Берзански рекорди и пензии од обложувалници- пет вести на денот

Воената кампања на САД против Иран досега не успеа да го принуди режимот да капитулира. Администрацијата на Трамп повторно се обложува дека задушувачкиот економски притисок ќе ја заврши работата. Соочени со недостиг на потребна муниција и претпазливи околу продолжување на непопуларната војна, Трамп и неговите високи функционери се враќаат на познатото сценарио со режимот: потпирајќи се на постојано зголемување на економските санкции и поморска блокада за задушување на извозот на нафта.

Обновениот акцент на економската болка - наречена „Максимум притисок“ во првиот мандат на Трамп - е значителен пресврт за администрацијата која, само неколку дена претходно, се закануваше со засилена воена кампања по речиси шест месеци војна против Техеран.

Добро утро, ви пишува Игор Петровски од дигиталната редакција на „Блумберг Адрија“, ова се петте вести за почеток на денот: 

 

Рекорди на европските берзи, се урива традицијата на „кучешки летни денови“

Европските берзи годинава ја побија традицијата за таканаречените „кучешки летни денови“ (од англиски: dog days of summer), како што се нарекува периодот кон крајот на јули и август, а кој вообичаено се карактеризира со помал обем на тргување, намалена пазарна активност и побавно движење на цените на берзите.

Имено, главните берзански индекси во Европа уриваат рекорди, а слична е состојбата и на американскиот пазар, иако таму деновиве можеше да се забележи доза на воздржаност главно поради очекувањата за најновите податоци за инфлацијата и, следствено, можните чекори на Фед.

 

Кои се главните причини што ги тераат граѓаните на поплаки кон македонските банки?

Во Народната банка (НБРМ) минатата година биле примени вкупно 210 поплаки од физичките лица, од кои 96,3 проценти или 191 поплака се со наводи за неправилности во работењето на деловните банки, една поплака се однесува на работењето на штедилница, а две поплаки за работењето на платежна институција.

Од НБРМ информираат дека за првпат се јавува нова категорија на поплаки, вкупно 16, кои се однесуваат на повеќе банки или прашања наменети за банкарскиот сектор во целина.

 

Среброто закрепнува - може ли повторно да се искачи над 100 долари?

Од почетокот на годината среброто помина низ еден од најтурбулентните периоди во својата историја. По спектакуларниот пораст во текот на минатата година и на почетокот на оваа година, среброто денес е речиси половина пониско од јануарскиот рекорд. Како и со златото, голем дел од падот следуваше по ескалацијата на конфликтот меѓу САД и Иран, во време кога, барем според конвенционалната пазарна логика, скапоцените метали треба да бидат меѓу главните добитници.

По неколку месеци притисок, почетокот на август донесе промена на расположението, бидејќи среброто порасна за околу 11 проценти во текот на последната недела, но дури и по тој скок, тоа е повеќе од 40 проценти под јануарскиот рекорд.

 

Вински туризам без вино: нови луксузни искуства меѓу лозјата

Едно ведро утро над Мерсо во Франција, балон на топол воздух со патници што фотографираат лебди над редовите винова лоза, додека под нив велосипедисти и планинари се пробиваат низ лозјата на Рут де Гран Кру, обрабени со афион, со однапред подготвени кошници за пикник. Таквата глетка сè почесто ги придружува традиционалните посетители на винските визби во ова популарно винско место.

Разновидноста на искуствата што денес им се достапни на туристите во Бургундија, чиј дел е Мерсо, покажува колку винскиот туризам се променил и станал активност во која виното повеќе не е задолжително.

 

Младите Американци сакаат преку спортско обложување да се обезбедат за пензија

Спортското обложување сè повеќе е во конкуренција со традиционалното инвестирање привлекувајќи го вниманието на помладите Американци, при што повеќе од една четвртина од инвеститорите од генерацијата зед (Generation Z) велат дека го гледаат обложувањето на спорт како дел од нивната долгорочна финансиска стратегија, според анкета на платформата за лични финансии „Бетермент“ (Betterment).

Околу 26 отсто од инвеститорите од генерацијата зед родени помеѓу 1997 и 2007 година рекле дека го третираат спортското обложување како намерна, континуирана компонента на нивните финансиски планови, според онлајн анкета на 1.000 американски мали инвеститори објавена во среда.