Гордана Силјановска Давкова освои двојно повеќе гласови од својот противкандидат Стево Пендаровски на првиот круг од претседателските избори во земјава.
Кандидатката на опозицијата, според податоците на Државната изборна комисија на обработени над 87 отсто од гласачките ливчиња, освои над 315.000 гласа. Актуелниот претседател Стево Пендаровски, кој е поддржан од власта, освои околу 157.000 гласа.
Силјановска и Пендаровски од утре ја продолжуваат кампањата пред соочувањето во вториот круг на 8 мај.
„Ова е крајот на првиот круг, доаѓа вториот круг, јас ќе се однесувам и во вториот круг кон оној со кој ќе треба да се натпреварувам, со должна почит. Се разбира очекувам таков однос. Не мислам дека треба да фрлиме сенка кон она што се случуваше денеска, треба да ги инспирираме граѓаните, да ги увериме дека вреди да се учествува на избори, да се чуе дека сум горда, особено на граѓаните, а без граѓани нема горда Македонија“, изјави вечерва Силјановска.
Пендаровски пак изјави дека резултатите не се како што очекувале, но се надева дека во следните две недели ќе успее да го наметне својот концепт кај гласачите.
„Тргнуваме од нула, од почеток. Моја задача ќе биде, како и во изминативе 20 дена, да го промовирам концептот во кој длабоко верувам, а тоа е интегрирана држава, без поделби. Ги охрабрувам граѓаните кои не излегоа во првиот круг, да учествуваат во вториот круг, затоа што веруваат дека победникот ќе се решава во вториот круг. Очекувам уште поголем одзив и уште поголем бројка да го препознаат концептот – демократска, просперитетна држава, рамноправна со сите нации“, рече Пендаровски.
Од албанскиот блок партии, Бујар Османи од ДУИ освои над 108.000 гласа, а Арбен Таравари над 76.000 гласа.
.webp){kind=icon}
