Нетанјаху: Војната ќе трае додека Хамас не биде целосно уништен

Израелскиот премиер Бенјамин Нетанјаху наведе три предуслови за постигнување мир во војната со Хамас: уништување на групата, демилитаризација на Газа и „дерадикализација“ на палестинското општество.

Коментарите, дадени во авторски текст во „Волстрит журнал“ (Wall Street Journal) објавен во понеделникот, доаѓаат во време на зголемен притисок врз Израел да го намали интензитетот на конфликтот во Газа, кој започна по нападот на Хамас на 7 октомври врз јужните израелски заедници, во кој загинаа 1.200 луѓе и беа киднапирани десетици. 

„Во уништувањето на Хамас, Израел ќе продолжи да дејствува во целосна согласност со меѓународното право“, напиша Нетанјаху, нагласувајќи дека елиминацијата на Хамас „е единствениот пропорционален одговор за да се спречи повторување на такви ужасни злосторства“.

Повеќе од 20.000 луѓе загинале во Газа од почетокот на војната, според Министерството за здравство под контрола на Хамас. Поголемиот дел од палестинската територија е срамнет од израелски воздушни напади, а ОН објавија дека хуманитарната ситуација е исклучително тешка.

САД и натаму го поддржуваат правото на Израел на самоодбрана, откако ставија вето на резолуцијата на Советот за безбедност на ОН во текот на месецов со која се повикува на прекин на огнот. Сепак, претседателот Џо Бајден и неговите највисоки функционери сè повеќе вршат притисок врз Израел да го промени својот пристап кон војната против Хамас, кој е прогласен за терористичка организација од САД и од Европската Унија.

Нетанјаху во неколку наврати изјави дека војната ќе трае онолку колку што е потребно за да се уништи Хамас. Тој и неговата влада не дадоа никакви временски предвидувања поврзани со крајот на војната.

Во текстот Нетанјаху посочува дека неговата влада мора да се погрижи Газа повеќе да не се користи како база за напади врз Израел. Тоа би барало „воспоставување привремена безбедносна зона на периметарот на Газа и механизам за инспекција на границата Газа - Египет што ќе ги задоволи безбедносните потреби на Израел и ќе го спречи шверцот на оружје“, напиша тој.

Американскиот државен секретар Антони Блинкен минатата недела порача дека кампањата на Израел мора да се префрли од масовни напади кон попрецизни операции за да се намали бројот на палестински цивилни жртви.

Се очекува министерот Рон Дермер, близок соработник на Нетанјаху и поранешен амбасадор во САД,  да биде во Вашингтон во вторник, на разговори со претставници на Белата куќа и Стејт департментот за плановите на Израел за намалување на воените дејства, објави „Аксиос“ (Axios), цитирајќи израелски и американски официјални лица, кои не ги именуваше.

Во моментов нема коментари за веста. Биди прв да коментира...

Остави коментар