Има малку технолошки уреди што имаат толку интимна улога во секојдневниот живот како слушалките. Без разлика дали ги користиме за забава, продуктивност или за да избегаме од вревата околу нас, поголемиот дел од денот го поминуваме со нив, на или во ушите.
Студија од 2013 година на технолошката компанија „Сонарворкс“ (Sonarworks Inc) покажа дека луѓето, додека работат, двојно почесто избираат слушалки што се ставаат преку уво отколку слушалки за во уво. А со доаѓањето на есента таа разлика ќе се зголеми. Тони Аама, потпретседател на специјализираната трговска фирма „Аудио 46“ (Audio46) во Њујорк, вели дека слушалките за во уво се продаваат повеќе во текот на пролетта и летото, додека со заладувањето расте продажбата на слушалките што се носат над ушите.
Ако барате нови слушалки со врвен квалитет, ние тестиравме различни модели, па вие можете да ја пронајдете вистинската комбинација на удобност, функционалност и квалитет на звукот. Ова се 12-те вида од нашите омилени слушалки.
Bloomberg Businessweek
За почетник ентузијаст
Можете да почнете да инвестирате во опрема за слушање музика со повисок квалитет и сепак да ви останат пари за врвен засилувач и дигитално-аналоген конвертор. Француската компанија „Фокал“ (Focal) ги произведува најдобрите слушалки во светот со цени што достигнуваат и до 5.000 долари.
Новиот модел „фокал азувиус“ (Focal Azuvius), сепак, за само 549 долари нуди звук и дизајн во облик на саќе, по кој всушност овој бренд е препознатлив. Слушалките SR325x на „Градо лабс“ (Grado Labs), по цена од 295 долари, од друга страна, потсетуваат на слушалките од средината на минатиот век. (Оваа компанија произведува аудиоопрема во Бруклин, Њујорк, од 1953 година.) Отворените слушалки што се носат преку ушите исто така пропуштаат надворешен звук; она што го добивате за возврат е чудното чувство како да сте во иста просторија со музичарите што ги слушате.
Bloomberg Businessweek
За неопходно отстранување на бучавата
Од брендовите што се синоним за технологија за поништување шум, потценетите слушалки „квајет комфорт ултра“ (QuietComfort Ultra) на „Боус“ (Bose), со цена од 429 долари, тежат само 255 грама и ви даваат чувство дека сте потопени во звук. Тие имаат батерија што трае 24 часа. Повеќе внимание добиваат слушалките Px7 S2e на „Боуерс и Вилкинс“ (Bowers & Wilkins), кои се продаваат за 399 долари и сега се достапни во рубин црвена боја. Овие слушалки, како одлична комбинација на висококвалитетен звук, долготрајна батерија и дизајн, се добар избор за различни ситуации и потреби. Слушалките „сонос ејс“ (Sonos Ace), кои чинат 449 долари, се привлечни и ѝ даваат приоритет на удобноста благодарение на големите перничиња што го покриваат увото.
Bloomberg Businessweek
За гејмерите во движење
За просечен гејмер кому му е важно да има слушалки што изгледаат добро кога не ја игра „Балдурс гејт“ (Baldur's Gate), слушалките „99 класикс“ на компанијата „Мезе аудио“, по цена што почнува од 309 долари, имаат горна површина на врв од орев, а сега се достапни во пакет со отстранлив кабел и микрофон за 388 долари.
Сепак, слушалките „максвел“ (Maxwell) на „Аудезе“ (Audeze), по цена од 299 долари, сигурно не без причина станаа стандард во светот на игрите, и тоа не е само безжична врска што овозможува аудиопренос без доцнење или удобен дизајн. Нивните ниски тонови прават експлозиите во „Cyberpunk 2077“ да звучат многу веродостојно, додека високите тонови го прават кристално чист звукот на судир на мечеви во играта „Дијабло 4“.
Bloomberg Businessweek
За љубителите на звук низ светот
Употребата на безжична технологија со себе носи одредени недостатоци. Сепак, можно е да се добие одличен звук без жици. Слушалките No 5909 на „Марк Левинсон“ (Mark Levinson), со цена од 999 долари, имаат функција за отстранување на бучавата, која се приспособува кон нејзиниот интензитет, драјвери (специјални звучници) обложени со берилиум што се нагодени за да обезбедат совршен баланс на звукот, што е резултат на опсежно истражување.
Слушалките „беоплеј Х100“ (Beoplay H100) на компанијата „Бенг и Олуфсен“ (Bang & Olufsen), сега достапни во црна, песочна боја и кајсија боја, по цена од 1.550 долари, имаат титаниумски драјвери и можат да го приспособат звукот врз основа на тоа како слушалките се вклопуваат во увото. Генерално, сепак, тешко е да се победи „стакс спирит С5“ (Stax Spirit S5) на компанијата „Едифајер“ (Edifier). Овие слушалки имаат рамни магнетни двигатели, кои можат да репродуцираат бас со целосен звук, но на контролиран начин и исклучително јасни средни тонови. Батеријата треба да трае до 80 часа.
Bloomberg Businessweek
За оние што го сакаат само најдоброто
Слушалките со врвен квалитет имаат многу заеднички нешта со врвните часовници. Благодарение на сложената изработка, егзотичните материјали и иновативните технологии, тие ја надминуваат својата практична намена. Во случајот со слушалките „сусвара“ (Susvara Unveiled) на компанијата „Хифимен“ бил користен минималистички дизајн за да се постигне максимално звучно искуство. За 8.000 долари, рамни магнетни драјвери, тенки микрони ја репродуцираат вашата омилена песна со неверојатни детали, додека лесните отворени алуминиумски слушалки слични на решетки даваат целосен и богат звук. Слушалките E3 на „Дан кларк аудио“ (Dan Clark Audio), кои чинат 2.000 долари, се сосема различни по изглед со куќишта во форма на D, покриени со цврсто заштитно стакло „горила 3“. Овие слушалки, иако се од затворен тип, успеваат да обезбедат богато звучно искуство.
.webp){kind=icon}
