Може ли американските царини да ги поевтинат автомобилите во ЕУ?

Многу прашина се крена околу влијанието на американските царини врз автомобилите. Главниот заклучок - повисоките цени најверојатно ќе бидат пренесени на американските купувачи од страна на производителите. Кој најмногу ќе ја почувствува болката од царините на Трамп и што значи тоа за европскиот пазар?

Азиските производители ќе бидат најтешко погодени од царините. Како што пресмета аналитичката компанија „Џејто дајнамикс“ (Jato Dynamics), царините најмногу ќе ги погодат производителите како „Мазда“ (Mazda), „Субару“ (Subaru) и „Џенерал моторс“ (General Motors). Синџирите на снабдување се испреплетени, а производството на автомобилските компании е распространето низ целиот свет. Меѓу европските автомобилски групи, „Стелантис“ (Stellantis), БМВ (BMW Group) и „Мерцедес“ (Mercedes-Benz) ќе бидат најпогодени од царините.

Меѓу брендовите, најчувствителни се бутик брендовите, кои продаваат помалку автомобили, но генерираат голем дел од приходите на американскиот пазар. „Масерати“ (Maserati) е најмногу зависен од американскиот пазар, генерирајќи 42 отсто од продажбата во САД, а потоа следат „Ламборџини“ (Lamborghini) и „Мекларен“ (McLaren) со 32 отсто. Повеќе од една четвртина од приходите во САД се генерирани од „Бентли“ (Bentley), „Астон Мартин“ (Aston Martin) и „Ролс-Ројс“ (Rolls-Royce). Во „Ферари“ (Ferrari), пазарот во САД е заслужен за четвртина од приходите. Уделот на „Мерцедес“ и БМВ е помал бидејќи тие компании имаат поголеми производствени капацитети во САД.

 

 

Може ли автомобилите во ЕУ да поевтинат?

Европските купувачи не се директно засегнати од американските царини. Индиректно, може да се случи трговија со автомобили произведени во Европа, кои не би можеле да се продаваат во САД поради повисоките цени. „Можно е производителите да се обидат да продаваат вишок автомобили на други пазари, вклучително и во Европа, можеби и со попусти“, вели Богољуб Марковиќ, директор на „Амадеус консалтинг“ (Amadeus Consulting).

Фердинанд Дуденхофер, кој го предводи Центарот за автомобилско истражување - КАР (Center for Automotive Research - CAR), од друга страна, не верува во ова сценарио. „Ако царините се високи, тие едноставно ќе извезуваат помалку и ќе стават поголем акцент на теренците во САД“. Тој додава дека иднината не се Соединетите Американски Држави, туку Азија. „Инвестициите ќе бидат зголемени во Кина, Индија, Виетнам и други азиски пазари“, предвидува тој.

„Исто така, треба да ги земеме предвид високите логистички трошоци на меѓуконтиненталното движење, така што проценувам дека на краток рок европските производители ќе претпочитаат да продаваат автомобили што се веќе на залиха во САД на локалниот пазар, дури и со нула или негативни маржи, наместо да ги префрлаат на други континенти“, објаснува Матеј Лаховник, професор на Економскиот факултет во Љубљана.

Долгорочно, со оглед на нивните производствени капацитети, тој очекува дека автомобилските компании ќе се обидат да ја зајакнат својата позиција на другите пазари поради помалата побарувачка во САД: „Се разбира, особено на пазарот на Европската унија (ЕУ). Тоа веројатно ќе го направат преку продажни кампањи, но особено поради очекуваните контрамерки на сметка на поскапите автомобили од САД“, вели Лаховник.

Словенците веќе купуваа возила на „Порше“ што не можеа да се продадат во САД

Но, тоа не би било првпат европските компании да понудат автомобили на домашниот пазар што нема да се продаваат во САД. Пред нешто помалку од десет години „Фолксваген“ (Volkswagen) го потресе скандалот со дизел возилата. Имено, во САД во 2016 година продажбата на „Кајен“ (Cayennes) со дизел мотори беше забранета. Компанијата потоа ги продаваше автомобилите со попусти, но сепак не можеше да ги продаде сите. За некои возила потоа се најдоа купувачи во Европа, вклучително и во Словенија. „Порше“ (Porsche) тогаш процени дека нивното транспортирање назад во Европа и нивно прилагодување за европскиот пазар ќе ги чини помалку отколку да ги продаваат во САД со големи попусти.

