.webp){kind=icon}
Владата по денешната седница соопшти дека министерствата за надворешни работи и за одбрана ќе можат дополнително да одлучат за издавање одобрение за прелет и слетување на рускиот воздухоплов со кој се очекува да пристигне шефот на руската диполоматија Сергеј Лавров, за време на одржувањето на триесеттиот министерски состанок на ОБСЕ во Скопје.
„Преку ова дополнување, надлежните министерства ќе можат дополнително да одлучат за издавање одобрение за прелет и слетување на рускиот воздухоплов за време на одржувањето на министерскиот состанок, во период од 29 ноември до 1 декември 2023 година“, се вели во владиното соопштение.
Се посочува дека на седницата била донесена Одлуката за воведување рестриктивни мерки во поглед на активностите на Руската Федерација, со којашто се ограничува пристапот на руски воздухоплови, а согласно со Регулативата на Советот на ЕУ од Заедничката надворешна и безбедносна политика на Унијата, со којашто нашата земја е целосно усогласена.
Прочитајте повеќе: Османи: Процедурата за доаѓањето на Лавров во Скопје е почната
„Дополнувањето е согласно регулативата на ЕУ и одредбите во самите рестриктивни мерки, со коишто, за меѓународни конференции како што е Самитот на ОБСЕ во Скопје, се предвидени исклучоци за предметни рестрикции“, појаснуваат од Владата.
Претходно, преку соопштение информацијата ја објави и Министерството за надворешни работи, наведувајќи дека преку надополнета одлука, Владата им пренела овластување на надлежните министерства сами да можат да одлучат за издавање одобрение за прелет и слетување на рускиот воздухоплов.
Руски медиуми пред неколку дена пренесоа дека Русија побарала од Северна Македонија, која годинава претседава со ОБСЕ, да издаде визи за нејзината делегација за министерскиот состанок од 30 ноември до 1 декември. Русија, според тамошните медиуми, бара визи за 85 членови на руската делегација за учество на министерскиот состанок на ОБСЕ во Скопје. Во делегацијата ќе бидат рускиот министер за надворешни работи Сергеј Лавров, „неговиот лекар, техничкиот персонал, обезбедувањето“, 17 дипломати, меѓу кои и портпаролката на руското Министерство за надворешни работи, Марија Захарова и 24 новинари, наведуваат руските медиуми.
