Инфлацијата сè уште е превисока и не е осигурен понатамошен напредок во намалувањето. Со ова образложение Федералните резерви на САД останаа на ставот дека каматните стапки не треба да се намалуваат и на шестиот состанок по ред, во средата, одлучија да не ги променат стапките. Рано е за намалување на основната камата и во земјава, особено што цените не се стабилизирани. Ова е клучната вест неделава. Ви пишува Александра Томиќ, главна уредничка на дигиталната редакција на „Блумберг Адрија“ во Скопје.
Годишната инфлација во еврозоната во април остана еднаква на таа во март и изнесува 2,4 отсто, објави неделава „Евростат“. Од друга страна, инфлацијата во Германија забрза за првпат од декември, што се совпаѓа со предупредувањата на Европската централна банка (ЕЦБ), која очекува дека ќе има проблеми за враќање на посакуваната инфлација од два отсто. Во првиот квартал од 2024 година, пак, сезонски приспособеното БДП порасна за 0,3 отсто и во еврозоната и во Европската Унија (ЕУ) во споредба со претходниот квартал.
ОЕЦД ја зголеми прогнозата за глобалниот раст за 2024 година на 3,1 отсто - од 2,9 проценти во февруари - со забележителни подобрувања за САД, Кина и Индија. Растот треба да продолжи на 3,2 отсто следната година. Инаку, по одлуката на Фед порасна цената на златото, тренд спротивен на очекувањата.
Неделата во Македонија изминува повеќе празнично и празно, а во услови на предизборна кампања за парламентарните избори и за вториот круг од претседателските избори, двете гласања закажани за 8 мај. Ден претходно, Владата ќе се задолжи за нови 39 милиони евра.
Државата го славеше Денот на трудот во глобално променети услови за работа и нови работни тенденции. Различни земји и компании досега - повеќе или помалку успешно - го тестираа моделот на четиридневна работна недела, што подразбира дека бројот на работни часови или останува на 40 или е намален на 32. Сепак, според анализите, укинувањето на канцелариите и преминувањето на целосна работа оддома нема да се случи во регионот Адрија, а според експертите мали се шансите тоа да се случи и во Европа.
Кај нас, ниската плата останува постојаност, исто и давачките за плата кои се на ниво на ЕУ, а во услови на намалување на невработеноста, сепак претстои уште многу работа за да дојдеме до раст на бруто-домашниот производ што ќе донесе подобрување на животниот стандард на работниците и воопшто на граѓаните.
Ова е период на објава на резултатите од работењето на домашните компании во првиот квартал од годината. „Алкалоид“ АД Скопје оствари консолидирана нето-добивка од 7,8 милиони евра, што е зголемување за девет проценти во однос на истиот период минатата година. Загуба од 90 илјади евра во првите три месеци годинава оствари домашното друштво „Скопски пазар“ АД Скопје, а „Македонски телеком“ ја зголеми добивката за 15,2 проценти. Нашиот аналитички тим ја анализираше во детали работата на оваа компанија. Објавувајќи за остварената добивка, „Реплек“ АД Скопје соопшти и дека во првиот квартал од 2024 година ја проширил својата географска присутност со реализација на првиот извоз кон новиот пазар во Туркменистан.
Македонски стартапи освојуваат инвеститори со апликации за попусти и за разубавување
А во земјава продолжува напливот на фалсификувани монети на евра, па Народната банка објави инструкции за проверка на монетите. Неделава Илон Маск беше во Кина, а кинескиот претседател Шји Џјинпинг од 5 до 10 мај ќе ги посети Франција, Србија и Унгарија.
Сите анализи од аналитичкиот тим се на „Блумберг Адрија инсајт“, а телевизиските читајте ги овде.
.webp){kind=icon}
Во моментов нема коментари за веста. Биди прв да коментира...