САД и Иран се стигнати поблиску до продолжување на прекинот на огнот и рестартирање на преговорите за долгорочен мировен договор, објави „Асошиејтед Прес“ (Associated Press), дури и иако застојот се интензивира околу Ормускиот Tеснец.
Промената на наративот од Вашингтон - од најави за целосна блокада на Ормускиот Теснец до очекувања за можен напредок - остави многу отворени прашања, вклучувајќи ја и судбината на збогатениот ураниум на Иран. Израел инсистира иранскиот збогатен ураниум да биде отстранет, додека Доналд Трамп изрази незадоволство од информациите дека САД побарале Иран да прифати 20-годишна забрана за збогатување, нагласувајќи дека на земјата не смее да ѝ се дозволи да поседува нуклеарно оружје.
Оптимистичката оцена на Трамп за тоа што следува сепак го поттикна глобалниот пазарен сентимент, при што акциите пораснаа, а неколку водечки индекси ги избришаа загубите од почетокот на војната во февруари. Нафтата делумно ги надомести загубите во средата, еден ден по остриот пад.
Добро утро, ви пишува Игор Петровски од дигиталната редакција на „Блумберг Адрија“, ова се пет вести за почеток на денот.
САД и Иран веројатно ќе ги продолжат преговорите за траен мир
Двете страни имаат „во принцип договор“ да продолжат со дипломатијата по неубедливата почетна рунда разговори во Пакистан за време на викендот, објави АП, повикувајќи се на регионални претставници што не ги идентификуваше. Медијаторите се залагаат за компромис за отворените прашања, вклучувајќи го Ормуз и нуклеарната програма на Иран, пред да истече примирјето од 7 април следната недела, објави новинската агенција.
Американскиот претседател Доналд Трамп во вторникот ја намали можноста за обнова на борбите, изјавувајќи за „Фокс Бизнис“ (Fox Business) дека речиси седумнеделната војна е „близу до крај“. Сепак, тензијата останува висока околу Ормуз, при што американската поморска блокада ги прекинува иранските текови на нафта во стратешкиот воден пат, додека Техеран го држи теснецот затворен за други пратки.
Како статусот на златото како сигурно прибежиште ги турка цените до рекорди
Со векови златото е сигурно прибежиште во време на политичка и економска неизвесност. Неговиот статус на стабилно вредна стока што лесно се транспортира и може да се продаде насекаде создава чувство на сигурност кога сè друго е во превирања.
Инвеститорите во изминатата година масовно се насочија кон златото, особено кон фондови тргувани на берза поддржани со злато, поттикнати од трговската војна на претседателот Доналд Трамп, неговите закани за независноста на Федерални резерви, геополитичките тензии и загриженоста поради растечкиот јавен долг. Централните банки исто така продолжија да ги зголемуваат своите златни резерви. Ова го поттикна благородниот метал да достигне серија рекордни цени и да го надмине својот инфлациски приспособен врв од 1980 година. Кон крајот на јануари за првпат ја надмина границата од 5.000 долари за тројска унца.
Каде најмногу „љубат“ Македонците да ги вложат своите пари, а да не е тоа стан?
Нивното височество, банките, си остануваат и понатаму најсигурното место за чување на вишокот пари на македонските граѓани и компании, и покрај веќе подолготрајниот тренд на ниски каматни стапки на депозитите. Се разбира, ако не ги земеме предвид становите, омилената форма на чување на вредност во Македонија и на Балканот.
Анализиравме освен депозитите, во какви сѐ останати финансиски инструменти Македонците претпочитаат да ги вложуваат своите пари.
Зошто Македонија и регионот се најзасегнати од растот на цените на вештачките ѓубрива?
Клучната суровина за голем дел од минералните ѓубрива е амонијакот, а неговото производство е многу енергетски интензивно. Цената на гасот останува клучен фактор на трошоци за индустријата за ѓубрива и причината зошто Блискиот Исток е клучен регион за производство, особено на азотни ѓубрива како што е уреата, додека сулфурот се користи во производството на фосфор и сложени минерални ѓубрива.
Ескалацијата на конфликтот на Блискиот Исток затоа има далекусежни последици за инфлацијата преку синџирот: енергија - минерални ѓубрива - храна - инфлација. Цените на уреата и сулфурот од Блискиот Исток се удвоија од крајот на вториот месец, додека цената на амонијакот се зголеми за околу 50 проценти, токму во раната пролет, за време на сеидбата кога земјоделците интензивно применуваат минерални ѓубрива.
„Спејс екс“ ќе кани големи инвеститори на разгледување на погоните пред ИПО-то
„Спејс екс“ (SpaceX) се подготвува да ги однесе потенцијалните инвеститори во својата иницијална понуда на акции (ИПО) на турнеја низ водечките локации на компанијата во Америка, велат луѓе запознаени со плановите. Да потсетиме, компанијата за ракети, сателити и вештачка интелигенција на милијардерот Илон Маск се стреми кон најголемото деби на берза во историјата.
„Спејс екс“ сака да ги претстави објектите во Калифорнија и Тексас во текот на неколку дена во посети за инвеститори кои би можеле да земат големи удели во ИПО-то, како што се државни инвестициски фондови, хеџ фондови, и др., велат изворите. Компанијата планира да изнајми авион од Њујорк во наредните недели за посети на инвеститори кои би можеле да го вклучат и Мисисипи - каде што „Екс еј ај“ (xAI) гради огромен кампус на центар за податоци, рече еден од бриферите.
.webp){kind=icon}
