text size
На Исток ништо ново. Нафтата поскапе додека се намалуваат изгледите за брзо решение на војната меѓу САД и Иран, при што беше пријавен нов напад врз пловен објект во Ормускиот Теснец.
Обединетите Арапски Емирати (OAE), пак, соопштија дека две балистички ракети биле испукани кон земјата од Иран, што е првиот познат напад на Исламската Република врз земјата од Персискиот Залив од мај, додека пошироката војна на Блискиот Исток продолжува со несмалена сила.
Добро утро, ви пишува Игор Петровски од дигиталната редакција на Блумберг Адрија, ова се петте вести за почеток на денот.
Трошоците за државните долгови ќе растат - колку ќе плати Македонија
Трошоците за задолжување на државите нагло растат низ целиот свет. Приносите на 30-годишните американски државни обврзници оваа недела достигнаа највисоко ниво од 2007 година. Трошоците за задолжување на Франција се искачија на највисоко ниво од 2008 година.
Германските обврзници се тргуваат на нивоа што последен пат беа видени во 2011 година. Приносите на британските државни обврзници со слична рочност се приближуваат до нивото кое последен пат го имале во 1998 година, а јапонските обврзници со ист рок се блиску до историскиот максимум.
Кризата со хелиумот продолжува, засегнатa ли е и Македонија?
На списокот на суровини поради кои глобалната економија стана нервозна поради војната со Иран, хелиумот веројатно е меѓу најнеочекуваните. Тој е безбоен гас, без мирис и за пошироката јавност најчесто асоцира на балони што ги користиме за детските родендени.
Но зад оваа навидум безопасна слика стои суровина без која дел од најважните технологии на современата економија тешко можат да функционираат.
„Гугл“ за осум дена потпиша договори со три фудбалски гиганти: Војната за ВИ се сели на стадионите
„Гугл“ на почетокот на август склучи партнерства со Пари Сен Жермен (ПСЖ), Баерн и Барселона, поврзувајќи ги Џемини и „Пиксел“ со три од најголемите брендови во европскиот фудбал. Серијата на договори покажува колку спортот станува важен во борбата на технолошките компании за корисници на вештачка интелигенција и за удел на пазарот на паметни телефони.
Финансиските детали не се познати, но сите три договори имаат речиси иста структура. Џемини добива ексклузивен статус во категоријата вештачка интелигенција, додека „Пиксел“ станува официјален партнер за мобилни телефони.
Акциите на нафтените компании повторно рушат рекорди
Акциите на компаниите од енергетскиот сектор се приближуваат до рекордни нивоа достигнати претходно оваа година, поради војната на Блискиот Исток, бидејќи инвеститорите гледаат намалување на изгледите за прекин на огнот набрзо, што би можело да го олесни застојот во клучниот Ормуски Теснец.
Индексот на енергетскиот сектор S&P 500 се искачи за дури 1,8 отсто во вторник. Доколку добивките се одржат до затворањето на тргувањето, показателот би се затворил на историски рекордно високо ниво, прво од 27 март наваму.
„Тикток“ би можел да воведе испраќање пари преку директни пораки
„Тикток“ (TikTok) истражува функција што би им овозможила на корисниците да си испраќаат пари едни на други преку директни пораки, потег што би го проширил влијанието на апликацијата за социјални медиуми во финансиските услуги.
Функцијата што е во развој, доколку се лансира, би ја користела понудата „Тикток пеј“ (TikTok Pay) што е веќе достапна во Југоисточна Азија за менаџирање со трансакциите. Доказ за евентуалното додавање на оваа опција беше пронајден во кодот скриен во тековната верзија на американската апликација за на Тикток за Ајфон.
.webp){kind=icon}
