Уште ебола недостигаше – пет вести на денот

Светската здравствена организација (СЗО) прогласи меѓународна здравствена вонредна состојба поради новото ширење на ебола во Демократска Република Конго и Уганда, предупредувајќи дека реткиот сој бундибуџио (Bundibugyo) на вирусот можеби се ширел со недели без да биде откриен и дека во моментов не постои одобрена вакцина или специфичен третман за оваа варијанта.

Добро утро, ви пишува Владимир Николоски од дигиталната редакција на „Блумберг Адрија“. Подолу петте вести што ги издвоивме за почеток на денот.

 

Како да се профитира од тргување со иста акција на повеќе берзи?

Откако ја совладавме теоријата за двојно котирање и регионалните примери како што се „Крка“ и НЛБ, (Што носи „двојното котирање“? | Блумберг Адрија) клучното прашање за секој инвеститор е: како да се профитира од тргувањето со иста акција на повеќе берзи? Двојното котирање не е само техничко прашање на котирање на повеќе берзи, туку отвора и дополнителни можности и ризици што инвеститорите можат да ги користат за подобро следење на пазарот, поефикасно управување со позициите и донесување поквалитетни инвестициски одлуки.

Најосновната стратегија што ја користат инвеститорите е арбитражата. Со оглед на тоа што со истата хартија од вредност (или нејзиниот еквивалент како што е GDR) се тргува на два различни пазари, теоретски цената треба да биде идентична. Сепак, поради разликите во временските зони, валутите или локалните вести, често се случуваат краткорочни отстапувања. Инвеститорите тогаш ја купуваат акцијата на берзата каде што е потценета и истовремено ја продаваат каде што е преценета.

 

DRAM ETF експлодира речиси 100 проценти - како да инвестирате во вештачка интелигенција и мемориски чипови?

Постојат ЕТФ-ови (од англиски: exchange-traded fund – фондови кои се тргуваат на берза) кои се лансираат, привлекуваат внимание и полека растат со текот на годините. Сепак, фондот ДРАМ (DRAM), кој има принос од речиси 100 проценти од 2 април 2026 година, собра 9,7 милијарди долари средства за 36 трговски дена, што го прави еден од најбрзо растечките тематски ЕТФ-ови во историјата на финансиските пазари. За споредба, ова темпо на собирање капитал го следи, па дури и го надминува самиот биткоин ЕТФ и неколку фундаментално различни категории на фондови.

Зошто е создаден овој ЕТФ? ДРАМ ЕТФ e создаден како одговор на специфичен проблем што го имаа малопродажните и институционалните инвеститори, а тоа е како да се добие чиста изложеност на мемориски чипови, кои станаа најкритична компонента на целиот синџир на вештачка интелигенција, без да се има изложеност на други сегменти на вештачката интелигенција?

 

Илон Маск го изгуби случајот против Сем Алтман за иднината на „Опен еј-ај“

Поротата ги отфрли тврдењата на Илон Маск дека „Опен еј-ај“ (OpenAI) под водство на Сем Алтман ја издала својата мисија да и користи на јавноста со тоа што се претворила во профитен бизнис, утврдувајќи дека тој чекал предолго за да ја тужи компанијата. Пресудата донесена во понеделник во федералниот суд во Оукленд, Калифорнија, следува по судењето за горчливата расправија меѓу претприемачите кои работеа заедно за да го лансираат стартапот во 2015 година.

„Опен еј-ај“ оттогаш еволуираше во една од највредните и најмоќните компании за вештачка интелигенција во светот. „Мислам дека има значителен број докази што ги поддржуваат наодите на поротата“, рече окружната судијка на САД, Ивон Гонзалез Роџерс, кога го прифати едногласниот заклучок на деветчлената порота по околу два часа размислување.

 

Иран воведе осигурување за пловидба низ Ормускиот Теснец, ќе се плаќа со биткоини

Иран воведе услуга за осигурување за бродски компании што сакаат да пловат низ Ормускиот Теснец, а ќе се плаќа со биткоини, објави полуофицијалната агенција „Фарс“, повикувајќи се на документи од иранското министерство за економија и финансии. Услугата наречена „Ормуз сејф“, според иранската влада, би можела да донесе повеќе од 10 милијарди долари приходи за Исламската Република, објави „Фарс“, без да наведе временска рамка или детали за начинот на функционирање.

Иран практично го затвори Ормускиот Теснец - клучен коридор за глобалните испораки на енергенти и друга стока - откако САД и Израел започнаа воздушни напади врз земјата на 28 февруари. Владата и Исламската револуционерна гарда оттогаш се обидуваат формално да ја зацврстат контролата врз водниот пат, вклучувајќи и преку воведување патарини и други такси. Осигурителната услуга би можела да биде уште еден начин за собирање средства.

 

„Рајанер“ со предупредување за нов раст на трошоците

„Рајанер“ предупреди на зголемени трошоци во 2026 година доколку незаштитените цени на авионското гориво останат на сегашното ниво, како и поради повисоките сметки за гориво, екипаж и одржување на авионите. Ирската авиокомпанија соопшти дека трошоците по единица за фискалната 2027 година би можеле да се зголемат за среден едноцифрен процент, додека цената за 20 проценти од нејзините незаштитени потреби за гориво нагло пораснала.

„Рајанер“ за оваа година обезбеди 80 проценти од своето гориво по цена од 67 долари за барел, што ќе ја заштити добивката и ќе обезбеди предност во однос на другите превозници, беше објавено во понеделникот. Сепак, авиопревозникот наведе дека е „уште прерано“ за давање какви било значајни прогнози за добивката поради значителната нестабилност на цените и снабдувањето со гориво, како и недостигот од јасност околу тоа колку долго ќе трае конфликтот на Блискиот Исток.