Струјата за српските фирми 95 евра, за македонските 800 евра

Владата на Србија препорача на државното Електростопанство (ЕПС) струјата за стопанството од 01 септември до крајот на годината да ја продава по цена од 95 евра за мегават час без ДДВ.

Досегашната цена на струјата за стопанството изнесуваше 75 евра за мегават час, што е поскапување од 20 евра за мегават.

Српската влада во соопштението наведува дека на денешната седница донела заклучок дека компаниите кои немаат право на гарантирано снабдување од 01 септември до 19 ноември ќе плаќаатпо 123 евра за мегават без ДДВ. Досега оваа цена изнесуваше 97,5 евра за мегават час.

За компаниите од одбранбената индустрија цената ќе изнесува 86,13 евра по мегават час, без ДДВ, a досега чинеше 68 евра за мегават.

И со ова покачување на цените на струјата за компаниите во Србија, тие ќе плаќаат многу пониски цени од македонските компании.

Домашните фирми кои се снабдуваат на отворен пазар немаат никаква поддршка од Владата и струјата ја купуваат унгарската берза каде вчера цената изнесуваше над 800 евра за мегават час, а денеска падна за 8,5 отсто.

Бизнисот во земјава со месеци реагира и бара  мерки од Владата за да се регулира цената на енергенсот кој предзвикува поскапување на сите производи што пак, влијае на високата инфлација.

Последното барање го испрати Сојузот на стопански комори кои побараа државната ЕСМ да го зголеми производството на струја, а трговската маржа да биде ограничена. Ваквото барање се должи на тоа што вишоците на струја во ноќните часови, конкретно од 2 до 7 наутро ЕСМ ги продава по цена пониска од 300 евра за мегават час, а потоа трговците ја препродаваат струјата по цени од унгарската берза.

Земјава има највисоки цени на струјата за компаниите во целиот регион. На европско ниво, со домашните копмании можат да се мерат фирмите од Германија и Унгарија. 

Во моментов нема коментари за веста. Биди прв да коментира...

Остави коментар