„Ауди“ заглави со ниски приноси поради царините на Трамп и конкуренцијата од Кина

„Ауди“ (Audi) на „Фолксваген“ (Volkswagen AG) продолжува да се бори со ниските приноси бидејќи производителот на автомобили се справува како со трошоците од царините на американскиот претседател Доналд Трамп, така и со растечката конкуренција во Кина.

Оперативната маржа на германскиот бренд изнесуваше 1,5 проценти во првиот квартал, што е мало подобрување во однос на 1,1 отсто во истиот период минатата година, соопшти денеска „Ауди“. Испораките на целосно електрични возила (ЕВ) се светла точка бидејќи се зголемиле за 30 проценти.

Американските царини што ја намалуваат вредноста на возилата во транзит од Европа влијаеја врз резултатот на „Ауди“, како и повисокиот удел на електричните возила со ниска маржа и трошоците за европските регулативи за емисии. Падот на продажбата во Кина и промената на моделите ја попречија профитабилноста на клучните брендови на „Фолксваген“ – „Фолксваген“, „Ауди“ и „Порше“ (Porsche). Сите три постигнаа договор со синдикатите за намалување на трошоците за работна сила во оваа деценија.

„Ауди“ е под притисок бидејќи кинеските потрошувачи се свртуваат кон домашните брендови, побарувачката во Европа останува пригушена, а трговските тактики на Трамп претставуваат закана дека може да влијаат врз продажбата на профитабилниот американски пазар. Како и „Порше“, „Ауди“ нема фабрика во САД, а неговото најпродавано спортско-теренско возило „Q5“ таму се увезува од Мексико.

Стратегијата на брендот за справување со американските царини зависи од тоа како ќе се развиваат царините кон Мексико и што ќе прават конкурентите, вклучувајќи ги БМВ (BMW AG) и „Мерцедес“ (Mercedes-Benz Group AG), рече главниот финансиски директор Јирген Ритерсбергер.

„Имаме можност да разговараме за цените, но прво детално ќе разгледаме како реагира конкуренцијата“, рече тој во телефонски разговор со новинарите.

До крајот на следната година „Ауди“ планира да воведе десет нови модели во САД, каде што продажбата на автомобили во 2024 година се намали за 14 проценти. Брендот во текот на оваа година ќе избере локација за локално производство, рече Ритерсбергер, додавајќи дека „Ауди“ ги оценува потенцијално спојување на производството со брендот „Скаут“ (Scout) на „Фолксваген“ и неговата постоечка фабрика во Тенеси. Какви било локални планови за производство нема негативно да влијаат врз капацитетите на европските фабрики, рече тој.

Групацијата на премиум марките на „Фолксваген“, на чело со „Ауди“ во чиј ростер влегуваат „Ламборџини“ (Lamborghini), „Бентли“ (Bentley) и производителот на мотоцикли „Дукати“ (Ducati), за годинава предвидува зголемување на продажбата и профитабилноста. Но, таа прогноза не го вклучува влијанието од царините или намалувањето на трошоците што ги спроведува компанијата во Германија, каде што „Ауди“ отпушта 7.500 работници, со цел компанијата да стане поефикасна.