Економијата на еврозоната ќе назадува следната година, поради борбата со растот на цените на енергијата, како и можниот недостиг предизвикан од руската инвазија на Украина.
Бруто домашниот производ ќе се намали за 0,1 отсто во 2023 година, покажуваат резултатите од истражувањето на Bloomberg. Истите економисти минатиот месец предвидоа раст на БДП од 0,3 отсто. Германија, најголемата економија во еврозоната, ќе има негативен раст од 0,5 отсто, додека економиите на Франција, Италија и Шпанија ќе растат.
Фактот дека Германија зависи од рускиот природен гас ја доведе оваа земја во тешка позиција по избувнувањето на војната во Украина. Потрошувачите мака мачат со растот на цените, а падна и расположението кај претставниците на компаниите, при што сето тоа дојде како резултат на повисоките цени на енергенсите и широка палета на други стоки.
Bloomberg Mercury
Додека најновите прогнози на Европската централна банка (ЕЦБ) не предвидуваат два последователни квартала на пад на БДП, потпретседателот на ЕЦБ, Луис де Гвиндос, во интервју за печатот објавено во петокот рече дека постои можност за „техничка рецесија“ поради високата инфлација.
„Германската економија ќе забележи пад во најмалку три последователни квартали до пролетта 2023 година“, вели Денис Хуцермаер, виш економист во истражувачкиот институт Handelsblatt. Ова ќе биде нетипична рецесија поради големата побарувачка за работна сила и големиот број заостанати нарачки што преработувачката индустрија ќе може да ги користи како тампон, додава тој.
Економистите ги ревидираа и своите прогнози за инфлацијата за следната година. Инфлацијата во еврозоната во 2023 година ќе изнесува 5,5 отсто на годишно ниво, што е за 0,5 процентни поени повеќе од резултатите од претходното истражување. Прогнозите за инфлацијата во Германија беа исто така ревидирани нагоре, односно најмногу од најголемите економии во еврозоната.
Се предвидува дека ЕЦБ ќе продолжи да ги зголемува каматните стапки, а стапката на депозитите ќе достигне 2,5 отсто до првиот квартал на 2023 година. Првото намалување на стапката се очекува во вториот квартал на 2024 година.
.webp){kind=icon}