Во Белград деновиве се одржува Interconnect Business Executive Summit, на кој се собраа претставници на мултинационални компании чиј вкупен годишен обрт надминува 50 милијарди евра и речиси 200 компании од Западен Балкан кои извезуваат на 124 пазари ширум светот.
За впечатоците од самитот и соработката во регионот за Блумберг Адриа ТВ зборуваше претставникот на германската компанија Zentis, Лукас Лутгоб. Тој им порача на компаниите од регионот дека најважно е да се обединат и да се држат заедно, бидејќи на тој начин ќе имаат полесен пристап до светскиот пазар.
„Најважно за компаниите од регионот е да се обединат и да се држат заедно, не да се одвојуваат и да се натпреваруваат со соседите, туку да најдат начини за соработка. Обединети, вие сте многу помоќни и на тој начин можете лесно да преговарате за цените и пристапот до светскиот пазар“, изјави Лутгоб.
Компанијата Zentis се занимава со производство на џем и производи од овошје, а тој вели дека неговата компанија, но и генерално германските компании, сакаат да соработуваат со регионот поради квалитетните производи.
Лутгоб додава дека се свесни за квалитетот на производите, особено капините и малините и дека земјоделците се на висина на задачата кога е производството во прашање.
„Потрошувачите сакаат да имаат чисти производи, важно им е да знаат од каде доаѓа производот, сакаат да знаат што има во производот, сето тоа мора да биде транспарентно и истакнато на производот, сакаат да видат дека производот е чист и природен“, нагласи тој.
.webp){kind=icon}
