Цените ќе бидат напишани на недвосмислен, видлив, читлив и јасен начин за купувачите полесно да можат да ги споредат. Трговците на мало се обврзуваат да ги објавуваат цените на производите на своите веб-страници на дневна основа за потрошувачите да бидат подобро информирани, а оние што имаат повеќе од еден продажен објект, да ги објавуваат цените на стоките поединечно, за секој свој продажен објект. Ова се измените во Законот за заштита на потрошувачите што вчера ги донесе Собранието.
Добро утро, ова се останатите пет вести што се важни за почеток на денот.
Денари, евра, долари … Во што да се штеди во лоши геополитички услови?
Вкупните депозити во јануари во земјава изнесуваат 592,7 милијарди денари (над 9,6 милијарди евра), покажуваат податоците од Народната банка.
„Во јануари вкупните депозити бележат месечен пад од 1,3 отсто, во целост како резултат на намалените депозити на корпоративниот сектор, додека депозитите на секторот ’домаќинства‘ се зголемуваат. Споредено на годишно ниво, вкупните депозити остварија раст од 11 проценти, којшто во поголем дел се должи на зголемените депозити на секторот ’домаќинства‘, при позитивен придонес и на депозитите на корпоративниот сектор“, пишува во соопштението од Народната банка.
Немојте да се изненадите ако наместо хирург ве оперира медицинска сестра
Пациентката зела аналгетик, „ксанакс“ за смирување, нешто против алергии, па таблета против гадење – фармацевтски коктел што треба да ја замени општата анестезија. Половина час подоцна, таа беше на операциската маса под надзор на Карен Џин Андерсон, медицинска сестра која поминала 40 часа обука организирана од дистрибутер на опрема за липосукција. Пациентката беше подложена на операција за зголемување на градите и отстранување на маснотии додека беше свесна.
Пациентката страдала од неподносливи болки. И дале топче за стрес и ѝ ги врзале очите. Андерсон и уште еден колега во собата ја прашале пациентката дали сака да ја прекине процедурата, но со оглед на тоа дека операцијата за која платила 10.000 долари веќе била почната, таа решила да продолжи.
Документарец на „Нетфликс“ за кошаркарското славење на Србија во Париз
Кошарката отсекогаш била американски спорт, но нивната доминација е во сериозен пад. Новиот документарен филм „Терен од злато“ (Court of Gold) на „Нетфликс“ се фокусира токму на оваа битка за кошаркарскиот трон на Олимписките игри што се одржаа во Париз, каде што телевизиските камери имаа можност да снимаат и зад сцената.
Две и пол децении најпопуларни спортски документарни филмови се оние што носат перспективи и настани што инаку немаме можност да ги гледаме. Тие каде што камерите се присутни во соблекувалните, на тренинзите, во хотелите и приватните простори на спортистите и тимовите. Легендарната НФЛ-серија „Хард нокс“ (Hard Knocks) го подигна нивото многу високо, а овој кошаркарски новитет на „Нетфликс“ настојува да му парира со фактот дека за првпат во историјата најдобрите светски кошаркарски тимови дозволија целосен увид во она што се случува, но не само на теренот.
Што очекуваат БМВ, „Порше“ и „Фолксваген“ од новата германска влада
Германската автомобилска индустрија е во криза. Продажбата е во пад, а производствените трошоци растат. „Фолксваген“ (Volkswagen AG), „Мерцедес“ (Mercedes-Benz Group AG) и стотици производители на делови заостануваат во преминот кон електрични возила.
Покрај тоа, заканата од дополнителни царини при увозот на нивните возила од страна на американскиот претседател Доналд Трамп не остава надеж. Сите очи на германската автомобилска индустрија беа вперени во резултатите од изборите, но и во тоа што следува по нив.
Страв меѓу инвеститорите, берзите крварат, длабоки загуби на крипто-пазарот
Деновиве кај инвеститорите навлезе страв кој се одразува и на пазарите на капитал. Многу индекси се во црвено, вклучително и акциите, а силни движења (надолни) се случуваат и на крипто-пазарот. Веројатно најпознатите американски индекси, S&P 500 и Nasdaq, вчерашниот трговски ден го завршија во минус.
Вториот беше во минус за 1,21 отсто, додека првиот загуби половина процент. Откако „Блумберг“ објави дека администрацијата на Трамп има намера дополнително да го ограничи пристапот на Кина до полупроводници (чипови), денешното тргување во Азија заврши главно во минус. Кинескиот индекс Hang Seng падна за речиси 1,5 отсто, исто како и јапонскиот Nikkei 225. Падот на јужнокорејскиот индекс KOSPI беше донекаде ублажен со намалувањето на каматната стапка на централната банка – тој беше намален за 0,60 отсто.
.webp){kind=icon}
