text size
Владата вчера донесе одлука за намалување на акцизите за нафтените деривати, но и покрај тоа, цената на дизелот и на бензинот од полноќ значително се покачија– дизелот за дури шест денари за литар, а бензините за три денари за литар.
Ова е второ последователно поскапување на дериватите, откако минатиот понеделник, РКЕ ги зголеми цените за 5,50 денари за дизелот и 1,50 денари за суперот. Од Владата рекоа дека доколку не ги намалеле акцизите, поскапувањето би било уште поголемо.
Добро утро ви посакува Игор Петровски од дигиталната редакција на „Блумберг Адрија“, ова се петте вести за почеток на денот:
Македонска берза: индексот со најлошо полугодие за изминативе пет години
Првите шест месеци перформансите на акциите котирани на Македонската берза не ги задоволија инвеститорите, ако ја гледаме вредноста на индексот, особено во споредба со претходните две години. После одличната 2024-та, кога МБИ10 порасна за неверојатни 67 отсто, во 2025 следеше стагнација, односно пад на индексот од 1,43 отсто.
Трендот продолжи засилено и во актуелнава 2026, кога МБИ10 забележува пад од 5,3 отсто во првите шест месеци, или речиси двојно повеќе, односно 9,9 отсто ако се споредува 30.06 годинава со истиот датум од лани. Послабите перформанси на пазарот се гледаат и преку прометот, односно, кај прометот со акции во класично тргување, во првото полугодие има пад од речиси една третина во однос на истиот период од 2025.
Како Федералните резерви би можеле да ја спасат берзата во следната финансиска криза?
Федералните резерви со децении беа последната линија на одбрана на финансискиот систем. За време на големите кризи, нивниот одговор се движеше од намалување на каматните стапки и купување државни обврзници до историската одлука за купување ЕТФ-ови (фондови со кои се тргува на берза) кои следат корпоративни обврзници за време на пандемијата.
Затоа, денес се поставува прашањето дали во некоја идна криза Федералните резерви би можеле да купат и ЕТФ-ови што го следат пазарот на акции и дали таков потег трајно би го променил начинот на кој пазарите реагираат на падови.
Британија доби нов премиер - што ветува Енди Бернам?
Енди Бернам вети „нов економски модел“ за Велика Британија, обидувајќи се да ги увери сонародниците дека неговото стапување на функцијата како нивен седми премиер за малку повеќе од една деценија ќе стави крај на политичката нестабилност во земјата.
Бернам вети во своите први обраќања како премиер во понеделник дека ќе преземе итни мерки за намалување на трошоците за живот, вклучително и објаснување како да се финансираат тие мерки. Тој го опиша потегот како прв чекор кон „10-годишен план“ за реструктуирање на владата, предавање на повеќе овластувања на локалните власти и ставање на некои основни јавни услуги „под посилна јавна контрола“.
Што е кинескиот стартап „Муншот“ и зошто ги потресе пазарите?
Кинескиот стартап „Муншот“ (Moonshot) на 17 јули претстави нов модел на вештачка интелигенција кој привлече глобално внимание, како поради неговите моќни способности, така и поради тоа што предизвика потреси на светските берзански пазари.
Моделот Кими К3 (Kimi K3 AI) на оваа компанија со седиште во Пекинг постигнува резултати на индустриски тестови кои се рамноправни со понудата на врвните играчи како „Опен еј-ај“ (Open AI) и „Антропик“ (Anthropic). Тоа е изненадувачки подем за компанија која досега дејствуваше во сенка на локалниот конкурент „Дипсик“ (DeepSeek).
Јана Репаншек, ЦЕФ: Одржливиот развој се остварува преку силни институции, а не преку индивидуални проекти
Од своето основање во 2001 година Центарот за извонредност во финансиите (ЦЕФ) со седиште во Љубљана, Словенија, има ангажирано повеќе од 30.000 јавни службеници, поддржал над 120 институции, спровел повеќе од 2.000 настани за учење низ регионот на југоисточна Европа и Турција, а иницијативите поддржани од ЦЕФ придонеле за посилно управување со реформите и напорите за пристапување кон ЕУ во опфатените земји.
Го искористивме Годишниот состанок на Управниот одбор на ЦЕФ што се одржа неодамна во Скопје да поразговараме со извршната директорка на организацијата, Јана Репаншек. Таа истакнува дека пред сѐ, силните институции се едни од највредните средства во регионот за справување со неизвесноста и одржување на напредокот.
.webp){kind=icon}
