ЕУ подготвува нов план за спроведување на трговскиот договор со САД

Европската Унија (ЕУ) подготвува план што ќе им го предложи на САД за спроведување на следната фаза од трговскиот договор што двете страни го постигнаа летово, велат лица запознаени со состојбата.

Потегот доаѓа во пресрет на средбата на европскиот комесар за трговија Марош Шефчович со неговите американски соговорници што треба да се одржи во текот на овој месец, велат анонимните извори.

Овој чекор е одговор на предлозите што Вашингтон ги испрати до Брисел во текот на годинава, со кои бара правно обврзувачки план за измена на регулативите на ЕУ за кои тврди дека им штетат на американските компании.

Договорот што во август го постигнаа претседателката на Европската комисија (ЕК), Урсула фон дер Лајен, и американскиот претседател Доналд Трамп предвидува тарифа од 15 отсто на поголемиот дел од стоките од ЕУ што влегуваат во САД, но вклучува и обврска да продолжат разговорите за прашања како извозот на челик, како и за другите регулаторни пречки и технички правила што ги отежнуваат увозот и извозот. 

Горната граница од 15 отсто важи и за автомобилите, а ЕУ настојува да се осигури дека ќе се применува и на други индустрии што би можеле да бидат погодени со секторски давачки во иднина. Како дел од договорот, мал број производи од ЕУ добиваат пониски стапки, додека Унијата има предложено закон за укинување на тарифите на американските индустриски производи и дел од земјоделските производи што не се чувствителни за европските производители.

Портпаролот на Комисијата одби да коментира за планот, но потврди дека ЕУ води разговори со САД на политичко и техничко ниво.

ЕУ е најголемиот извор на увоз во САД

Bloomberg

Таканаречениот план за спроведување, кој сè уште не е споделен со САД, би се фокусирал на пет области, велат изворите. Тие области ги вклучуваат тарифите и пристапот до пазарот, каде што ЕУ настојува да добие пониски давачки за уште неколку категории производи, меѓу кои и вино и жестоки пијалаци.

Планот предвидува и дијалог за прашања како стандардите, дигиталната трговија, техничките пречки и други трговски спорови, велат изворите. Исто така би се разгледала соработката во областа на челикот и алуминиумот, каде што Унијата сака заеднички да работи со САД во справувањето со глобалниот вишок на производство.

ЕУ сè уште се соочува со тарифa од 50 отсто на извозот на челик и алуминиум, како и на многу производи што произлегуваат од нив. Унијата е особено загрижена дека широкиот опфат на производите погодени од овие давачки може да ја поткопа горната граница од 15 отсто што ја договори со САД. Комисијата, која ги води трговските преговори за Унијата, се залага за квотен систем што би овозможил одредено количество метал да се извезува со пониски тарифи.

Предложениот план исто така предвидува формирање работна група за економска безбедност што би се занимавала со прашања како проверка на инвестиции, контрола на извозот, јавни набавки и снабдување со критични суровини, велат изворите.

Планот би ги опфатил и стратегиските набавки и инвестиции што ЕУ се обврза да ги направи со течниот природен гас и со чиповите, како дел од договорот постигнат со Трамп, велат тие.

Претставниците на ЕУ оваа недела ќе добијат брифинзи за плановите. Американскиот министер за трговија Хауард Лутник ќе присуствува на состанокот на министрите за трговија на ЕУ во Брисел на 24 ноември.