Пет вести: Скап шеќер и лекови против ќелавост

Крајно десничарската Алтернатива за Германија (AФД) убедливо победи на покраинските избори во Саксонија-Анхалт. Овој резултат, најдобар за антиимиграциската партија од нејзиното основање во 2013 година, претставува тежок удар за канцеларот Фридрих Мерц, чија ЦДУ помина значително полошо отколку што предвидуваа анкетите. АФД го искористи незадоволството кај граѓаните, потпирајќи се на барањата за запирање на миграцијата, прекин на политиките насочени кон борба против климатските промени и обновување на односите со Русија.

A во Франција Жордан Бардела, претседател на крајнодесничарската партија Национален собир, изјави дека безусловната поддршка на Франција за Украина треба да биде заменета со поусловен, односно потрансакциски однос. „Тонеме во долгови. Тонеме во дефицити. Неодговорно е да се преземаат трошоци и да се даваат ветувања за финансиска поддршка на една земја без никакви гаранции“, изјави Бардела за „Блумберг ТВ“ во саботата на форумот Амброзети во Чернобио, Италија.

Викендов продолжија и преговорите за крај на војната во Украина но, засега, без успех.

Добро утро, ова се петте вести што треба да ги знаете за почеток на денот.

Растот на цената на шеќерот може да им ги замати сметките на „Витаминка“ и „Атлантик Група“

По две години пад, цената на шеќерот повторно расте. Лошото време и намалената сеидба ја намалија глобалната понуда, зголемувајќи ја цената на белиот шеќер за околу 40 проценти од почетокот на годината, а за околу 30 проценти од нашата последна анализа.

За регионот Адрија, кој, освен Србија, покрива голем дел од своите потреби преку увоз, промената во циклусот значи враќање на притисокот врз трошоците на прехранбената индустрија. Компании како „Атлантик Група“ и „Витаминка“ би можеле да бидат особено изложени, бидејќи поскапиот шеќер доаѓа по период на силен раст на цените на другите клучни суровини, првенствено кафето и какаото.

Подем на Централна Азија: Од егзотичен пазар до инвестициска дестинација

Од нашата последна анализа на пазарите на Централна Азија (Зошто Казахастан и Узбекистан се нови ѕвезди на пазарот на капитал? | Блумберг Адрија), објавена во март, казахстанскиот индекс порасна за нешто повеќе од четири проценти, додека узбекистанскиот UCI се зголеми за повеќе од двојно, со раст од дури 101 проценти.

Во меѓувреме, регионот се врати во центарот на глобалното внимание по самитот на Шангајската организација за соработка (SCO) во главниот град на Киргистан, Бишкек, на кој се собраа лидерите на најголемите евроазиски економии, вклучувајќи ги Кина, Русија, Индија, Казахстан и Узбекистан.

По лековите за слабеење, нов хит на берзите се лековите против ќелавост

Фармацевтските компании пронајдоа ветувачко решение за епидемијата на дебелина, а пазарот ги награди со раст на цените на нивните акции. Сега инвеститорите со голем интерес ја следат новата група компании кои се обидуваат да решат проблем кој пред сè има естетска природа: ќелавоста.

Според проценките, наследното опаѓање на косата погодува околу 50 милиони мажи и 30 милиони жени во САД, но ниту еден нов лек не е одобрен од крајот на 1990-тите години. Очекувањата поврзани со новите терапии ги зголемија акциите на „Верадермикс“, која на берзата котира под ознаката „MANE“, за речиси 500 проценти откако компанијата излезе на берза во февруари, додека вредноста на акциите на „Абсци“ од почетокот на 2026 година е повеќе од двојно зголемена.

Поддршката на Трамп за дата-центрите го зголемува политичкиот ризик пред изборите

Цврстата поддршка на американскиот претседател Доналд Трамп за центрите за податоци за вештачка интелигенција го доведе во судир со гласачите, кои сè повеќе им се спротивставуваат. Тој останува на оваа позиција и покрај директните предупредувања дека неговиот став би можел дополнително да ја влоши позицијата на републиканците на ноемвриските меѓуизбори.

Политички стратези во последните месеци ги предупредувале претставниците на администрацијата дека ја губат битката за јавното мислење во врска со центрите за податоци, велат лица запознаени со разговорите. Неодамнешни анкети покажуваат дека приближно седум од десет Американци не сакаат вакви објекти во своја близина. Демократските кандидати се обидуваат да ги надминат своите републикански противници поврзувајќи го брзото ширење на инфраструктурата за вештачка интелигенција со загриженоста на гласачите околу трошоците за живот.

Реткиот супер Ел Нињо е се поизвесен - еве што се очекува

Ел Нињо се врати и се заканува да стане најсилниот досега регистриран. Цикличниот климатски феномен што започнува кога атмосферата реагира на затоплувањето на екваторијалниот дел од Тихиот Океан ги менува временските обрасци ширум светот. Во некои региони може да се засилат горештините и сушите, додека во други се зголемува количината на врнежи и ризикот од поплави. Нарушувањата на пазарите на земјоделски производи и енергенти би можеле да поттикнат раст на инфлацијата и да го забават економскиот раст.

Американскиот Центар за климатски прогнози (Climate Prediction Center) во јуни соопшти дека Ел Нињо се вратил, а во август наведе дека постои 69-процентна веројатност условите до крајот на годината да бидат најинтензивни во евиденцијата што се води од 1950 година. Светската метеоролошка организација (World Meteorological Organization), агенција на Обединетите нации, соопшти дека е речиси сигурно оти Ел Нињо ќе трае до февруари и очекува тој да биде „исклучителен“ настан.