По речиси една година преговори, прекини и политички пресврти, Европската Унија конечно стави потпис на трговскиот договор со САД. Со него засега се избегнува нова рунда царини што ја најавуваше Доналд Трамп, но договорот не значи дека трговската војна е завршена. Металите, технологијата и дигиталните правила остануваат следните точки на судир меѓу Брисел и Вашингтон.
Според договорот, Европската Унија ќе ги укине царините за американските индустриски производи и за дел од земјоделските производи, додека за европскиот извоз во САД ќе важи максимална царинска стапка од 15 отсто. Со тоа Брисел добива барем привремено олеснување од заканите на Трамп за нови царини, но и дополнително време за решавање на отворените прашања што и понатаму ги оптоваруваат трансатлантските односи.
Добро утро, ви пишува Анита С. Буховски од дигиталната редакција на „Блумберг Адрија“. Во продолжение се петте вести што ги издвоиме за почеток на денот.
Државата ќе го спасува ПИОМ со парите од Агенцијата за вработување
Се кратат парите за Агенцијата за вработување (АВРМ) за да има повеќе за Фондот за пензиско и инвалидско осигурување (ПИОМ). Ова е предвидено со предложените измени на Законот за придонеси од задолжително социјално осигурување. Измените во Собранието се доставени завчера од пратеници од владеачкото мнозинство и треба да се донесат по скратена постапка. На вчерашните комисиски седници не беа поднесени амандмани.
Сегашната стапка која се издвојува за ПИОМ изнесува 18,8 отсто, со измените во Законот таа ќе стигне до 19,9 отсто. Издвојувањето пак за осигурување во случај на невработеност од сегашните 1,2 отсто ќе се сведе на само 0,1 отсто. Мерката се планира да биде преодна, односно да важи од платата за јуни до платата за декември годинава.
Македонците навлечени на протеини: Експанзија на „фит“ индустријата
Пред околу три децении кога некој ќе спомнеше протеини, првата асоцијација беа бодибилдерите кои, според тогашните приказни, јадеа по дваесетина - триесетина јајца дневно за да изградат мускулна маса. Производите со висок процент на протеини, прашоци, шејкови и така натаму, освен што беа премногу скапи, како да беа и исклучиво „резевирани“ единствено за професионалните спортисти, оние што се натпреваруваа на големите спортски настани. Останатите не ни помислуваа на конзумирање протеински производи, а вистинска лудост беше и помислата да се јадат десетици јајца дневно.
Но, во изминативе неколку години состојбата е целосно променета, практично се случи невиден бум во индустријата за здрава храна. Посебна еуфорија се протеинските производи. Овој нутриент го има во јогурти, пудинзи, сладоледи, чоколади, солени или слатки кремови, во пекарски производи, во леб, па дури и во грицки со ознака „хај протеин“ - high protein или во превод „богато со протеини“. Она што некогаш беше само и единствено за спортистите, денес е еден од најбрзорастечките сегменти во прехранбената индустрија.
САД се заканија дека ќе го пренасочат гасот ако ЕУ не ги измени правилата за метанот
Американскиот министер за енергетика Крис Рајт ја предупреди Европската Унија дека испораките на американски гас ќе бидат пренасочени на други пазари доколку Унијата не ги ублажи правилата за намалување на емисиите на метан, моќен стакленички гас.
„Без значајна реформа на ова правило, Европа ќе се соочи со сериозни и непотребни проблеми“, изјави Рајт за „Блумберг“ на маргините на конференција во Њујорк. „Не станува збор за ескалација. Нашата енергија ќе продолжи да тече. Само ќе тече на друго место.“ Неговите коментари следуваат откако европскиот комесар за енергетика Дан Јоргенсен вети дека ќе се спротивстави на притисокот од САД и од другите извозници на течен природен гас (ЛНГ) за ревидирање на европските правила за намалување на емисиите на метан.
Швајцарски бренд влегува на фудбалскиот пазар каде доминираат „Адидас“ и „Најк“
„Он холдинг“ (On Holding AG) развива производи за фудбал, бидејќи швајцарскиот бренд сака да се прошири надвор од своите корени во трчањето и да го задржи брзиот раст.
Брендот е „апсолутно“ заинтересиран да влезе во фудбалскиот сектор и верува дека неговата роботизирана технологија за изработка на обувки „Лајтспреј“ (LightSpray) ќе му даде предност, изјави коосновачот Оливие Бернар во интервју во седиштето на компанијата во Цирих. Компанијата, поддржана од Роџер Федерер, бележи брз раст од основањето во 2010 година, почнувајќи со иновативни и удобни обувки за трчање, а потоа проширувајќи се во тенисот, тренинзите и спортовите на отворено. Таа настојува да ги зголеми и приходите од облека, како од спортската програма така и од производите за секојдневен стил.
Како „Гинис“ продолжува да расте додека продажбата на пиво ширум светот опаѓа?
Грејн Вејфер се впушти во изненадувачки сложената задача да наточи совршена кригла „Гинис“. Првиот чекор: проверка на чистотата на чашата. Таа го носи логото на „Гинис“, токму како што треба да биде во секој бар каде што ирскиот стаут се служи точен.
Вејфер, висока извршна директорка во „Дијажо“ (Diageo Plc), матичната компанија на „Гинис“, ја подигнува чашата кон силната сончева светлина што навлегува низ прозорецот на приватната точилница во „Гинис Сторхаус“ (Guinness Storehouse) во Даблин. Минатата година ова место го посетиле 1,8 милиони луѓе за да дознаат повеќе за богатата историја на брендот, вклучително и за 284-те проверки низ кои поминува пивото пред да ја напушти фабриката.
.webp){kind=icon}
