.webp){kind=icon}
Прашањето на апанажата е нешто што не може да се коментира, бидејќи се работи за законско решение, изјави претседателот на СДСМ и поранешен премиер, Димитар Ковачевски, по веста, која најпрво ја објави „Блумберг Адрија“, дека тој и поранешниот министер за внатрешни работи Оливер Спасовски цела година ќе земаат апанажа од околу 2.500 евра.
Ковачевски наедно посочи дека со неговото барање се докажуваат како лажни обвинувањата од опозицијата дека има свои бизниси и фирми.
„Јас бев претседател на Владата во исклучително тешко време и својата функција ја обавував согласно законите на Република Северна Македонија, согласно Законот за влада и согласно Законот за избори и поднесов оставка, така што сите одлуки што се носени после тоа во однос на примањата на функционерите кои обавувале такви функции се направени согласно законот, согласно со одлуки на Собранието. Сметам дека сите треба да ги почитуваат законите и токму како резултат на такви закони коишто се почитуваат имаме зголемување и на минималната плата за огромен процент повеќе во однос на 2016/2017 година и имаме зголемување на просечната плата. Така што, тоа е нешто што не може да се коментира, тоа е нешто што е законско решение“, одговори Ковачевски на новинарско прашање во врска со барањето за апанажа при денешната посета на Тетово.
Тој посочи и дека не е точно дека со поднесување оставка или со разрешување, според одлука на Уставен суд, не следува апанажа.
МИА
„Оставката е поради исполнувањето на законската обврска мандатот да престане на 100 дена пред одржување на изборите и во согласност со тоа завршува мандатот. Така што кој и да е претседател на владата, неговиот мандат завршува на 100 дена пред изборите во согласност со законската регулатива – Закон за влада и Закон за избори“, потенцира Ковачевски.
Во однос на можноста за укинување на апанажата, тој смета дека тоа треба да се види во парламентот, но и дека треба да следува апанажа доколку некој извршувал општествена функција или каква било друга функција.
„Јас сметам дека доколку некој извршувал општествена функција или каква било друга функција, тогаш треба да следува апанажа, да може да искористи одреден временски период за својата кариера да ја насочи кон нешто друго. Ако го прашате директорот на една приватна компанија, кога работите и во приватни компании на именувани функции, тогаш исто така следуваат такви договорни обврски во кои се дава одреден период за да може кариерата да се насочи во друга насока. Така што не би сакал да давам популистички изјави дека нешто не треба да се прави бидејќи тоа се однесува на многу избрани и менувани функционери“, вели Ковачевски.
Тој денеска исто така најави дека пратеничката група на СДСМ ќе поднесе измени на сите закони со кои се регулираат платите на функционерите со цел платите на овие лица да не пораснат.
„Најдовме уставно издржано решение со кое нема да пораснат платите на функционерите со новото ниво на просечната плата. Со ова решение постојните коефициенти ќе бидат намалени, со што платите на сите избрани и именувани лица нема да пораснат“, изјави Ковачевски.
Минатата година во март со одлука на Уставниот суд, со која се укина членот 4 од Законот за изменување и дополнување на Законот за плата и други надоместоци на избрани и именувани лица, се одмрзнаа платите на избраните и именуваните лица и беа зголемени за 78 проценти.
По реакциите на јавноста, Владата формира работна група што требаше да најде решение. Владините претставници тогаш посочуваа дека се потребни измени на седум законски решенија.
