Германската економија забрзува, деловниот оптимизам силно расте

Германската економија во вториот квартал порасна побрзо од првично проценетото, а водечкиот показател за деловните изгледи го достигна највисокото ниво од пред војната во Иран, што е уште еден доказ дека долгоочекуваното закрепнување е во тек.

Производството порасна за 0,3 отсто меѓу април и јуни, наспроти прелиминарната процена што покажа раст од 0,2 отсто, благодарение на силните резултати во трговијата. Индексот на очекувањата на „Ифо“, во меѓувреме, скокна повеќе отколку што предвидуваше кој било аналитичар анкетиран од „Блумберг“.

Германија го бележи долгоочекуваното економско закрепнување

Извор: Destatis

„Германската економија закрепнува“, рече претседателот на „Ифо“, Клеменс Фист, во соопштение. „Компаниите беа позадоволни од својата моментална состојба и значително ги подобрија своите очекувања.“
По неколку години летаргија, се чини дека германската економија конечно закрепнува, бележејќи три последователни квартали на раст првпат од крајот на пандемијата, и покрај побрзата инфлација и повисоките каматни стапки предизвикани од војната во Иран.

Закрепнувањето, иако сè уште се соочува со предизвици, меѓу кои и сушата што ги погодува клучните водни патишта за транспорт, доаѓа пред три покраински избори што ќе бидат тест за работењето на канцеларот Фридрих Мерц откако ја презеде функцијата минатата година.

Мерц го предводеше зголемувањето на трошоците за војската и инфраструктурата, што го поттикнува растот, а исто така се залага за пакет економски реформи, но партиите во неговата влада остануваат под притисок од крајнодесничарската Алтернатива за Германија.

АфД ги користи тешкотиите на германската индустрија, а уште еден таков пример се појави во вторникот, кога претставниците на работниците во „Фолксваген“ (Volkswagen AG) предупредија дека планираните кратења на работните места на крајот би можеле да опфатат дури 140.000 позиции.

Но, податоците во последно време создаваат сè поголем оптимизам. Показателот за очекувањата на „Ифо“ достигна 89,1, а големите расходи за одбраната помогнаа производствената активност да се искачи на највисокото ниво во повеќе од четири години. Референтниот индекс DAX во август се искачи на рекордно ниво.

„Иако коментаторите и политичарите во Германија сè уште се жалат дека германската економија стагнира и дека не се гледа излез од повеќегодишната рецесија, актуелните податоци кажуваат малку поинаква приказна“, рече Себастијан Дулиен, научен директор на институтот ИМК.

Деловните изгледи во Германија се подобруваат

Извор: Ifo Institute

Аналитичарите што неодамна ги анкетираше „Блумберг“ ја зголемија прогнозата за растот годинава на 0,8 отсто, од претходните 0,6 отсто, а очекуваат тој да забрза на 1,2 отсто до 2028 година.

Економистите на германската државна развојна банка „КфВ“ (KfW) ја зголемија сопствената прогноза за 2026 година на 1,1 отсто од 0,7 отсто по извештајот за БДП објавен во вторникот. Сепак, тие предупредија дека ниското ниво на водата во реката Рајна ќе го запре растот во третиот квартал.

„Гледаме светлина на крајот од тунелот“, рече главниот економист на „КфВ“, Дирк Шумахер. „Постои оправдана надеж дека индустриското производство во иднина забележително ќе се зголеми, меѓу другото и благодарение на фискалните стимулации.“

Што вели „Блумберг економикс“...

„Натамошниот раст на деловната клима на ‘Ифо’ се надоврзува на низата добри вести за германската економија, по скокот на производствениот ПМИ и нагорната ревизија на растот на БДП поттикнат од извозот во вториот квартал. Податоците укажуваат дека германската економија, особено нејзиниот индустриски сектор кој се соочува со тешкотии, ќе продолжи да закрепнува во следните квартали. Сепак, многу слабите инвестиции и ризиците од прекини во превозот по реката Рајна ги ублажуваат позитивните сигнали.“

-Мартин Адемер

„ТКМС“ (TKMS), најголемиот германски производител на воени бродови, кој има корист од бранот на повторно вооружување, повторно ја зголеми прогнозата за целата година овој месец. На други места, големите трошоци за вештачка интелигенција им помагаат на „Сименс“ (Siemens) и „Шнајдер електрик“ (Schneider Electric) да профитираат од досега невидената побарувачка за центри за податоци.

Рут Бранд, претседателка на Федералниот завод за статистика, го припиша неочекуваниот резултат на Германија во вториот квартал на нето-извозот, кој придонесе со 0,2 процентни поени.

„Продолжува моментумот на раст на германската економија од почетокот на годината“, рече таа во соопштение.

-Со помош на Харуми Ичикаура, Џоел Ринеби и Сајмон Ли