Кремљ вели дека Трамп му праќал тестови за ковид на Путин додека бил претседател

Кремљ потврди дека поранешниот американски претседател Доналд Трамп додека бил на функцијата му испратил уреди за тестирање од ковид-19 на рускиот претседател Владимир Путин, во екот на пандемијата, како што е опишано во новата книга на новинарот Боб Вудворд.

Портпаролот на Кремљ, Дмитриј Песков, во средата изјави дека тестовите биле испратени, но ги негираше тврдењата во книгата дека двајцата лидери разговарале телефонски неколкупати откако Трамп ја напуштил функцијата.

„Ние исто така испративме опрема на почетокот на пандемијата“, наведе Песков во писмен одговор на прашање за книгата. „Но за телефонските повици  - не е точно“.

Книгата на познатиот новинар од славниот Вотергејт посочува дека Трамп, додека бил претседател во 2020 година, тајно му испраќал уреди за тестирање „Абот ковид“ (Abbott Covid) на Путин кога уредите биле дефицитарни, според „Си-ен-ен“ (CNN).

Bloomberg Mercury

Во изјава претходно во вторникот, кампањата на Трамп ги отфрли обвинувањата, велејќи дека „ниту една од овие измислени приказни на Боб Вудворд не е вистинита“ и го обвини новинарот за пристрасност.

„Претседателот Трамп не му даде апсолутно никаков пристап за оваа книга што припаѓа или во кантата за џабе или во делот за фикција на книжарниците или, пак, може да се користи како тоалетна хартија“, напиша во изјава Стивен Чеунг, директор за комуникации во кампањата на Трамп.

Американската потпретседателка и актуелна демократска претседателска кандидатка Камала Харис се обиде да профитира од известувањето за книгата.

„Тоа е само најновиот остар пример за тоа кој е Доналд Трамп“, рече Харис во вторникот во интервјуто за шоуто на Хауард Стерн.

Потпретседателката рече дека луѓето „се мачеле да дојдат до тие уреди“ за време на пандемијата, додавајќи: „И овој човек, кој е претседател на САД, ги испраќа во Русија, кај диктатор убиец, за негова лична употреба?“

„Верувам дека Доналд Трамп има желба да биде диктатор“, рече Харис. „Тој им се восхитува на силните мажи, но тие го изигруваат затоа што мисли дека се негови пријатели, па целосно го манипулираат со ласкање и со наклонетост“.

Претседателот Џо Бајден исто така го критикуваше Трамп поради извештајот за време на собирањето средства за демократскиот сенатор Боб Кејси од Пенсилванија во вторникот вечер.

„Тие тестови за ковид беа дефицитарни, па тој го побарал својот добар пријател Путин, не на шега, за да се увери дека ги добил тестовите“, рече Бајден. „Што не е во ред со овој човек?“

Односот на Трамп со Путин е на нишан на демократите, вклучувајќи ги и Харис и Бајден, кои сакаат да го прикажат републиканскиот претседателски кандидат како премногу наклонет кон диктаторите и како закана за безбедноста на САД и нивните сојузници.