’Гугл’, нашите резултати се попрецизни, но поважно е да успееме да користиме од сто до триста пати помалку параметри. Зборуваме конкретно за количеството на податоци што се потребни за обука и предвидувања. Ова се пренесува на количеството на компјутерски ресурси што се потребни за таа обука, односно помали вкупни трошоци“, изјави неодамна за Блумберг Адрија ТВ, Хајди Ќенан, директор и коосновач на стартапот.
Секако, тука е и „Микроблинк“ (Microblink), кој ја користи камерата на мобилните уреди и вештачката интелигенција за конвертирање на сликата на документот и текстот прочитан од сликата во компјутерска плоча. „Фотомат“ е создаден како спиноф-проект од овој стартап, така што тие имаат некои слични почетни поставки што очигледно му се допаднаа на „Гугл“.
„’Гугл’ купува компании од три причини: да ги подобри своите технолошки решенија, да ја прошири мрежата на корисници, географските области каде што се слаби, и да стекне таленти на компанијата“, изјави Борис Мусиелак, управен партнер на американскиот фонд за ризичен капитал „СМОК венчрс“ (SMOK Ventures).
„’Блумберг Адрија’ инвестира во софтвери и стартапи за игри во Централна и Источна Европа. Како по правило, станува збор за технологија што ’Гугл’ би морал сам да ја развие, но со стекнување стартапи, тој може да го прескокне тој развоен циклус“, вели Јуре Микуж, водечки партнер на „Соут венчрс капитал“, кој инвестира во технолошки компании во Југоисточна Европа.
Но дали „Гугл“ е заинтересиран да купи словенечки стартап? Од компанијата одговорија дека „немаат информации за ова прашање“. „За еден стартап да биде интересен за ’Гугл’, ќе мора да собере значителна сума капитал и да биде длабоко во фазата на пенетрација на пазарот“, рече Микуж.
„’Гугл’ е исклучително селективен во своите аквизиции и практично никогаш не прави бизнис со компании што немаат големи операции и седишта во САД. Покрај тоа, по правило, тие избираат само инвестиции што претставуваат технолошки пробив за ’Гугл’“, објаснува Мусиелак.
Во согласност со овие критериуми, Мусиелак издвојува тројца словенечки кандидати за кои „Гугл“ теоретски би можел да биде заинтересиран. Првиот е ХИЦУ (HYCU), кој нуди услуги за заштита на сајбер-податоци со помош на дистрибуирано складирање во облак, но, како што додава тој, прашање е дали тоа би се вклопило во стратегијата за раст и развој на „Гугл“. Според неговата процена, „Бани.нет“ (bunny.net), брзорастечка онлајн платформа за испорака на содржини, и „Џинијалс“ (Genialis), која развива платформа за научни податоци наменета за производителите на лекови, исто така би можеле да пораснат доволно за да му го привлечат вниманието во следните неколку години.
„Гугл“ не понуди одговор на прашањата на колегите од Србија дали се интересира за некоја компанија на нивниот пазар. Сепак, членовите на ИТ-заедницата таму беа поразговорливи. Некои се убедени дека многу компании што сега развиваат бизнис ќе станат дел од портфолиото на „Гугл“, додека други тврдат дека српскиот пазар сè уште не е доволно развиен и дека веќе се продадени компаниите што би го привлекле вниманието на „Гугл“, како што се „3Латерал“ (3Lateral) или „Фрејм“ (Frame).
„Да бев во кожата на ’Гугл’, ќе го гледав ’Саундер’ (Sounder)“, рече партнерот во белградскиот ИКТ-хаб Коста Андриќ, мислејќи на стартапот основан во 2019 година, чии технолошки решенија ги користат креаторите на аудиоформати за заштита на брендови, како и за собирање различни содржини и податоци и насочено рекламирање. Српскиот стартап „Паблито“ (Publitio), кој развива облак-платформа, каде што корисниците можат да складираат и уредуваат фотографии и видеосодржини од нивните веб-локации и мобилни апликации, ја доби и номинацијата за гугл-кандидат.
Останува надежта дека по објавувањето на веста за аквизицијата на „Фотомат“, „Гугл“ навистина ќе биде следен од други инвеститори и посилно ќе го поддржи стартап-пазарот во регионот Адрија, кој постави цврсти темели во последните десет години. Зголемениот интерес на странските инвеститори и процутот на венчр капитал фондовите на домашно тло се само потврда за тоа, а уште еден доказ е дека рибите во малото езеро Адрија станаа добра мамка за тешкашите како „Гугл“.
Во соработка со Ана Ристовиќ и Клемен Баланч
Текстот го преведе Владимир Николоски
.webp){kind=icon}
Во моментов нема коментари за веста. Биди прв да коментира...