Национален штрајк во Израел поради неуспехот за спас на заложниците

Еден ден по откривањето на телата на шест заложници во Појасот Газа, денеска започна голем штрајк предводен од израелската синдикална организација Хистадрут, како протест против неспособноста на владата да му стави крај на конфликтот, јавија светските агенции.

Многу градови и заедници се приклучија на протестот, додека други одбија поради нивната поблиска соработка со десничарската религиозна влада на премиерот Бенјамин Нетанјаху. Mеѓународниот аеродром „Бен Гурион“ во близината на Тел Авив функционира речиси нормално, откако утрово не работеше неколку часа.

Хистадрут вчера објави дека планира да ја парализира земјата со еднодневен генерален штрајк. Целта е да се зголеми притисокот врз Нетанјаху за да се согласи на договор за ослободување на преостанатите заложници.

Во многу градови, градинките, банките и државните канцеларии останаа затворени, а јавниот превоз исто така беше погоден. Вчера стотици илјади луѓе веќе бараа итен договор со милитантната палестинска организација Хамас, во најголемите масовни протести од почетокот на војната во Газа пред речиси 11 месеци.

„Не можеме повеќе да гледаме настрана и да молчиме“, изјави лидерот на Хистадрут, Арнон Бен-Давид, за веб-страницата „Јнетњуз“ (Ynetnews). „Тоа што Евреи се убиваат во тунелите на Газа е неприфатливо. Мора да постигнеме договор (со Хамас), договорот е поважен од што било друго“, оцени тој.

Израелските одбранбени сили (ИДФ) вчера информираа дека нивните војници ги пронашле телата на шесте заложници во подземен тунел во јужниот дел на Газа. Според војската, тие биле убиени од милитантите на Хамас непосредно пред тоа.

Четворицата мажи и двете жени биле киднапирани за време на терористичкиот напад предводен од Хамас во јужен Израел на 7 октомври, соопшти ИДФ. Израел тврди дека Хамас ги убил сите шест заложници непосредно пред пристигнувањето на израелските сили во тунелот во кој биле држени. Тројца од нив, меѓу кои и еден израелски Американец, наводно требало да бидат ослободени во првата фаза на договорот за прекин на огнот за кој се дискутираше во јули.

Министерството за здравство на Израел соопшти дека аутопсиите утврдиле дека заложниците биле убиени со близок истрел и починале во четвртокот или во петокот.

Нетанјаху го обвини Хамас, изјавувајќи дека „оној што убива заложници не сака договор“. Хамас ги обвини Израел и САД за нивната смрт, обвинувајќи ги дека ги одолжуваат преговорите со нови барања, вклучувајќи и трајна контрола на Израел над два стратегиски коридора во Газа.

Еден од шесте заложници беше израелскиот Американец Херш Голдберг-Поли (23), кој изгубил дел од левата рака во нападот. Во април Хамас објави видео на кое беше покажан жив, предизвикувајќи протести во Израел. Тој беше еден од најпознатите заложници, а неговите родители водеа високопрофилна кампања за ослободување на заробениците, организирајќи средби со претседателот Џо Бајден и папата Франциск и обраќајќи се на Демократската национална конвенција минатиот месец.

Бајден вчера изјави дека е „разочаран и бесен“. Белата куќа соопшти дека тој разговарал со родителите на Голдберг-Поли и им изразил сочувство.

Најмалку 40.602 Палестинци се убиени, претежно жени и деца, а 93.534 се ранети во војната на Израел во Газа, според Министерството за здравство во областа контролирана од Хамас. Нападите на Израел, предводени од Хамас на 7 октомври, резултираа со смрт на повеќе од 1.190 луѓе, претежно цивили, според официјалните израелски податоци. Околу 250 заложници беа земени на 7 октомври. Израел сега верува дека околу сто лица остануваат во заробеништво, вклучувајќи 35 за кои се претпоставува дека се мртви. Повеќе од сто лица беа ослободени за време на прекинот на огнот во ноември во замена за ослободување Палестинци затворени од Израел. Осуммина беа спасени од израелските сили. Израелските војници по грешка убија тројца Израелци што избегаа од заробеништво во декември.