Феноменот Барбенхајмер им донесе на кината најголема заработка по 4 години

Киносалите конечно имаат причина за славење. „Барби“ (Barbie), комедијата за познатата кукла, и „Опенхајмер“ (Oppenheimer), биографскиот филм за пронаоѓачот на атомската бомба, привлекоа многу филмски обожаватели и викендов помогнаа да се удвојат приходите од продажба на карти во однос на претходната година, на околу 302 милиони долари.

„Барби“ од студиото „Ворнер брос“ (Warner Bros) беше филм со најголема заработка во американските и канадските кина, со 155 милиони долари од продажба на билети, објави во неделата истражувачкиот тим на „Комскор“ (Comscore). Со тоа го има најуспешното деби за оваа година, надминувајќи го филмот „Супер Марио“ (The Super Mario Bros. Movie), кој заработи 146,4 милиони долари. Викендов беше премиерата и на филмот „Опенхајмер“ на режисерот Кристофер Нолан, кој заработи 80,5 милиони долари.

Се проценува дека повеќе од 200.000 филмски гледачи купиле билети за двата нови филма во ист ден, во кината како АМЦ (AMC Entertainment Holdings Inc.) и „Регал“ (Cineworld Group Plc’s Regal), како дел од летниот филмски феномен наречен Барбенхајмер. Истовремената премиера на филмовите ги воодушеви филмските гледачи, придонесувајќи за најдобриот викенд во кината од премиерата на „Одмаздници“ (Avengers: Endgame) во април 2019 година.

Други позначајни наслови периодов се „Звукот на слободата“ (Sound of Freedom), филм за трговија со деца, кој заработи околу 20,1 милиони долари во третиот викенд од прикажувањето, според „Комскор“. Овој необичен летен хит го надмина новото продолжение на „Невозможна мисија“ (Mission: Impossible  - Dead Reckoning Part One) на „Парамаунт пикчерс“ (Paramount Pictures), кој го зазеде четвртото место, со 19,5 милиони долари.

Викендот беше светла точка во инаку тешкото лето за филмската индустрија, која забележа разочарувачки резултати од високобуџетните филмови како „Флеш“ (The Flash) и најновиот наслов од сагата за Индијана Џонс (Indiana Jones and the Dial of Destiny).

Десетте најгледани филмови во Северна Америка за викендот од 21 до 23 јули Bloomberg

„Барби“, во режија на Грета Гервиг и со Маргот Роби во главната улога, се очекуваше да заработи меѓу 140 и 175 милиони долари на домашниот пазар, според прогнозите на „Боксофис про“ (Boxoffice Pro). Прогнозите вртоглаво пораснаа во последниве недели поради големото медиумско внимание. Филмот заработи дополнителни 182 милиони долари на меѓународно ниво, според соопштението на „Ворнер брос“.

Филмот се потсмева на историјата на куклата, додека се осврнува на критиките за нејзината нереална фигура и материјалистичка природа. Ја следи Барби додека таа излегува од совршениот свет создаден од производителот на играчки „Мател“ (Mattel Inc.) и влегува во светот со вистински луѓе што биле под нејзино влијание.

„Барби“ беше силно промовирана, дури и според холивудски стандарди, што вклучуваше реплика во реална големина на нејзиниот дом од соништата во Малибу, Калифорнија, како и огромни розови кутии во кината каде што обожавателите можеа да се фотографираат. Многу филмски посетители, вклучувајќи и возрасни, носеа розова облека или се облекуваа како ликовите од филмот.

„Рајан Гослинг, кој ја игра улогата на момчето на Барби, Кен, донесе комичен елемент што веројатно им се допадна на обожавателите кои инаку не би сакале да гледаат филм за модна кукла“, вели Роберт Марич, автор на „Marketing to Moviegoers: A Handbook of Strategies and Tactics“. Тоа беше видливо во промотивните материјали.

Заработка во кината во Северна Америка од почетокот на 2023 година Bloomberg

„Маркетиншката кампања за Кен беше урнебесна“, рече тој.

Успехот на филмот е и победа за калифорнискиот „Мател“, кој има тенденција да приспособи голем број брендови на играчки, од „Хот вилс“ (Hot Wheels) до „Барни“ (Barney), за филмска и ТВ-содржина.

На филмот „Опенхајмер“ на „Јуниверзал пикчрс“ исто така многу работи му тргнаа од рака. Новиот филм на режисерот Нолан ќе има ексклузивни проекции во кината „Ајмакс“ (Imax) во САД, кои ќе траат три недели. Речиси половина од продадените билети за „Опенхајмер“ во САД и Канада беа за таканаречените премиум-екрани со голем формат, а екраните на „Ајмакс“ учествуваа со 26 отсто од продажбата на билети во САД.

Нолан традиционално ги објавува своите филмови, како „Темниот витез“ (The Dark Knight) и „Зачеток“ (Inception), на третиот викенд во јули. Како силен поборник на киното, тој премина од „Ворнер брос“ во „Јуниверзал“ откако студиото истовремено го објави неговиот филм „Тенет“ на стриминг-платформите во 2020 година.

Во моментов нема коментари за веста. Биди прв да коментира...

Остави коментар