.webp){kind=icon}
Неделава што измина е во знакот на пензиите и пензионерите. Власта се пофали дека од септември ќе има ново зголемување на месечните примања на најстарите граѓани за 6,8 отсто. Пензионерите се налутија зошто покачувањето за функционерите е 78, а за нив само 6,8 отсто. Во Прилеп организираа и протест. Бараат зголемувањето на пензиите да биде линеарно, а не процентуално, затоа што вака најбогатите добиваат најмногу.
Овие сегашни пензионери добиваат приход само од државниот фонд за пензиско и инвалидско осигурување (ПИОМ), но идните пензионери ќе имаат повеќе можности. Затоа ќе анализираме кој штеди за пензија и какви се резултатите од работењето на задолжителните и доброволните пензиски фондови.
Ќе видиме и зошто растат вложувањата во должнички хартии од вредност, каде што на квартална основа растот изнесува 5,5 отсто.
Ќе провериме и кој ќе плати данок на солидарност. Откако законот доби европско знаменце, јасно е дека данокот ќе мора да се плати, затоа врз основа на компаниските извештаи ќе видиме кој и колку ќе придонесе по оваа основа во буџетот.
Една од добростоечките индустрии во земјава е фармацевтската. Ќе анализираме како работат компаниите од овој сектор во Македонија, а со помош на терминалот на „Блумберг“ ќе ги видиме и бројките за светските гиганти.
Идната недела ќе се занимаваме уште со две евергрин-теми. Туризам – како и секој август, Охрид е целосно полн, но што друго може да понуди земјава. И, се разбира, инфлацијата – идната недела Државната статистика ќе објави колку пораснале трошоците за живот во јули. Оттука, ќе анализираме дали е оправдана последната одлука на НБРМ за ново зголемување на основната камата и дали затегнувањето на монетарната политика треба да продолжи.
