„Кредит Суис“ (Credit Suisse Group) и УБС (UBS Group) се меѓу банките што се под лупа во истрагата на Министерството за правосудство во САД, а во врска со тоа дали финансиски експерти им помагале на руски олигарси да ги избегнат санкциите, информира анонимен извор.
Швајцарските банки беа вклучени во неодамнешниот бран судски повици што ги следи американската влада, тврди анонимниот извор. Барањата за информации се пратени пред кризата што ја зафати „Кредит Суис“ и резултираше со преземање од страна на конкурентот УБС.
Судски повици се упатени и до вработени во некои од големите американски банки, вели анонимниот извор.
Истрагата на Министерството за правосудство е насочена на утврдување кои од вработените во банките работеле со клиенти што подлежат на санкциите и како тие клиенти биле проверувани во текот на минатите неколку години, информира изворот. Тие банкари и советници може да бидат изложени на дополнителни истраги за да се утврди дали прекршиле некој од законите.
Од „Кредит Суис“ одбија да коментираат, а УБС не одговори на барањето за коментар.
Руски клиенти
Пред да резултира руската инвазија врз Украина со проширување на санкциите, „Кредит Суис“ беше позната банка по тоа што ги услужуваше богатите Руси. Во својот најдобар период банката управуваше со повеќе од 60 милијарди долари за руски клиенти, кои генерираа меѓу 500 и 600 милиони долари приходи за „Кредит Суис“.
Минатиот мај, кога беше прекинато работењето со поединечни руски клиенти, „Кредит Суис“ се држеше до нивните околу 33 милијарди долари, што е за 50 проценти повеќе од УБС.
Министерството за правда на САД минатата година формира работна група под називот „Клептокепчр“ (KleptoCapture) за спроведување санкции за богатите Руси што се политички сојузници на претседателот Владимир Путин. Американската влада оттогаш заплени низа јахти, приватни авиони и луксузни недвижности.
Минатиот месец Владата на САД се впушти во заплена на домови во Њујорк, Флорида и Хемптонс, кои се во сопственост на санкционираниот олигарх Виктор Векселберг.
Голем број обвинувања
И голем број поединци се обвинети за помагање на олигарсите во криењето на имотите. Британскиот бизнисмен Грахам Бонам-Картер беше уапсен во октомври под обвинение дека незаконски префрлил милион долари за одржување американски имоти за санкционираниот милијардер Олег Дерипаска. Поранешниот висок агент на Федералниот истражен орган е обвинет за помагање на Дерипаска во прекршувањето на санкциите во јануари.
Банките може да се соочат со сериозни казни за прекршување на американските санкции. „БНП Парибас“ (BNP Paribas) во 2014 година се согласи да плати девет милијарди долари, откако призна вина во врска со американските обвинувања за извршени трансакции за санкционирани судански, ирански и кубански субјекти. Во 2019 година банката „Стандард чартерд“ (Standard Chartered Bank) се согласи да плати повеќе од една милијарди долари за решавање на истрагата на Министерството за правда, во која поранешен вработен во банката призна вина за прекршување на американските санкции кон Иран.
Откако се објави планот за спасување на „Кредит Суис“ во текот на викендот, УБС изрази општа загриженост во врска со преземањето потенцијални правни обврски од својот конкурент. Швајцарската влада рече дека ќе ѝ гарантира на УБС до девет милијарди франци (9,8 милијарди долари) загуби од таква работа.
Заменичката на главниот државен адвокат на САД, Лиза Монако, на почетокот од месецов рече дека Министерството за правосудство одговорило на „несигурното геополитички опкружување“ преку зајакнување на одделот за национална безбедност што работи со прекршувања на санкциите.
„Корпорацискиот криминал и националната сигурност се преклопуваат до невиден степен досега, а одделот се реструктуира за да одговори на тој предизвик“, рече Монако.
.webp){kind=icon}
