.webp){kind=icon}
Жените во Јапонија губат околу 111 билиони јени (761 милијарда долари) во исплати за низа домашни работи што ги вршат бесплатно. Оваа бројка е еднаква на приближно една петтина од вредноста на економијата на земјата.
Вкупниот износ на неплатена домашна работа што ја вршат мажите изнесува 32 билиони јени, што е една третина од износот за неплатената домашна работа на жените, се наведува во извештајот на кабинетот на јапонската влада. Заедно, овие плати укажуваат на јазот што постои помеѓу платите на жените и на мажите во третата економија во светот и го ставаат во фокус количеството на извршена работа што не се плаќа.
Во извештајот вредноста на неплатената работа се пресметува врз основа на потрошеното време помножено со просечната плата за двата пола и според возраста.
Bloomberg Mercury
Додека премиерот Фумио Кишида бара начин поправично да ја распредели заработката во согласност со неговата политичка агенда за „нов капитализам“, количеството на неплатена работа нагласува колкава е загубата во заработката, како и родовата поделба што сѐ уште постои во оваа земја. Економистите истакнуваат дека помалата заработка на жените е една од најголемите причини за стагнација на растот на платите во земјата во последните две децении.
Канако Кацумата, мајка на две деца, која живее во градот Фуџисава во близината на Јокохама, е меѓу жените што преземаат најголем дел од домашните работи и грижата за децата во семејството.
Bloomberg Mercury
„На некој начин е прифатено правилото дека за домашните работи главно се задолжени жените“, вели Кацумата, која моментално е на отсуство за нега на дете, а инаку работи како воспитувачка во јасли. Како што вели таа, сопругот почнал повеќе да ѝ помага кога се родило второто дете, но во јапонската култура сè уште е длабоко вкоренет ставот дека мајката треба да биде таа што ќе ги врши домашните работи.
Просечниот маж во Јапонија троши во просек по 41 минута дневно на неплатена работа, според Организацијата за економска соработка и развој, што е најниска бројка меѓу 30-те земји во кои оваа група ги следи тие параметри.
Оваа ниска бројка исто така придонесе Јапонија да има четврта по ред најголема разлика во ОЕЦД, при што жените во оваа земја работат дополнителни три часа бесплатно. Најмали разлики имаат Шведска, Данска и Норвешка, при што временската разлика во сите три земји е помала од еден час дневно.
Сепак, жените низ светот работат многу повеќе неплатена работа од мажите. Во Соединетите Американски Држави жените годишно губат околу 627 милијарди долари само поради грижата за децата и другите членови на семејството.
„Ако вредноста на неплатената работа што ја вршат жените се додаде на просечната плата, разликата во заработката меѓу половите речиси ќе исчезне“, вели Наоко Куга, виш истражувач во истражувачкиот институт НЛИ (NLI). За жените, оваа сума би била околу два милиони јени по лице.
Bloomberg Mercury
Според податоците пресметани земајќи ја предвид возраста, во групата од 20 до 44 години жени што одгледуваат деца, ако се пресмета и неплатената работа, платата е поголема од заработката на мажите. За оние на возраст од 45 до 59 години, теоретската плата на мажите останува повисока главно затоа што има поголема веројатност мажите во тие години да имаат повисоки плати на редовните работни места во споредба со жените, бидејќи тие заземаат повеќе раководни позиции во земјата.
Реико Јамамото работи со полно работно време како физиотерапевтка и истовремено се грижи за четири деца. Јамамото, која живее во Ебина, исто така во близината на Јокохама во префектурата Конагава, вели дека има исполнет живот, но дека нејзината плата е мала. Дури и да ја додаде вредноста на неплатената работа што ја работи на својата заработка, нема да може да го достигне нивото на платата на нејзиниот сопруг, вели таа.
„Реално гледано, сепак работам доволно за да оправдам плата што би била 30 отсто поголема од платата на мојот сопруг“, наведува таа.
Бројот на домаќинства со двојна заработка во Јапонија во последниве години порасна на 12,6 милиони, што е двојно повеќе од бројот на домаќинства со една заработка во кои главно мажите се тие што го издржуваат остатокот од семејството. Сепак, бројот на часовите што жените ги поминуваат во домашна работа и понатаму останува четири пати поголем од времето што го поминуваат мажите.
