„Мател“ ќе ги поскапи барбиките поради новите царини на Трамп

„Мател“ (Mattel) ја повлече претходната прогноза за раст на продажбата во 2025 година, наведувајќи ја како причина најавата на американскиот претседател Доналд Трамп за воведување царини на увезени играчки.

Компанијата, која во првиот квартал постигна подобри резултати од очекуваното, во февруари предвиде дека продажбата на куклите Барби (Barbie), автомобилчињата „хот вилс“ (Hot Wheels) и други играчки ќе порасне до три отсто во 2025 година, со што ќе се прекине тригодишниот период на стагнација или опаѓање на приходите. Се очекуваше и раст на добивката.

Наместо тоа, во понеделникот „Мател“ соопшти дека „ја паузира“ годишната прогноза „поради нестабилните макроекономски услови и променливата ситуација со американските царини“.

„Мател“ произведува помалку од 40 отсто од своите играчки во Кина, за чиј извоз Трамп најави царина од дури 145 отсто. Главниот извршен директор Инон Креиз изјави во интервју дека „Мател“ ги поддржува заложбите на Асоцијацијата на производители на играчки за укинување на царините.

„Преземаме мерки за ублажување на можните последици“, порача Креиз. Компанијата ја зголеми целната заштеда за 2025 година од 60 на 80 милиони долари, го диверзифицира синџирот за снабдување и планира да ги покачи цените за некои играчки.

На конференциски повик со инвеститорите, финансискиот директор Ентони Дисилвестро изјави дека дополнителниот трошок поради актуелните царински стапки годинава би изнесувал 270 милиони долари, но очекува целосно да го надомести тој износ.

Креиз им порача на инвеститорите дека „Мател“ до 2026 година планира да го намали уделот на играчки произведени во Кина на помалку од 15 отсто за американскиот пазар, а до 2027 на помалку од 10 отсто.

Одлуката за повлекување на прогнозата донекаде ги засени позитивните вести за растот на продажбата во првиот квартал, поттикнат од зголемената побарувачка за автомобилчињата „хот вилс“ и акциските фигури.

Вкупната продажба порасна за 2,1 отсто, на 826,6 милиони долари, надминувајќи ги очекувањата на аналитичарите од 788,6 милиони. Приспособената загуба по акција е намалена на три центи, што е помалку од очекуваните 10 центи.

Првиот квартал традиционално е најслабиот период за производителите на играчки. „Мател“ потврди дека годинава планира откуп на сопствени акции во вредност од 600 милиони долари, од кои 160 милиони веќе се откупени.

Побарувачката на потрошувачите за играчките на „Мател“ продолжи да расте силно и во вториот квартал, изјави Креиз, додавајќи дека почетокот на кварталот е ветувачки. Успехот треба дополнително да го поттикне и продажбата на играчки поврзани со новиот филм од серијалот „Светот на Јура“ (Jurassic World), во продукција на „Универзал“ (Universal Pictures).

Трамп ја отфрли загриженоста за царините, изјавувајќи дека Кина „заработила билион долари“ продавајќи стоки на САД, „од кои најголем дел и не им требале“.

„Можеби децата ќе имаат две кукли наместо 30 и можеби тие две кукли ќе чинат неколку долари повеќе“, рече тој неодамна на состанок на кабинетот.

„Мател“ влезе и во филмската индустрија

Креиз се обидува да го диверзифицира работењето на „Мател“  преку продукција на филмови и ТВ-емисии базирани на познати брендови, како што беше блокбастерот „Барби“ (Barbie), кој во 2023 година го дистрибуира „Ворнер Брос“ (Warner Bros). Но и тој дел од работењето може да биде погоден од најавата на Трамп дека ќе воведе царина од 100 отсто на филмови произведени во странство.

Вториот голем филм на „Мател“ – „Господари на универзумот“ (Masters of the Universe) – треба да се појави во киносалите во 2026 година, во дистрибуција на „Амазон“ (Amazon), а најголем дел од продукцијата исто така е извршен во странство, во Обединетото Кралство.

„Холивуд е глобален центар за продукција на содржини и на сите ни е во интерес да остане таков“, рече Креиз. Прашањето, додаде тој, е како да се задржат трошоците прифатливи и истовремено да се зајакне американската филмска индустрија.

 

Во моментов нема коментари за веста. Биди прв да коментира...

Остави коментар