.webp){kind=icon}
Денеска во Македонија се одржуваат единаесеттите парламентарни избори од воведувањето на плурализмот. Се одржува и вториот круг од претседателските избори, чиј прв круг беше пред две недели, а се избира помеѓу двајца кандидати поддржани од двете најголеми македонски партии. Ова е една од вестите што го обележуваат денот, а ние ги носиме петте клучни вести со кои треба да ја започнете оваа изборна среда.
Како да се исплаќаат фер соодветни плати, а фирмите да не банкротираат
Соочувањето со зголемените трошоци за живот доведува до зголемен притисок од јавноста да се преземат чекори за заштита на вработените и на семејствата, особено што живееме во турбулентна и непредвидлива економска реалност. Затоа, исплата на плата доволна за покривање на животните трошоци, односно соодветна плата, станува приоритет на работодавците, а и важна ставка во создавањето одржлив бизнис.
Неодамнешно истражување покажа дека исплатата на соодветна плата станува приоритет за работодавците: 67 отсто од нив сметаат дека исплатата на соодветна плата е приоритет во нивниот бизнис. Работодавците размислуваат да им исплатат фер плата на своите вработени: 24 проценти моментално им плаќаат на своите вработени соодветна плата. Од оние што не го прават тоа, 54 отсто очекуваат да го сторат тоа во следните пет години.
Во Македонија инфлација од четири проценти во април
Tрошоците на животот во април 2024 година во однос на април 2023 година бележат зголемување од четири проценти, а цените на мало бележат зголемување од 3,5 проценти, соопшти Државниот завод за статистика (ДЗС).
„Инфлацијата мерена преку индексот на трошоците на животот во април 2024 година, во однос на март 2024 година, изнесува 0,7 отсто“, информира ДЗС.
Зголемувањето на инфлацијата во април 2024 година, во однос на март 2024 година, е резултат на зголемувањето на трошоците на животот во следните групи: транспорт за 2,8 отсто, комуникации за 1,6 отсто, храна и безалкохолни пијалаци, облека и обувки за 0,9 отсто, рекреација и култура, ресторани и хотели за 0,6 отсто, разновидни стоки и услуги за 0,4 отсто и здравје за 0,2 отсто.
Германските фабрички нарачки се намалуваат: Знак на трајна слабост
А Македонија и досега доста страдаше од слабоста на нашиот најголем трговски партнер. Нарачките на германските фабрики неочекувано паднаа во март, податок што укажува на постојана слабост во секторот, кој веќе заостанува зад подобрувањето во пошироката економија.
Побарувачката падна за 0,4 отсто во однос на претходниот месец, пркосејќи им на очекувањата на економистите за раст од 0,4 отсто. Падот го поттикнаа големите нарачки, без кои ќе имаше раст од 0,1 отсто, се наведува во соопштението на Заводот за статистика во вторникот.
Податоците ја покажуваат кревкоста на најголемата европска економија, и покрај тоа што нејзините севкупни перспективи се осветлени по контракцијата на крајот на 2023 година.
Германските менаџери разочарани од очекувањата за нивниот бизнис
Германските компании што работат во странство се најоптимистични во последните две години, но не очекуваат дека актуелната ситуација набрзо ќе се промени многу на подобро, покажува истражување на лоби-групите во рамките на индустриските комори.
Околу една третина од 4.300 анкетирани компании очекуваат економско зајакнување на нивните меѓународни локации во тековната година - раст во однос на 22 отсто во есенската анкета. Околу 19 отсто од извршните директори очекуваат забавување на економијата во споредба со 28 отсто во последното истражување. Намалувањето на цените и изгледите за намалување на каматните стапки го подобруваат нивното расположение.
Во исто време германските компании не претпоставуваат дека оваа посветла перспектива ќе влијае на нивната работа - нивните очекувања не се променети во споредба со претходното истражување, останувајќи под нивото од 2023 година и долгорочниот просек.
Шји Џјинпинг во втора посета на Србија во последните осум години
Кинескиот претседател Шји Џјинпинг од вчера е во официјална дводневна посета на Србија, по покана од претседателот на земјата Александар Вучиќ, со кого разговара за подобрување на билатералните односи и соработка.
Шји и Вучиќ треба да разговараат за широк спектар на теми, од политички, економски и технолошки до соработка во областа на културата.
Како што веќе напиша „Блумберг Адрија“, две важни теми ќе бидат дополнителните инвестиции на „Зијин“, кој управува со Рударско-топилничкиот басен Бор, како и на ХБИС, стратегиски партнер во челичарницата во Смедерево. И двете компании, најголеми извозници од Србија, најавија инвестиции во зелена технологија.
