.webp){kind=icon}
Од почетокот на новата академска година во септември, Германија го поскапува студирањето за Македонците и другите студенти кои не се од земјите на Европската Унија.
Услов за добивање виза за студентите кои доаѓаат од земјите кои не се во ЕУ е да докажат дека имаат доволно пари за да се издржуваат за време на студирањето. Овој доказ сега се зголемува за околу 700 евра годишно.
Парите кои се финансиски доказ се депонираат на посебна сметка која се нарекува блокирана сметка. Парите се заклучуваат и потоа се ослободуваат во месечни рати на сопственикот на сметката, објави „Студирање во Германија“ (Studying-In-Germany), најголемата платформа за информации за студирање во оваа земја.
„Од јануари 2023 година, потребниот износ во блокираната сметка при аплицирање за германска студентска виза беше 11.208 евра (934 евра месечно). Од септември 2024 година, овој износ се очекува да се зголеми на 11.904 евра за 12 месеци, или 992 евра месечно. Овој депозит е минималниот износ што мора да го имате во вашата блокирана сметка за да демонстрирате финансиски средства (Finanzierungsnachweis) за студентска виза“, велат од платформата.
Германските власти бараат блокирана сметка и за студентите од земји на кои не им е потребна виза за Германија (како САД, Канада, Јапонија и др.).
Поседувањето на оваа сметка, според германските власти, е важно затоа што ја зголемува сигурноста на студентите, иако во некои случаи тоа ќе претставува сериозна тешкотија.
„Новиот финансиски праг веројатно ќе го направи студирањето во Германија за студентите од земјите надвор од ЕУ понапорно. Некои студенти може да се соочат со тешкотии во исполнувањето на зголемените финансиски барања, што потенцијално може да доведе до намалување на апликациите од овие земји. Сепак, оние кои ќе успеат да го исполнат прагот може да бидат финансиски постабилни и подобро подготвени за трошоците за живот во Германија.“, објаснува Алма Мифтари, раководител на истражување во „Студирање во Германија“.
Студирањето во Германија без блокирана сметка е возможно само ако постои доказ дека студентот има доволно средства преку други алтернативи.