Царините најмногу ќе ги погодат јапонските и јужнокорејските производители. Дали овие автомобили би можеле да се пренасочат на европскиот пазар? Дуденхофер верува дека нема да ги видиме овие автомобили во Европа. „Автомобилите што се продаваат во САД се поголеми во споредба со оние што се продаваат во Европа. Во САД пикапите и големите теренци се важни и многу корисни. „Не можете да ги продавате овие автомобили во Европа“, напиша Дуденхофер.

Тој оценува дека погодените компании ќе ги приспособат производствените капацитети во Азија и ќе се обидат да произведат повеќе автомобили во Европа. „Но, без автомобили наменети за американскиот пазар кои не им одговараат на европските купувачи. Во Европа, автомобилите треба да бидат помали и поекономични“.

Електричните автомобили ќе бидат ценети

Дуденхофер очекува пониски цени на електричните автомобили. Сепак, ова нема да биде резултат на американските царини или регулаторното олеснување, туку на општите трендови на пазарот. „Цените на електричните возила ќе се намалат во следните пет години поради поширокиот опсег, иновациите во батериите и големата конкуренција од кинеските производители на автомобили. Цените на автомобилите со конвенционален погон нема да се менуваат, туку ќе се прилагодат со попусти во случај на криза. Но, ова е само привремено.“

Европската организација на потрошувачи предупреди дека електричните автомобили ќе станат поскапи и помалку достапни откако Европската комисија објави дека ќе го продолжи периодот за уште две дополнителни години - време за возачите да ги исполнат построгите правила за емисија на ЦO2. „Сегашниот моментум на помали и попристапни модели на електрични автомобили што ќе стигнат на пазарот ќе биде запрен бидејќи многу производители сега ја одложуваат продажбата на овие возила до 2030 година“.

Проблемот на европската автомобилска индустрија не е само Трамп

Европските производители на автомобили се сè понеконкурентни на другите странски пазари поради политиката на зелена транзиција на ЕУ, што ја прави енергијата поскапа и ги зголемува еколошките даноци, додава Лаховник. Тој нагласува дека индустриското производство се иселува од ЕУ поради погрешната економска политика, бидејќи ЕУ станува неконкурентна средина за индустријата.

STA

Затоа, енергетски интензивното производство излегува од ЕУ, како и производството на алуминиум, од кое автомобилската индустрија е многу зависна. Според Лаховник, Трамп е еден проблем. Друг проблем за автомобилската индустрија е Европската комисија со нејзината премногу радикална политика на зелена транзиција и заложбите дека производството на возила со внатрешно согорување повеќе нема да биде дозволено во ЕУ од 2035 година, иако е повеќе од очигледно дека европската енергетска мрежа и инфраструктурата за поддршка не се подготвени за тоа, вели Лаховник.

Ако ЕУ ги намали царините...

Доколку САД и ЕУ постигнат договор во преговорите за укинување на царините за автомобилите произведени во САД, многу возила би можеле да станат поевтини. Не само „Форд Мустанг“ (Ford Mustang) и пикапите, туку и автомобили од европски производители кои се произведуваат во САД.

Ако се укинат царините, моделите GLE и GLS на „Мерцедес“ и теренците X3, X4, X5, X6, X7 и XM на БМВ би можеле да поевтинат.

Колкав би бил падот на цената доколку се укине царината од 10 отсто? Тоа ќе зависи од производителите и од тоа дали тие ќе го пренесат намалувањето на цената на купувачите или ќе го задржат уделот во облик на повисока маржа.

BMW

Во моментов нема коментари за веста. Биди прв да коментира...

Остави коментар