Германија доби канцелар по вториот круг гласање. Фридрих Мерц вчера претпладне не успеа да обезбеди мнозинство во Бундестагот и за прв пат во историјата на земјата се гласаше два пати. Во првото гласање за Мерц гласаа 310 од потребни 316 пратеници. Бундестагот брои 630 члена.
Добро утро, ова се петте најважни вести за денеска.
Уриваме рекорди: Над 53 милиони евра за лекови на рецепт лани во Македонија
Вкупно 26.150.147 рецепти во износ од 3,27 милијарди денари (53,1 милиони евра) биле реализирани лани во Македонија на товар на Фондот за здравствено осигурување, покажуваат податоците од годишниот извештај за работењето на оваа институција во 2024 година. Во него се констатира дека потрошувачката на лекови на рецепт на товар на Фондот за здравствено осигурување преку аптеките бележи континуиран раст во изминатите години.
Имено, во споредба со претходната година во 2024 година бројот на рецепти е зголемен за околу 3,2 проценти, а вкупниот фактуриран износ за 9,7 проценти. Просечната потрошувачка на лекови според бројот на реализирани рецепти по осигуреник 2024 година е 14,2 рецепти, што претставува зголемување од околу 4 проценти во однос на 2023 година.
Време на дивиденди: Кои акционери ќе се насмевнат, а кои ќе бидат поднамуртени?
Пролетните месеци се период во кој компаниите од Македонската берза ги сумираат резултатите од работењето во претходната година и одржуваат собранија на кои меѓу другото се одлучува по предлозите на менаџерите за распределба на добивката, односно за тоа дали и колкава дивиденда ќе им се исплати на акционерите. Анализиравме какви се дивидендните политики за 2024 година кај компаниите што го сочинуваат берзанскиот индекс МБИ10.
Анализата покажа дека некои акционери имаат причина да бидат задоволни со оглед на тоа што ќе добијат дивиденди поголеми отколку во претходниот период, додека други ќе треба да почекаат подобри времиња или евентуално да го преориентираат својот капитал во други компании.
Блекаутот збриша 400 милиони евра од шпанската економија
Најголемиот прекин во снабдувањето со струја во историјата на Шпанија одзеде речиси 400 милиони евра (454 милиони долари) од економијата, според процена на најголемата домашна банка во земјата.
Потрошувачката на шпанските домаќинства падна за 34 отсто на 28 април, кога поголемиот дел од континентална Шпанија претрпе прекин во снабдувањето со електричната енергија што траеше неколку часа, според првичната процена на „Каиша банк“, врз основа на податоците за користењето картички, онлајн купувањата и подигнувањето готовина од банкомати. Падот беше делумно компензиран во наредните денови, што резултираше со нето намалување од 15 отсто во споредба со она што нормално би се консумирало.
„Мател“ ќе ги поскапи „барбиките“ поради новите царини на Трамп
„Мател“ (Mattel) ја повлече претходната прогноза за раст на продажбата во 2025 година, наведувајќи ја како причина најавата на американскиот претседател Доналд Трамп за воведување царини на увезени играчки.
Компанијата, која во првиот квартал постигна подобри резултати од очекуваното, во февруари предвиде дека продажбата на куклите „Барби“ (Barbie), автомобилчињата „Хот Вилс“ (Hot Wheels) и други играчки ќе порасне до три отсто во 2025 година, со што ќе се прекине тригодишниот период на стагнација или опаѓање на приходите. Се очекуваше и раст на добивката. Наместо тоа, во понеделникот „Мател“ соопшти дека „ја паузира“ годишната прогноза „поради нестабилните макроекономски услови и променливата ситуација со американските царини“.
Руската економија на крстопат: Дали ниските цени на нафтата можат да ги расипат воените планови на Путин?
Од почетокот на руската инвазија врз Украина, што се случи на 24 февруари 2022 година поминаа повеќе од три години и два месеци, или поточно 1.168 дена. Најобемната војна што го зафати Стариот континент по Втората светска војна нема крај на повидок, а забрзаните напори на администрацијата на Доналд Трамп за ставање крај на конфликтот стигнаа до ќорсокак.
Американскиот Стејт департмент пред неколку дена објави дека се повлекува од мировните преговори и дека САД повеќе нема да посредуваат меѓу Русија и Украина, останувајќи посветени на мировните напори во Украина, но со намера да ја намалат својата улога како медијатор. „Нема да летаме низ светот за да посредуваме на состаноци; тоа сега е работа на двете страни и време е тие да презентираат и развијат конкретни идеи за завршување на конфликтот“, изјави портпаролката на министерството, Тами Брус.
.webp){kind=icon}
