.webp){kind=icon}
Од 1 август се укинуваат сите дозволи што се разменуваа на реципрочна основа на годишно ниво, а кои се однесуваат за превоз на стока што се врши за и од трети земји помеѓу Македонија и Србија. Ова подразбира целосна либерализација на транспортот на стока и се однесува за сите еколошки возила, почнувајќи со стандард од евро 1, евро 2, евро 3, евро 4, евро 5 и евро 6, соопшти Министерството за транспорт и врски.
Овој договор е постигнат во рамките на Македонско-српската мешана комисија за меѓународен патен транспорт на патници и стока, која заседаваше деновиве во земјава.
Според Министерството, постигнат е договор за либерализација од 15 јуни годинава и за наизменичниот превоз на патници да се врши без дозволи.
„Ова најпрво е огромен успех за транспортерите од двете земји, успех е за Република Северна Македонија и Република Србија. Постигнавме историски договор, целосно ги укинуваме дозволите во патниот и товарниот транспорт и сето ова го правиме за развојот на двете земји, за економски напредок во регионот и за подобра економска соработка меѓу Северна Македонија и Србија. Ова е нешто за што напорно работевме со мојот колега, министерот Весиќ, со огромната поддршка на владите на двете земји. Ова е вистинската политика за олеснување на работата на превозниците и ова треба да биде пример за целиот регион“, рече министерот за транспорт и врски Благој Бочварски.
Одлуката за либерализација на транспортот е дел од иницијативата Отворен Балкан и целите утврдени со меморандумот за разбирање и соработка за олеснување на увозот, извозот и движењето на стоките и патниците во Западен Балкан.
