Јужна Африка сака да извезува месо од зебра низ целиот свет

Јужна Африка објави стратегиски документ направен за да се искористи потенцијалот на огромната индустрија за диви животни во земјата, за извоз на повеќе месо од зебри, крокодили и други животни, како и да се зголеми локалната потрошувачка на дивечот.

Законот има цел да ја формализира индустријата во земјата во која 80 отсто од дивите животни се на приватно земјиште и се сметаат за сопственост на сопствениците на земјиштето, правна аномалија што им дава парична вредност на животните.

Досега малку месо од дивеч се продаваше формално, со само 3.000 тони месо од зебра, крокодил и ној испратени во Обединетите Арапски Емирати, Кина и во Европската Унија во 2019 година, се наведува во соопштението на Одделот за шумарство, рибарство и животна средина. Месото е помалку мрсно во споредба со говедското и јагнешкото месо.

„Очигледен е растечкиот пазар на потрошувачи што се свесни за здравјето, кои бараат производи преку одржливи извори што придонесуваат за зачувување на биолошката разновидност и за развој на заедницата и претставуваат помал ризик за животната средина“, се истакнува во документот. „Јужноафриканската индустрија за месо од дивеч е добро поставена да го опслужува тој растечки пазар на домашно, регионално и меѓународно ниво“.

Стратегијата, доколку правилно се имплементира, може да создаде 202.000 работни места до 2030 година, соопштија од одделот додека поставуваат план за промовирање на потрошувачката на месото, од кое поголем дел се произведува на фарми на кои живеат 16 милиони диви животни. Во 2016 година речиси 180.000 од нив беа убиени и можеа да бидат продадени за потрошувачка, посочуваат од одделот.

Елементите на стратегијата, кои беа одобрени од кабинетот, вклучуваат речиси двојно зголемување на количеството на производство на месо од дивеч на повеќе од 100.000 тони годишно до 2030 година, со обезбедување дека 85 отсто е погодно за човечка исхрана, од 10 отсто колку што е во моментов. Ќе се поттикне преминување од лов кон комерцијално производство и ќе се воспостават кланици.

Одделот наведува седум вида антилопи што би можеле да бидат наменети за производство на месо.

Додека Јужна Африка произведе над двојно повеќе месо од дивеч од Нов Зеланд, таа извезе вредност од само 12 милиони долари во 2020 година, во споредба со 122 милиони долари од Нов Зеланд.