Министерството за финансии испрати барање за покажување интерес за финансирање на проектот за изградба на брза пруга долж Коридорот 10 до 21 меѓународна финансиска институција и странски комерцијални банки. Станува збор за финансиски институции од Европа, САД, Јапонија и Обединетото Кралство, од кои дел се институции со коишто земјата и претходно соработувала на одредени проекти.
Добро утро, ова се најважните пет вести за почеток на денот.
Ќе стане ли поскапата нафта „алиби“ за вжештување на инфлацијата?
Како што се разгорува конфликтот меѓу Израел и Иран, станува јасно дека потресите на Блискиот Исток посредно дефинитивно се чувствуваат и во Македонија. Најдобар показател за тоа е последната одлука на Регулаторната комисија за енергетика, водни услуги и услуги за управување со комунален отпад (РКЕ) за зголемување на малопродажните цени на нафтените деривати, што е предизвикано од растот на берзанските цени на горивата, којшто е резултат на неизвесноста околу снабдувањето што ја носат вооружените напади меѓу двете земји.
Сега неизбежно се наметнуваат прашањата дали производителите и трговците во Македонија ќе го искористат овој тренд за да ги префрлат зголемените трошоци за горивата на грбот на потрошувачите односно дали ќе има ново зголемување на цените и следствено на тоа повторно забрзување на инфлацијата?
Оџаците на РЕК Битола лани загадувале 11 пати над дозволеното
Државата да почне да изрекува казни за ЕСМ затоа што компанијата продолжува да ги прекршува дозволените граници пропишани со Националниот план за намалување на емисиите. Ова е само една од препораките содржани во извештајот „Усогласи или затвори“ (Comply or Close) на „Бенквоч“ за минатата година.
„Во текот на седумте години од истекувањето на рокот за усогласеност со директивата на Европската унија која се однесува на големите постројки кои согоруваат фосилни горива (Large Combustion Plant Directive-LCPD), земјата успеа само да се оддалечи од усогласеноста, како во намалувањето на емисиите, така и во нивното мерење. Ниту една од електраните на јаглен сè уште нема континуирано мерење, а досега известуваа само врз основа на пресметките направени од едномесечните мерења“, стои во извештајот.
Реклама изработена од вештачка интелигенција го украде шоуто во НБА финалето
Среде финалето на НБА, во момент кога милиони гледачи очекуваат врвна продукција и препознатливи слогани на глобални брендови, најголемо внимание привлече реклама која не го носеше логото на „Најк“ (Nike) или „Гејторејд“ (Gatorade). Наместо тоа, спотот за финтек стартапот „Калши“ (Kalshi), целосно изработен со помош на вештачка интелигенција, стана вирален феномен. Цената на продукцијата била само 2.000 долари, а времето на изработка 48 часа.
Рекламата го промовира „Калши“ како платформа за тргување врз основа на реални настани – од движење на цените на јајца до спортски резултати и природни катастрофи. Во спотот, вештачката интелигенција (ВИ) генерира надреални сцени: човек што плива во јајца, вонземјанин со пиво и каубои на родео, сето тоа завршува со слоганот: „Светот полудел. Тргувај со тоа“.
Зошто големите инвеститори продаваат акции на „Енвидија“?
Основачот на хеџ-фонд Џона Ченг ја нарече „Енвидија“ најдобриот потег во својата кариера. Но сега ги продаде и последните акции од таа компанија, бидејќи се сомнева во иднината на производителот на чипови чија пазарна вредност изнесува 3,5 трилиони долари.
Поранешниот аналитичар на УБС (UBS), чиј технолошки ориентиран фонд минатата година оствари принос од 42 процента, беше меѓу инвеститорите кои со години го следеа вртоглавиот раст на „Енвидија“. Тоа беше една од првите акции што ги купил кога во 2016 година го основа фондот ЦГФ (Captain Global Fund), и повеќепати повторно инвестирал во неа. Но сега веќе не е толку сигурен.
„Ситигруп“ очекува златото да падне под 3.000 долари за унца
Се очекува златото да падне под 3.000 долари за унца во наредните квартали, бидејќи рекордниот раст избледнува, според „Ситигруп Инк.“, според која доаѓа крајот на едно од најизвонредните зголемувања кај суровините.
„Нашата пресметка сугерира дека златото ќе се врати на околу 2.500 до 2.700 долари за унца до втората половина на 2026 година“, велат аналитичарите, вклучувајќи го и Макс Лејтон. Падот може да биде предизвикан од послабата инвестициска побарувачка, подобрувањето на глобалните перспективи за раст и намалувањето на стапките од страна на Федералните резерви, велат тие.
.webp){kind=icon}
Во моментов нема коментари за веста. Биди прв да коментира...