.webp){kind=icon}
Податоците за инфлацијата во САД неделава покажуваат дека битката не е завршена. Трет месец по ред бројките се над очекувањата. Ова беше причина Волстрит да заврши во црвено, а драмата околу евентуалното намалување на каматните стапки да продолжи.
Во Европа состојбата е порелаксирана, инфлацијата се движи кон целните два отсто, а нашите аналитичари прогнозираат дека каматните стапки ќе се намалуваат четири пати.
Инфлацијата тргна нагоре и во земјава. Во март, месецот кога заврши мерката „гарантирана цена“, инфлацијата се зголеми на 4 отсто или на нивото од пред половина година. Млекото поскапе најмногу по одмрзнувањето на цените. Анализиравме зошто овој основен производ во Македонија е поскап отколку во Германија. Во пресрет на Велигден, расте и цената на јајцата, а нашата анализа покажа дека во изминатиот период сме почнале да штедиме и на овој производ.
Штедењето потешко ѝ оди на државата во предизборен период. Бројките покажуваат дека дефицитот во третиот квартал е значително зголемен, а нашите аналитичари во изборите гледаат ризик и за зголемување на јавниот долг.
Изборите не се единствениот фактор што ја прави земјава ранлива на економски план. Од пандемијата наваму постои тенденција услужниот сектор да расте побрзо од производството. Враќањето на рамнотежата, според експертите, е многу важно, а шансата за тоа треба да се гледа во заздравувањето на најголемиот пазар каде што завршува нашето производство – Германија.
Цените на нафтата повторно стануваат ризик. Од почетокот на годината црното злато поскапе за 18 отсто и сега типот брент се тргува по цена од над 90 долари за барел. Ваквата ситуација оди во полза на Кремљ. Приходите во рускиот буџет се за 53 отсто повисоки од лани.
Добрите вести за неделава се од областа на медицината. Според експертите, во иднина нема да има толку болести, а човековиот век ќе се продолжи од сегашните просечни 80 на просечни 120 години.
Подолг век не беше пишан на еден од симболите на Скопје, Универзалната сала. По долги години политички дебати за новиот изглед, пред еден месец почна реновирањето, а неделава изгоре новата купола.
