„Балканскиот економски форум е една нова инцијатива што треба да каже која е моќта за справување со која било криза и како да излеземе од турбулентен период“, рече вицепремиерот задолжен за економски прашања Фатмир Битиќи, во гостувањето на Блумберг Адрија ТВ, за време на форумот што се одржува во Скопје. Според него, регионот мора да се насочи кон регионалната конкурентност наместо регионалната конкуренција.
„Сметам дека ерата на конкурирање еден на друг треба да е веќе надмината и треба да се влезе во нова ера на конкурентност и заедничка соработка, за заеднички да излеземе од кризата, независно дали зборуваме за енергетската или економската криза. Сметам дека тоа е клучот на успехот на овој регион“, вели Битиќи.
Владиниот претставник рече дека годинава помошта за компаниите што влегле во инвестициски циклус ќе надмине 70 милиони евра и тоа, според него, е помош токму во насока компаниите да ја зајакнат својата конкурентност.
„Владината поддршка е од повеќе аспекти. Ние веќе најавивме дека во новата година сите стопанственици што се на регулираниот пазар ќе добијат поевтина струја, а со тоа ќе станат и поконкурентни, а за големите компании се прават последните напори за да го обезбедиме ветеното“, вели Битиќи.
За вицепремиерот проектираната инфлација од 7,1 отсто за следната година е реална доколку сите чинители на пазарот се однесуваат етички.
„Упатувам уште еднаш апел до сите да се однесуваме со одредени етички и морални принципи во пазарната економија за да не посегнеме по мерки што не се вообичаени за пазарната економија. За жал, гледаме дека одредени прехранбени продукти, особено во минатите месеци, не ги следеа стапките на инфлација, туку беа два-три пати повисоки. Јас сум поборник на фер пазарни практики. Не можам да прифатам маржите од пет отсто, кога беа замрзнати, потоа во еден ден да отидат на 65 отсто и по одредени инспекции се покажа дека кај некои продукти тоа навистина е направено, па цените се вратија назад“, вели Битиќи.
Целиот разговор со вицепремиерот за Блумберг Адрија ТВ погледнете го во видеото.
.webp){kind=icon}
