Истражувачи открија повеќе од десетина метали, вклучително и олово и арсен, во широко достапните тампони во САД и Европа што ги користат потенцијално милиони луѓе.
Олово е пронајдено во сите тестирани 30 тампони од 14 различни брендови, според студијата објавена оваа недела во списанието „Енвајронментал Интернешнл“ (Environmental International). Изложеноста на олово може да предизвика невролошко оштетување. Ова е првиот труд кој ја мери концентрацијата на метали во тампоните, рече Џени Ширстон, постдокторски научник на Факултетот за јавно здравје при Беркли Универзитетот во Калифорнија и водечка авторка на студијата.
Потребни се повеќе истражувања за да се види дали металните состојки истекуваат од тампоните. Нивното присуство е особено загрижувачко со оглед на тоа што кожата на вагината е попропустлива од другите делови на телото и сè што се апсорбира во крвотокот оттаму не е прво поминато низ гастроинтестиналниот тракт или не се филтрира од црниот дроб, според авторите на студијата.
Производите кои биле предмет на тестирање биле купени од големи онлајн трговци и продавници во САД, ОК и Грција. Истражувачите не ги наведоа брендовите. Шерстон не одговори веднаш на барањето за списокот на производи.
Меѓу главните брендови тампони во светот се „Тампакс“ (Tampax) од „Проктер и Гембл“ (Procter & Gamble Co.), „Котекс“ (Kotex) од „Кимберли-Кларк Корп.“ (Kimberly-Clark Corp.) и „Плејтекс“ (Playtex) од „Еџвел Персонал Кер“ (Edgewell Personal Care Co.). Компаниите не одговорија веднаш на барањата за коментар.
Тампоните се прават со памук, вискоза или комбинација од двете. Истражувачите велат дека е можно металите да се апсорбираат од почвата од растенијата што се користат за производство на производи за менструација. Тие, исто така, може да се додадат во хемикалии кои се користат како антимикробни средства или за контрола на мирисот, се вели во извештајот.
Студијата покажа дека органските тампони содржеле помалку олово и повеќе арсен од неорганските, а тампоните купени во САД имале повисоки нивоа на олово од оние во Европската унија или Велика Британија. Истражувачите, меѓу другото, мереа и кадмиум, бакар, жива и никел.
„Нашите наоди укажуваат на потребата од регулативи кои бараат тестирање на метали во тампоните од страна на производителите“, напишаа авторите на студијата.
Во САД, Управата за храна и лекови ги регулира тампоните како медицинско средство. Агенцијата бара од производителите на тампони да покажат дека нивните производи се исти како и другите на пазарот, процес кој вклучува безбедносни тестови, иако не е јасно дали тоа вклучува и мерење на метали. ФДА не одговори веднаш на барањето за коментар.
.webp){kind=icon}
